Nkalata Itanshi ya kwa Petelo
2 Onkao mambo, lekai bubi bonse+ ne bujimbijimbi ne bukamfutumfutu ne kichima ne lubabo lonse. 2 Byo muji nobe baana balukeke,+ mukebenga mukaka wabula kuweluka* wa mu mambo a Lesa, kuba’mba uno mukaka emukomeshenga kufika ne ku lupulukilo,+ 3 inge mwamutompa* Nkambo amba ye wa lusa.
4 Byo mwiya kwi aye jibwe jumi bantu jo bakaine,+ bino Lesa jo asajile, janema kwi aye,+ 5 ne anweba muji nobe mabwe omi o babena kushimika kwikala nzubo ya ku mupashi,+ kuba’mba mwikale bañanga bazhila, pa kuba’mba mupanenga bitapisho bya ku mupashi+ byaitabilwa kwi Lesa kupichila mwi Yesu Kilishitu.+ 6 Mambo Kinembelo kyaamba’mba: “Talai! Amiwa mbena kwala jibwe jasalwa mu Ziona, jibwe janema ja pa jikonka ja kitendekesho, kabiji kafwako muntu nangwa umo waitabilamo ye bakalengesha bumvu ne.”+
7 Onkao mambo, jino jibwe janema bingi kwi anweba, mambo mwijitabijile; bino ku boba babula kwijitabila, “jino jibwe jo balengulwile bantungi,+ jaikala jibwe jikatampe ja pa jikonka”*+ 8 ne “jibwe ja kwituntulako kabiji jibwe ja kwibaponesheshako.”+ Babena kwituntula na mambo a kulengulula mambo a Lesa. Ino yo mpelo ibena kwibapembelela. 9 Pakuba anweba “yenu mukoka wasalwa, yenu bañanga ba bufumu, kisaka kyazhila,+ bantu baikala kya bunonshi,+ kuba’mba musapwile byawamisha* mu mapunzha onse”+ bya yewa wimwichile byo mwajinga mu mfishi amba mwiye mu kyeya kyanji kya kukumya.+ 10 Mambo kala kechi mwajinga bantu ne, pano luno mwi bantu ba Lesa;+ kala kechi bemubile lusa ne, pano luno bemubilalo.+
11 Batemwe bami, byo muji benyi kabiji bakañenda mu ino ntanda,+ nemusashijila namba muchinuzhukenga bisakasaka mibiji yenu,+ bilwa ne anweba.*+ 12 Ikalainga na byubilo byawama mu bisaka bya bantu,+ pa kuba’mba umvwe bemwambila’mba mwibanguba bibi, bemwene bene mingilo yenu yawama,+ ne kutumbijika Lesa mu juba jo akeya na kupikita.
13 Na mambo a Nkambo, nekenenainga bintu byonse byabikako* bantu,+ nangwa mfumu mwine+ mukatampe 14 nangwa bitumbafumu byo batuma kwi aye na kukabisha aba boba byatama ne kutakaika aba boba byawama.+ 15 Mambo kyaswa muchima wa Lesa ke kya kuba’mba kupichila mu kuba kyawama mukonshe kukanya* ñambilo ya kukosama ya bantu bambulwamaana.+ 16 Anweba mwi bantu bakasuluka+ kabiji kange mwingijishenga bwana bwa bene bwenu kubilamo* byatama ne,+ poso kwikala bakalume ba Lesa.+ 17 Nemekainga bantu bonse,+ saka mutemwa balongo* bonse mwaya ntanda,+ akamwainga Lesa,+ nemekainga mfumu.+
18 Bakalume banekenenenga bankambo yabo na moyo mukatampe,+ kechi bonkatu bawama ne bakooka muchima ne, bino ne boba bashinta. 19 Mambo kyo kintu kyawama umvwe muntu wachinchika mu makatazho* ne kumumanyika kya nshiji na mambo a kukeba kwikala na jiwi ja mu muchima jatoka kwi Lesa.+ 20 Nanchi muntu wakonsha kutakaikwa umvwe wachinchika pa kumanyikwa na mambo a kulenga mambo nyi?+ Bino umvwe mwachinchika lumanamo na mambo a kuba kyawama, kino kitokesha Lesa ku muchima.+
21 Kabiji ku kino ko ko mwaichilwe, mambo Kilishitu naye wimumanamijile,+ ne kwimushila mwa kulondela kuba’mba mulondelenga bulongo mu ngayo yanji.+ 22 Aye kechi walengelepo mambo ne,+ kabiji mu kanwa kanji kechi mwalupukilepo byambo bya bujimbijimbi ne.+ 23 Bantu byo bamubilenga mwenga,*+ aye kechi wibobilenga mwenga* ne.+ Byo amanaminenga,+ kechi wachinyishenga bamumanyikilenga ne, bino wipaine aye mwine ku yewa uchiba mambo mo aolokela.+ 24 Aye wasendele bundengamambo+ bwetu mu mubiji wanji pa kichi,+ kuba’mba tufwe ku bundengamambo ne kwikala bomi ku bololoke. Kabiji “mwabukilwe kupichila mu bilonda byanji.”+ 25 Mambo anweba mwajinga nobe mikooko yaya mungi,+ pano luno mwabwela kwi kafunga+ kabiji kalama wa myeo* yenu.