Kwi Filemonyi
1 Amiwa Paulo kaili+ ye bakasa na mambo a kwa Kilishitu Yesu ne Timoti+ mulongo wetu, kwi Filemonyi mutemwe kabiji mukwetu wa mwingilo, 2 ne kwi Afiya nyenga yetu, kwi Akipusa+ mushilikale mukwetu ne ku kipwilo kipwila mu nzubo yobe:+
3 Lusa lukatampe ne mutende bifuma kwi Lesa Tata wetu ne kwi Nkambo Yesu Kilishitu bikale pe anweba.
4 Namusanchila Lesa kimye kyonse byo nkutela mu milombelo yami,+ 5 byo natwajijila na kumvwa pa mambo a lwitabilo ne butemwe bo watemwa Nkambo Yesu ne bazhijikwa bonse. 6 Nalomba namba lwitabilo lobe lukulengele kuyuka bintu byonse byawama byo tuji nabyo mwi Kilishitu. 7 Mambo nasekejile bingi kabiji kyantekeneshe bingi pa kumvwa butemwe bobe, mambo obewa mulongo wami waikizhizhe michima* ya bazhijikwa.
8 Onkao mambo, nangwa kya kuba nakasuluka pa kwamba mwi Kilishitu kuba’mba nkukambizhe kuba kyawama, 9 nsakukusashijila mu butemwe, byo kiji kuba’mba amiwa Paulo nakota kala kabiji pano ke nekaili ye bakasa na mambo a kwa Kilishitu Yesu. 10 Mbena kukusashijila pa mambo a mwanami Onesimusa+ ye nasemene+ kimye kyo najinga mu kaleya.* 11 Kala aye wajinga watutu kwi obewa, pakuba luno wanema bingi kwi obewa ne amiwa. 12 Mbena kumubwezha kwi obewa, aye ye muchima wami.*
13 Nakeba namba ngikale nanji kuno kuba’mba añingijilenga byo wabulako obewa, byo nji mu kaleya na mambo a mambo awama.+ 14 Bino kechi mbena kukeba kuba kintu kwa kubula obewa kunswisha ne, pa kuba’mba mingilo yobe yawama ubule kwiingila kya kukukanjikizha, poso mo waswila obewa mwine.+ 15 Kampe o ene mambo o afumijileko pa kakimye kacheche* amba ukamubwezhe kuba’mba ukekalenga nanji kimye kyonse, 16 kechi akekale nobe muzha ne,+ akekale muntu wakila muzha kabiji mulongo wetu mutemwe,+ kikatakata kwi amiwa ne kwi obewa, ku mubiji ne mwi Nkambo. 17 Onkao mambo, umvwe amiwa ummona’mba nemulunda* nobe, umutambwile bulongo byonka byo wakonsha kuntambwila. 18 Kabiji umvwe walengele mambo kwi obewa nangwa umvwe wakongwele kintu kwi obewa, unembeko amiwa. 19 Amiwa Paulo yami nanemba na kuboko kwami: Nkakubwezhezha kyo akongwele—ne obewa wauba nobe wi nkongole yami. 20 Kine, mulongo wami nkwashe mu jizhina ja Nkambo; ngikizhe muchima* wami mwi Kilishitu.
21 Naketekela namba ukalondela bino, onkao mambo, mbena kukunembela byo nayuka’mba ukoba ne bikwabo byo nabula kutongola. 22 Kabiji ukannengezhezhe mwa kwiya kufikila, mambo naketekela namba na mambo a milombelo yenu, bakambwezha* kwi anweba.+
23 Epafalasa+ kaili mukwetu mwi Kilishitu Yesu wakwimuna, 24 kabiji Mako, Alisatakusa,+ Demasa+ ne Luka+ bakwetu ba mingilo nabo bakwimuna.
25 Lusa lukatampe lwa Nkambo yetu Yesu Kilishitu lwikale na muchima ye mumwesha.