Habakuka
Nkakenkentanga kuba’mba nkamone byo akambuula
Ne byo nkakumbula inge bankajipila.
2 Kepo Yehoba ankumbwile’mba:
“Nemba kino kimwesho, kabiji wikinembe bulongo pa mabwe apapakana,+
Pa kuba’mba muntu ukekitanganga na jiwi ja peulu akatange kwa kubula lukatazho.*+
3 Mambo kino kimwesho kibena kupembelela kimye kyakyo kyatongolwa,
Kabiji kibena kupelawizha kwiya amba kifike ku mpelo yakyo, kabiji kechi kikabula kufika ne.
Nangwa kya kuba kyabanda,* wikitengelenga!*+
Mambo kwa kubula nangwa kuzhinauka ne, kikafika.
Kechi kikakelwa ne!
4 Tala muntu wilundumika;
Aye mwine kechi waoloka ne.
Bino mololoke ukekala na bumi na mambo a bukishinka* bwanji.+
5 Kine, na mambo a kuba binyu bijimbaika,
Muntu witota kechi ukafikizha kikonkwanyi kyanji ne.
Aye utwajijila kukonkanya bisaka bya bantu byonse
Ne kwikonkenya mitundu yonse ya bantu.+
6 Nanchi bano bonse kechi bakamwendelekanga ne kumutayila nkiji ne kumwelela bishimpi nenyi?+
Bakamba’mba:
‘Malwa anji awa unonkela pa bintu byabula byanji
—Ukobanga kino myaka inga?—
Ne yewa uvuzha nkongole yanji!
7 Nanchi aba bo wakongweleko kechi bakakuvundumukila nenyi?
Bakabuuka ne kukusunkenya na bukaji,
Kabiji kwi abo ukekala nobe kipukulwa.+
8 Na mambo a kuba wapukwile bisaka bya bantu byavula,
Bonse bashala ba mitundu ya bantu bakakupukula,+
Mambo waichijile mashi a bantu
Ne bukapondo bo waubile ntanda,
Ku mizhi ne ku boba bekalamo.+
9 Malwa anji awa unonkesha nzubo yanji na bintu byo amwena mu bubi,
Amba alengele kinsa kyanji peulu pene,
Pa kuba’mba aposomoke mu bulume bwa bya malwa!
10 Na mambo a milanguluko yobe walengesha bumvu nzubo yobe.
Na mambo a kuzhiya mitundu ya bantu yavula wilenga mambo obe mwine.*+
11 Mambo jibwe jiji mu lubumbulu jikabijika,
Ne mwamba wa ku musemi ukakumbula.
12 Malwa anji awa ushimika muzhi na mambo a kwichila mashi,
Kabiji ushimika muzhi na mambo a bintu byabula koloka!
13 Umvwai! Nanchi Yehoba kechi ye ulengela mitundu ya bantu kwingila na bulume pa kusonsela mujilo,
Ne kuba’mba bisaka bya bantu bikookeshe kyatutu nenyi?+
14 Mambo pa ntanda pakakumbana maana a kuyuka lukumo lwa Yehoba
Byonkatu mema byo akumbana mu kalunga ka mema.+
15 Malwa anji awa upa bakwabo bya kutoma,
Ne kuvwangako byashinta kuba’mba bapendwe,
Pa kuba’mba atalenga pa bumvu bwabo!
16 Bakakupelula bingi kabiji kechi bakakunemeka ne.
Ne obewa utome ne kumwesha’mba kechi waya ku mukanda ne.
Katomeno kaji mu kuboko kwa kilujo kwa Yehoba kakeya pe obewa,+
Kabiji bumvu bukavweta lukumo lobe;
17 Mambo bukapondo bo baubile Lebanoni bukakuvweta,
Kabiji lonaiko lwalengejile banyama kwikala na moyo lukeya pe obewa,
Mambo waichijile mashi a bantu
Ne bukapondo bo waubile ntanda,
Ku mizhi ne ku boba bekalamo.+
18 Ñanyi buwame buji mu kipashañano kya kusonga
Inge kya kuba’mba muntu ye wikisonga?
Ñanyi buwame buji mu kipashañano kya kyela* ne mu mufunjishi ufunjisha bubela,
Nangwa kya kuba muntu wikilenga wikiketekela,
Ne kulenga balesa batutu babula kwamba?+
19 Malwa anji awa wambila kichi amba, “Laba!”
Nangwa wambila jibwe jibula kwamba amba, “Buuka! Tufunjishe!”
20 Bino Yehoba uji mu nzubo yanji yazhila.+
Ikalai nzoo kwi aye, anweba bonse ba pano pa ntanda!’”+