Mika

3 Naambile namba: “Umvwai anweba bantangi ba kwa Yakoba

Ne anweba bakulumpe ba mu nzubo ya Isalela.+

 2 Bino mwashikwa bintu byawama+ ne kutemwa bintu byatama;+

Musuba bikoba bya bantu bami ne kufumya misunyi ku bikupa byabo.+

 3 Kabiji muja ne mibiji ya bantu bami+

Ne kwibasuba bikoba,

Mulalaula bikupa byabo, kwibisansakanya,+

Nobe bintu byo babena kuteka mu mwipika,* nobe nyama iji mu mwipika.

 4 Pa kyokya kimye bakamwita Yehoba amba ebakwashe,

Bino kechi ukebakumbula ne.

Pa kyokya kimye aye ukafya kilungi kyanji kwi abo,+

Na mambo a byubilo byabo byatama.+

 5 Bino byo byaamba Yehoba pa mambo a bangauzhi babena kutwala bantu bami mungi,+

Bonka bamba’mba ‘Mutende!’+ inge bebapapo kajo+

Bino bapingila* kulwa na muntu wabula kwibapapo kajo, amba:

 6 ‘Bufuku bukemwijila;+ kechi kukekala kimwesho ne;+

Kukekalatu mfishi, kwa kubula lubuko.

Juba jikebazhikila bangauzhi,

Ne juba jikebalukila ke mfishi.+

 7 Bamona bimwesho bakomvwa bumvu,+

Ne bañanga ba lubuko bakebalengesha bumvu.

Bonse bakavweta pa ntomombo* yabo,

Mambo Lesa kechi ukebakumbula ne.’”

 8 Pakuba amiwa, mupashi wa Yehoba wampa bulume,

Ne bunchibamambo bwaoloka ne ngovu,

Kuba’mba mbuule Yakoba mizhilulwila yanji ne bena Isalela bubi bwabo.

 9 Umvwai kino, anweba bantangi ba mu nzubo ya kwa Yakoba

Ne anweba bakulumpe ba mu nzubo ya Isalela,+

Bonka bashikwa bunchibamambo bwaoloka kabiji batwala bintu byonse byaoloka mungi,+

10 Bonka bashimika Ziona na mashi ne Yelusalema na bintu byabula koloka.+

11 Bantangi* banji batambula mazhikakanwa pa kuchiba mambo,+

Bañanga banji bafunjisha’mba bebafwete,+

Kabiji bangauzhi banji batambula mali* pa kuponga.+

12 Onkao mambo, na mambo a anweba,

Ziona bakamujima nobe bujimi,

Yelusalema ukekala ke milumba ya bikulukulu,+

Ne mutumba wa Nzubo ukekala nobe mapunzha atuntama aji mu jisaka.*+