Ku Bahebelu
13 Butemwe bwenu bwa kutemwa balongo butwajijile.+ 2 Kange muvulamenga kutambwila* benyi ne,+ mambo mu kino bamo kwa kubula kuyuka mo mo batambwijile bamalaika.+ 3 Vulukainga aba baji mu kaleya,*+ uba nobe bemukashila nabo pamo,+ kabiji vulukainga ne boba bo babena kumanyika, mambo ne anweba mukiji mu mubiji.* 4 Masongola aneme ku bonse, kabiji kange azhilululwe ne,+ mambo Lesa ukazhachisha ba bulalelale* ne bankende.+ 5 Mwikale babula kutemwa mali,+ sekelainga mu bintu byonka byo muji nabyo.+ Mambo aye waamba’mba: “Kechi nkakusha ne, kabiji kechi nkakulekelela ne.”+ 6 Kuba’mba tukose ne kwamba’mba: “Yehoba* ye nkwasho wami; kechi nakonsha kuchina ne, muntu angube ka?”+
7 Vulukainga aba bemutangijila,+ bonka bemubuujile mambo a Lesa, kabiji byo mulanguluka langulukapo pa byubilo byabo, londelainga lwitabilo lwabo.+
8 Yesu Kilishitu ujitu pamo byonka byo ajinga kesha ne lelo kabiji myaka ne myaka.
9 Kange mutwalwenga mungi na mafunjisho angi apusana pusana ne, mambo kyawama muchima kumukosesha na lusa lukatampe, kukila kumukosesha na kajo* kabula kukwasha boba bekaja.+
10 Atweba tuji na kya kusokelapo bitapisho, aba bengila mwingilo wazhila ku tente, kyo babula luusa lwa kujako.+ 11 Mambo mibiji ya banyama ba oa mashi ñanga mukatampe o atwalanga mwazhijisha kwikala mulambo wa bubi, beisokelanga pangye ya kampu.+ 12 Onkao mambo, Yesu naye wamanamijile pangye ya kampu+ kuba’mba azhijike bantu na mashi anji.+ 13 Byonkabyo, twayai tuye kwi aye pangye ya kampu saka twasenda mwenga ye bamwambijilenga,+ 14 mambo atweba kechi tuji na muzhi wa myaka ne, bino tubena kukebesha awa ukeya.+ 15 Twayai tupanenga kwi Lesa bitapisho bya kumutota+ kupichila mwi aye, ko kuba’mba, bipangwa bya byatunwa+ byetu bisolola jizhina janji patoka.+ 16 Kabiji kange muvulamenga kuba byawama ne kupapo bakwenu bintu byenu ne,+ mambo bitapisho bya uno mutundu bitokesha Lesa ku muchima.+
17 Kookelainga ne kunekenena+ babena kwimutangijila,+ mambo abo babena kwimulama anweba* kabiji baketotolwela pa mambo a kino,+ pa kuba’mba bengilenga na lusekelo kechi na bulanda ne, mambo kyakonsha kwimulengela kubula kumwenamo byawama.
18 Saka mwitulombelako, mambo twaketekela’mba tuji na jiwi ja mu muchima ja kishinka,* byo tukebesha kwikala ba kishinka mu bintu byonse.+ 19 Bino nemusashijila kikatakata namba mulombenga kuba’mba nkabwele bukiji kwi anweba.
20 Lesa wa mutende, yenka wasangwile mu bafu, kafunga mukatampe+ wa mikooko, Nkambo yetu Yesu, na mashi a lulayañano lwa myaka ne myaka, 21 emupe bintu byonse byawama bya kubilamo kyaswa muchima wanji, saka engila mwi atweba kupichila mwi Yesu Kilishitu akya kimutokesha ku muchima, kwi aye kwikale lukumo myaka ne myaka. Amena.
22 Pano balongo bami, nemusashijila namba, mutekanye pa kuteleka ku bino byambo bya lutundaiko, mambo nemunembela nkalata ipi. 23 Nakeba namba muyuke’mba mulongo wetu Timoti bamukasulula. Umvwe waiya bukiji, nkekala nanji pamo inge naiya na kwimumona.
24 Ñimwinaiko bonse babena kwimutangijila ne bazhijikwa bonse. Aba baji mu Italya+ bemwimuna.
25 Lusa lukatampe lwikale pe anweba bonse.