Buku wa Bubiji wa Bamfumu
21 Manase+ wajinga na myaka ya kusemwa 12 kimye kyo aikele mfumu, kabiji walamine mu Yelusalema myaka 55.+ Jizhina ja inanji wajinga Hefiziba. 2 Waubilenga byatama kwi Yehoba, ne kulondela byubilo bya bunya bya bisaka bya bantu+ Yehoba byo apangilemo ku bena Isalela.+ 3 Washimukulwile mapunzha atuntama onka Hezekiya shanji o aonawine,+ ne kushimikila Baela bya kusokelapo bitapisho kabiji wasumpile ne kichi* kya mulumbulumbu kyazhila,+ byonkatu byaubile Ahaba mfumu wa Isalela.+ Kabiji wafukamijilenga bintu byonse bya mwiulu ne kwibingijila.+ 4 Kabiji washimikile ne bya kusokelapo bitapisho mu nzubo ya Yehoba,+ yonka Yehoba yo aambilepo amba: “Mu Yelusalema, mo mukekala jizhina jami.”+ 5 Kabiji bintu byonse bya mwiulu+ wibishimikijile bya kusokelapo bitapisho mu bipango bibiji bya nzubo ya Yehoba.+ 6 Kabiji wasokele ne mwananji mu mujilo;* ne kuba bingelekezha ne bya lubuko+ kabiji watongwele bantu besamba na mipashi ne bamba bikamweka kulutwe.+ Waubile bintu byatama byavula bingi ku meso a Yehoba, ne kumuzhingijisha.
7 Wabikile kipashañano kya kusonga kya kichi* kya mulumbulumbu kyazhila+ kyo alengele mu nzubo yaambilepo Yehoba kwi Davida ne kwi Solomone mwananji amba: “Mu ino nzubo ne muno mu Yelusalema, ye nasala mu mikoka yonse ya bena Isalela, mo mo nkabika jizhina jami kikupu.+ 8 Kabiji kechi nkalengela jibiji maulu a bena Isalela kwenda kufuma mu kyalo kyo napele bashakulu babo ne,+ inge bakatesheko muchima kulondela byonse byo nebakambizhe,+ Mizhilo yonse kalume wami Mosesa yo ebakambizhe kulondela.” 9 Kechi bakookejile ne, kabiji Manase wibatwajilenga mungi ne kwibalengela kuba bubi bukatampe kukila ne bwaubilenga bisaka bya bantu Yehoba byo aonawine ku meso a bena Isalela.+
10 Yehoba waambilenga kupichila mu bakalume banji bangauzhi+ amba: 11 “Manase Mfumu wa Yuda wauba bino bintu byonse bya bunya; wauba bubi bukatampe kukila ne bena Amoli+ bonse bajingako kala,+ kabiji walengela bena Yuda kulenga mambo na bankishi banji ba bunya.* 12 Onkao mambo, Yehoba Lesa wa Isalela waamba’mba: ‘Mbena kuleta bya malwa bikatampe pa Yelusalema+ ne Yuda kya kuba aba bakomvwa bakakankamanatu.*+ 13 Kabiji nkavungulwila muzhinge wa kupiminako+ pa Yelusalema yenka ye napimijileko Samaliya+ kabiji nkengijisha kya kolwelako* kyo naingijishe ku nzubo ya kwa Ahaba,+ kabiji nkamushiimuna Yelusalema ne kumutokesha, byonkatu muntu byo ashiimuna nsanyi yafukumana ne kwiitokesha, kwiishiimuna ne kwiikuvumika.+ 14 Kabiji bashalapo ba mu buswanyi bwami nkebataya+ ne kwibapana mu maboko a balwanyi babo, ne abo bakebakwata ne kwibatwala mu buzha ku balwanyi babo bonse,+ 15 mambo bangubile byatama kabiji batwajijile na kunzhingijisha kufumatu juba jafumine bashakulu babo mu Ijipita kufika ne lelo jino.’”+
16 Kabiji Manase waichijile mashi avula bingi a bantu babula mambo kufikatu ne byo ayuzhizhe Yelusalema kufumatu ko atendekela kufika ne ko apelela,+ kununga pa bubi bwanji bo alengejile bena Yuda kuba kupichila mu kuba byatama ku meso a Yehoba. 17 Bintu bikwabo byapichilemo Manase ne bintu byonse byo aubile ne bubi bo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 18 Kepo Manase bamutwajile na kulaala kwalaala bashakulu banji ne kumuzhiika mu bujimi bwa ku nzubo yanji, mu bujimi bwa kwa Uza;+ kabiji mwananji aye Amonyi wamuswaine pa bufumu.
19 Amonyi+ wajinga na myaka ya kusemwa 22 kimye kyo aikele mfumu, kabiji walamine mu Yelusalema myaka ibiji.+ Jizhina ja inanji wajinga Meshulemete mwana wa kwa Haluza wa ku Yotaba. 20 Waubilenga byatama ku meso a Yehoba, byonkatu byaubanga Manase shanji.+ 21 Watwajijile kwenda mu mashinda onse aendelengamo shanji, kabiji waingijilenga ne kufukamina bankishi ba bunya bonka shanji bo aingijilanga.+ 22 Onkao mambo, washile Yehoba Lesa wa bashakulu banji, kabiji kechi waendanga mu jishinda ja Yehoba ne.+ 23 Kepo bakalume ba kwa Amonyi bamwalukijilemo mfumu ne kumwipayila mu nzubo yanji. 24 Pakuba bantu ba mu kyalo batapile bonse bamwalukijilemo Mfumu Amonyi, kabiji baswanyikilepo mwananji aye Yosiya pa bufumu.+ 25 Bintu bikwabo byapichilemo Amonyi, byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 26 Byonkabyo, bamuzhiikile mu kilende kyanji mu bujimi bwa kwa Uza,+ kabiji mwananji aye Yosiya+ wamuswaine pa bufumu.