Kubala
25 Bena Isalela byo baikelenga mu Shitima,+ batatwile kuba bulalelale na banabakazhi bena Moabu.+ 2 Kabiji bano banabakazhi baichilenga bena Isalela ku bitapisho bya balesa ba bubela,+ ne bena Isalela bajiilenga ne kufukamina balesa ba bubela.+ 3 Onkao mambo, bena Isalela batendekele kupopwela* Baela wa ku Peola,+ kabiji bukaji bwa Yehoba bwabuukijiile bena Isalela. 4 Yehoba waambijile Mosesa amba: “Senda bakulumpe* ba bano bantu bonse wibakujike mute* kwi Yehoba pa kuba’mba bukaji bwa Yehoba bufumepo pa bena Isalela.” 5 Kepo Mosesa abuujile bamitonyi ba bena Isalela amba:+ “Anweba bonse pa muntu pa muntu ipayai balongo benu babena kupopwela* Baela wa ku Peola.”+
6 Kabiji bena Isalela byo bajijilenga ku kibelo kya tente wa lusambakeno, mwina Isalela umo waletele mwanamukazhi+ mwina Mijanyi ku balongo banji, ne Mosesa ne jibumba jonse ja bena Isalela saka jimonako. 7 Finease+ mwana wa kwa Eleaza, Eleaza mwana wa kwa Alona ñanga, byo amwene kino, ponkapo wafumine mu jibumba ne kusenda jifumo* mu kuboko kwanji. 8 Kepo alondejile uno mwina Isalela mu tente ne kukebapulankanya jifumo bonse babiji, mwanamulume mwina Isalela ne mwanamukazhi monka mu bya bwanabukazhi byanji. Ponkapo kinkunka kyapwile mu bena Isalela.+ 9 Bantu bafwile ku kino kinkunka, bajinga 24,000.+
10 Kepo Yehoba aambijile Mosesa amba: 11 “Finease+ mwana wa kwa Eleaza, Eleaza mwana wa kwa Alona ñanga, watontolola bukaji bwami pa bena Isalela mambo kechi waswisha byubilo bya bunya byo bauba kwi amiwa ne.+ Onkao mambo, kechi navizha bena Isalela ne, mambo nkeba bantu kuñingijilatu bunke bwami.+ 12 Onkao mambo, mubuule’mba, ‘Mbena kulayañana nanji lulayañano lwa mutende. 13 Kabiji lukekala lulayañano lwa myaka lwa buñanga bwanji ne lwa baana banji bakeya kulutwe,+ mambo kechi waswisha byubilo bya bunya byo bauba kwi Lesa wanji ne,+ kabiji wafuchilako bena Isalela mambo abo.’”
14 Kabiji jizhina ja mwanamulume mwina Isalela ye baipayijile pamo na mwanamukazhi mwina Mijanyi wajinga Zimuli mwana wa kwa Salu mukulumpe wa kikota kya bena Shimeona. 15 Ne jizhina ja mwanamukazhi mwina Mijanyi ye baipayile wajinga Kozibi mwana wa kwa Zula;+ Zula ye wajinga ntangi wa bikota bya mu Mijanyi.+
16 Kepo Yehoba aambijile Mosesa amba: 17 “Bayanjishai bena Mijanyi ne kwibepaya,+ 18 mambo bemuletejile bya malwa byo baingijishe mashinda a bujimuku ne kwimulengela kulenga mambo na mambo a lesa wa bubela wa ku Peola.+ Kabiji na mambo a kwa Kozibi mwana wa mukazhi wa mfumu wa ku Mijanyi ye baipayile+ pa juba jaishile kinkunka pe anweba, ne na mambo a lesa wa bubela wa ku Peola, bemujimbaikile amba mulenge mambo.”+