Ku Bena Tesalonika
4 Kyapelako balongo bami, byonkatu byo mwatambwile mikambizho kwi atweba pa byo mwafwainwa kwendanga pa kuba’mba mutokeshe Lesa ku muchima,+ byonkatu byo mubena kwenda ne pano, twimusashijila mwi Nkambo Yesu namba, mukijishemotu kuba kino. 2 Mambo mwiiyuka mikambizho yo twimupele kupichila mwi Nkambo Yesu.
3 Kino kyo kyaswa muchima wa Lesa amba mwafwainwa kwikala bazhila+ ne kuchina bulalelale.*+ 4 Muntu yense mwi anweba wafwainwa kuyuka bya kukanya mubiji wanji+ pa kuba’mba ekale wazhila+ ne kunemekwa, 5 kechi kwikala na lunkumbwa, ne milanguluko yatama ibindakanya muchima+ byonka byuba ba mu bisaka bya bantu babula kuyuka Lesa ne.+ 6 Kabiji na mambo a kino, kafwako muntu nangwa umo wafwainwa kupitaila pa kupelela ne kuba kyatama mulongo wanji ne, mambo Yehoba* ye ushinkanya mu bino bintu byonse, byonkatu byo twimubuujile kala ne kwimujimunako kyabaya. 7 Mambo Lesa kechi witwichile ku bubipisho ne, bino witwichile ku buzhile.+ 8 Onkao mambo, awa ulengulula kino kechi ulengulula muntu ne, ulengulula Lesa,+ yenka wimupa mupashi wanji wazhila.+
9 Nangwa byonkabyo, pa mambo a butemwe bwa kutemwa balongo,+ kechi twafwainwatu ne kwimunembela ne, mambo Lesa wimufunjisha kwitemwa anwe bene na bene.+ 10 Kabiji bino byo byo mubena kuba ku balongo bonse baji mu Makedonya monse. Bino balongo bami, tubena kwimutundaika namba, mukijishemotu kuba kino. 11 Mutesheko muchima kwikala mu mutende+ kabiji kange mwibikenga mu bintu bya bakwenu ne,+ bino saka mwingila na maboko enu+ byonka byo twimukambizhe, 12 kuba’mba mwendengatu bulongo ku bantu ba pangye+ ne kukajilwa kintu ne.
13 Kabiji anweba balongo bami, kechi twakeba namba mubule kuyuka pa boba balaala mu lufu ne,+ pa kuba’mba mubule kwikala na bulanda bwikalapo na bantu babula luketekelo.+ 14 Umvwe tuji na lwitabilo lwa kuba’mba Yesu wafwile ne kusanguka,+ ko kuba’mba Lesa ukebaleta kwikala nanji pamo, aba baponena mu tulo twa lufu mwi Yesu.+ 15 Mambo kino kyo kyo twimubuula mu byambo bya Yehoba* amba, atweba tukatanwa bomi mu kimye kya kwikalapo Nkambo kechi tukatangilapo ne kusha baponena kala mu tulo twa lufu ne; 16 mambo Nkambo mwine ukekila mwiulu na mbila, na jiwi ja malaika mwine mukatampe+ ne na ntolompita ya Lesa, ne boba bafwijile mwi Kilishitu bakasanguka patanshi.+ 17 Kepo atweba bomi tukatanwapo, tukaya nabo mu makumbi+ ne kusambakana Nkambo+ mu lwelele; byonkabyo tukekalanga na Nkambo kimye kyonse.+ 18 Onkao mambo, itekeneshainga anwe bene na bene na bino byambo.