Nehemiya

4 Sanabalata+ byo aumvwinetu’mba tubena kushimukulula nsakwa, waubile bukaji ne kuzhingila, kabiji waendelekelenga Bayudea. 2 Kabiji waambile balongo banji ne nzhita ya bena Samaliya saka bomvwa, amba: “Bano Bayudea babula kukosa babena kuba ka? Nanchi bakooba kino bunke bwabo nyi? Nanchi bakatapishanga bitapisho nyi? Abya bakapwisha mu juba jimo nyi? Nanchi mabwe o basoka aji pa milumba ya bibumbulubwe bakealengela kwikala atuntulu jibiji nyi?”+

3 Kabiji Tobiya+ mwina Amonyi,+ waimene kwipi ne aye, waambile’mba: “Umvwe lubwala wakanjila pa kyo babena kushimika, wakonsha kukundula nsakwa yabo ya mabwe.”

4 Umvwai, anweba Lesa wetu, mambo betulengulula,+ kabiji lengelai mwenga wabo abwele pa mitwe yabo,+ ne kwibalengela kwikala nobe bipukulwa ne kwikala bazha mu kyalo kikwabo. 5 Kabiji kange muvwetepo pa mambo abo nangwa kufuuta bubi bwabo ku meso enu ne,+ mambo batuka bantungi.

6 Byonkabyo, twatwajijile kushimika nsakwa, kabiji nsakwa yonse twiinungile ne kwiishimukulula kichika kya kimino kyayo, kabiji bantu batwajijile kutako muchima ku mwingilo.

7 Sanabalata, Tobiya,+ bena Alabya,+ bena Amonyi ne bena Ashadoda+ byo baumvwinetu’mba mwingilo wa kuwamisha nsakwa ya Yelusalema ubena kwendatu bulongo ne kuba’mba pa mapunzha pashalashala babena kushinkapo, bazhingijile bingi. 8 Baumvwañene amba bakaye na kulwisha Yelusalema ne kuletamo bufinda. 9 Bino twalombele kwi Lesa wetu, kabiji na mambo a abo twabikile bakasopa ba kwituzhikijila mute ne bufuku.

10 Nangwa byonkabyo, Bayudea baambilenga’mba: “Ngovu ya babena kwingila* yakepa kabiji kuji bibumbulubwe byavula; kechi tukakonsha kushimika nsakwa ne.”

11 Kabiji balwanyi betu baambilenga’mba: “Saka bakyangye kuyuka nangwa kwitumona, tukatwela mukachi kabo ne kwibepaya ne kulekesha mwingilo.”

12 Kimye kyonse kyaiyanga Bayudea bo baikalanga nabo kipikipi, betubuulanga javula* amba: “Bakeya na kwitulukuka kufuma konse konse.”

13 Onkao mambo, nabikile bantu mu mapunzha ajinga panekuka kunyuma ya nsakwa patoka, kabiji nebatanchikile monka mwayijile bisemi byabo na mapoko abo, mafumo abo ne mata abo a mikanda. 14 Byo namwene’mba baji na moyo, ponkapotu naimene ne kwambila babineme+ babo ne bakalama bakibiji ne bantu bonse amba: “Kange mwibachine ne.+ Vulukai Yehoba, yenka uji na bulume bukatampe kabiji ulengesha moyo;+ mulwileko balongo benu, baana benu ba balume ne baana benu ba bakazhi, bakazhi benu ne mazubo.”

15 Balwanyi betu byo baumvwine’mba twayuka byo baubilenga ne kuba’mba Lesa wa kine wavulañanya byo balangulukilenga, atweba bonse twabwelele na kwingila ku nsakwa. 16 Kufumatu pa joja juba kuya ne kulutwe, kichika kya banabalume bo najinga nabo baingijilenga mwingilo,+ kabiji kichika kya bakwabo bajinga na mafumo, makebo, mata a mikanda, ne malaya a kyela. Kabiji babinemanga+ baimene kunyuma ya Bayudea bonse 17 bashimikilenga nsakwa. Aba batunchilenga bipe baingijilenga mwingilo na kuboko kumo, ku kuboko kukwabo saka kuji kilwilo.* 18 Kabiji ntungi yense wakashile mpoko mu lubunda wanji aku na kushimika, kabiji wa kuvumya lusengo+ waimene kwipi ne amiwa.

19 Kepo naambijile babineme ne bakalama bakibiji ne bantu bonse namba: “Mwingilo wabaya bingi, kabiji twabalañana pa nsakwa twaimena palepa na paji muntu mukwabo. 20 Inge mwaumvwa kuvuma kwa lusengo, mwafwainwa kukonkana pamo ko tuji. Lesa wetu uketulwilako.”+

21 Byonkabyo, twatwajijile kwingila kichika kikwabo saka baji na mafumo, kufumatu ku makya kufika ne tubangabanga byo twatendekele kumweka. 22 Pa kyonkakya kimye, naambijile bantu namba: “Muntu yense pamo na wa mwingilo wanji, balaale mu Yelusalema bufuku, basakwitusopanga bufuku kabiji mute basakwingilanga.” 23 Onkao mambo, amiwa, balongo bami, ba mingilo bami,+ ne bakasopa bandondejile, kechi twavuujile bivwalo byetu ne, kabiji atweba bonse twajinga na bilwilo mu maboko etu a kilujo.