Ku Bahebelu
10 Mizhilo byo iji kimvule+ kya bintu byawama bikeya,+ bino kechi kine kintu kyapasha byobya bintu ne, bino bintu* kechi byakonsha kulengela aba bapopwela Lesa kwikala balumbuluka pa kulambula bitapisho bintutu bimo pa mwaka pa mwaka ne.+ 2 Inge kyajinga bino, nanchi bitapisho umvwe kechi balekele kwibipana nenyi? Mambo aba bengila mwingilo wazhila bo batokeshe jimotu, inge kechi baji na michima ya kwizhachisha bene ne. 3 Pakuba bino bitapisho bibavululangako pa mwaka pa mwaka bundengamambo bwabo,+ 4 mambo mashi a bañombe balume ne a bambuzhi kechi akonsheshe kufumyapo bundengamambo ne.
5 Onkao mambo, aye byo aishile pano pa ntanda, waambile’mba: “‘Mwakaine kitapisho ne mulambo, bino mwannengezhejile mubiji. 6 Kechi mwaitabizhe milambo ya kusoka ne milambo ya bubi ne.’+ 7 Kepo naambile’mba: ‘Talai! Naiya (kyanembwa pe amiwa mu muvungilo*) na kuba kyaswa muchima wenu anweba Lesa.’”+ 8 Byo aambile’mba: “Mwakaine kwitabizha bitapisho ne milambo ne milambo ya kusoka ne milambo ya bubi”—bitapisho bilambulwa mwayila Mizhilo— 9 kepo aambile’mba: “Talai! Naiya na kuba kyaswa muchima wenu.”+ Aye wafumyapo kitanshi kuba’mba apingizhepo kya bubiji. 10 Na mambo a kino “kyaswa muchima wanji,”+ twazhijikwa pa kulambulwa kwa mubiji wa kwa Yesu Kilishitu ye alambwile jimotu.+
11 Kabiji ñanga yense pa juba pa juba wingila mwingilo* wazhila+ ne kutapisha javula bitapisho bintutu bimo,+ byonka bibula kukonsha kufumyapo bundengamambo.+ 12 Bino uno muntu watapishe kitapisho kya bundengamambo jimotu kabiji waikele ku kilujo kya Lesa,+ 13 kufumatu akya kimye saka apembelela kufikatu ne kimye kya kwalula balwanyi banji ke jitebe ja kunyantapo maulu anji.+ 14 Mambo na kitapisho kimo, walengela aba bo babena kuzhijika kwikala balumbuluka myaka ne myaka.+ 15 Kabiji mupashi wazhila naye witwimenako bukamonyi, byo aamba’mba: 16 “‘Luno lo lulayañano lo nkalayañana nabo aa moba byo akapwa, nkabika mizhilo yami mu michima yabo ne kwiinemba mu milanguluko yabo,’” byo byaamba Yehoba.*+ 17 Kabiji waamba’mba: “Kabiji mambo abo ne byubilo byabo byabula koloka kechi nkebivulukapo jibiji ne.”+ 18 Lesa byo alekela ano mambo onse, kechi kukiji mulambo wa bundengamambo ne.
19 Onkao mambo, balongo bami, byo twachinchika* pa kwenda mu jishinda ja kutwelelamo mu mpunzha yazhila+ na mashi a kwa Yesu, 20 jo etushinkwijile kwikala ke jishinda jipya ja ku bumi, kupichila mu kipembe,+ ko kuba’mba, mubiji wanji, 21 ne byo tuji na ñanga mukatampe uji na luusa pa nzubo ya Lesa,+ 22 twayai tumusolomokenga Lesa na muchima yense ne na lwitabilo lwakosa, byo tuji na michima yo batokesha kala kwitufumya ku jiwi ja mu muchima jatama+ ne kovwa mibiji yetu na mema atoka.+ 23 Twayai tusapwilenga patoka na mukoyo luketekelo lwetu kwa kubula kuleka,+ mambo awa walaya ye wa kishinka. 24 Kabiji twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama,+ 25 kabiji kange tuleke kupwila pamo+ byonka byuba bantu bamo ne, bino twitundaikenga atwe bene na bene,+ ne kwibikishakotu byo mubena kumona aja juba saka jifwenya pepi.+
26 Onkao mambo, umvwe saka tulenga mambo kyanshiji saka twayuka bulongo bukine,+ kechi kwakishala kitapisho kikwabo kya bundengamambo ne,+ 27 bino kyashalakotu ke kupembelela lukabisho luleta moyo ne bukaji buteema nobe mujilo bukonauna aba balengulula Lesa.+ 28 Muntu yense ulengulula Mizhilo ya Mosesa ufwa kwa kubula kumubila lusa pa kumushiina ku bakamonyi babiji nangwa basatu.+ 29 Nanchi mwalangulukapo amba ka, inge muntu wanyanta pa Mwana Lesa, kulengulula mashi anema bingi a lulayañano+ o bamuzhijikijilemo ne kuba mwenga mupashi wa lusa lukatampe, nanchi kechi bakamukabisha kukilamo nenyi?+ 30 Mambo twamuyuka awa waambile’mba: “Kushinkanya ko kwami; yami nkalubula.” Kabiji amba: “Yehoba* ukebachibila mambo bantu banji.”+ 31 Ke kintu kileta bingi moyo kumona lukabisho lufuma kwi Lesa mumi.
32 Nangwa byonkabyo, vulukainga moba a kala, mo mwachinchikile ne kupita mu makatazho akatampe byo mwatambula kyeya.+ 33 Bimye bimo bemunenenga mwenga ne kwimumanyika pa bantu,* kabiji bimye bikwabo mwakwashanga aba bapichilenga mu bino bintu. 34 Mambo anweba mwaubijile lusa boba bajinga mu kaleya kabiji mwasangalele pa kwimwangata bintu byenu,+ byo mwayukile’mba muji na bunonshi bwa myaka ne myaka bwakilamo kuwama.+
35 Onkao mambo, kange muleke kuchinchika* ne, mambo muji mfweto ikatampe.+ 36 Mambo kimufwainwa anweba kuchinchika+ kuba’mba umvwe mwapwisha kuba kyaswa muchima wa Lesa, mukatambule akya kyalaiwe. 37 Mambo pakishala “pacheche,”+ ne “yewa ubena kwiya ukafika kabiji kechi ukabanda ne.”+ 38 “Bino kalume wami mololoke ukekala na bumi na mambo a lwitabilo,”+ kabiji “umvwe wabwela panyuma, amiwa* kechi mmwenamo lusekelo mwi aye ne.”+ 39 Atweba kechi twi boba babwela kunyuma ku lonaiko ne,+ bino twi boba baji na lwitabilo lwa kupulusha bumi* bwetu.