Ku Bena Loma
5 Onkao mambo, byo twatelwa’mba baoloka na mambo a lwitabilo,+ twayai twikalenga mu mutende* ne Lesa monka mwi Nkambo yetu Yesu Kilishitu,+ 2 na mambo a kumwitabila, jishinda jitushinkukila ja kubilwa lusa lukatampe lwa Lesa lo tubena kubilwa lonka luno;+ twayai tusekelenga* na mambo a luketekelo lwaimena pa lukumo lwa Lesa. 3 Kechi mu kino kyonkatu ne, bino twayai tusekelenga* ne mu bya malwa,+ mambo twayuka’mba bya malwa bitulengela kuchinchika;+ 4 kuchinchika nako kwitulengela kwitabilwa kwi Lesa;+ kwitabilwa kwi Lesa nako kwitulengela kwikala na luketekelo,+ 5 kabiji luketekelo kechi luleta bumvu ne;+ mambo butemwe bwa Lesa bebuyuzha mu michima yetu na mupashi wazhila, ye betupele.+
6 Mambo byo twakijinga babula kukosa,+ Kilishitu wafwijile bantu babula kwakamwa Lesa pa kimye kyatongwelwe. 7 Mambo kechi kyapela muntu kufwila waoloka ne; pakuba muntu wawama, kampe umo wakonsha kwipana kumufwila. 8 Bino Lesa witumwesha butemwe bwanji, mambo byo twakijinga bandengamambo, Kilishitu witufwijile.+ 9 Onkao mambo, byo twatelwa’mba twaoloka na mambo a mashi a kwa Kilishitu,+ tukapulukila mwi aye ku bukaji bwa Lesa.+ 10 Mambo umvwe byo twakijinga balwanyi twapwaine ne Lesa kupichila mu lufu lwa Mwananji,+ pano byo twapwana, kine tukapulukila mu bumi bwa Mwananji. 11 Kechi mu kino kyonkatu ne, bino tubena kusekela ne mwi Lesa kupichila mwi Nkambo yetu Yesu Kilishitu, mwi aye mo mo twapwaina ne Lesa.+
12 Onkao mambo, byonkatu bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo,+ byonkabyo lufu lwakumbene ku bantu bonse mambo bonse balengele mambo+—. 13 Mambo bundengamambo bwajinga pano pa ntanda Mizhilo saka ikyangye kwikalako, bino kafwako muntu ye bazhachisha na bundengamambo pabula mizhilo ne.+ 14 Nangwa byonkabyo, lufu lwalaminenga nobe mfumu kufumatu kwi Adama kufika ne kwi Mosesa, nangwatu ku boba babujile kulenga mambo byonkatu Adama byo alengele mambo, wajinga kipasha kya yewa waketekejilwe kwiya.+
15 Bino bupe kechi buji nobe mizhilulwila ne. Mambo umvwe na mambo a mizhilulwila ya muntu umo bavula bafwile, ko kuba’mba lusa lukatampe lwa Lesa ne bupe bwanji bwakumbene ku bantu bonse kupichila mu lusa lukatampe lwa muntu umo,+ aye Yesu Kilishitu.+ 16 Kabiji buno bupe bwapusana na bundengamambo bwalengele muntu umo.+ Mambo muzhilulwila wa muntu umo waletele luzhachisho,+ bino bupe bwaishile na mambo a mizhilulwila yavula, bwalengejile bavula kutelwa’mba baoloka.+ 17 Mambo inge kya kuba na mambo a mizhilulwila ya muntu umo, lufu lwalaminenga nobe mfumu na mambo a uno muntu,+ ko kuba’mba aba bakatambula lusa lukatampe ne bupe bwa bololoke+ bakalama nobe bamfumu+ mu bumi kupichila mu muntu umo, aye Yesu Kilishitu!+
18 Onkao mambo, byonkatu muzhilulwila wa muntu umo byo alengela bantu bonse kuzhatwa,+ ne mu bololoke bwa muntu umo bantu bonse+ batelwa’mba baoloka kuba’mba bekale na bumi.+ 19 Mambo byonkatu kubula kukookela kwa muntu umo byo kwalengela bavula kwikala bandengamambo,+ ne mu lukookelo lwa muntu umo bavula bakekala baoloka.+ 20 Mizhilo yaishileko kuba’mba mizhilulwila ivule.+ Bino bantu byo balengele mambo avula, lusa lukatampe nalo lwavujijileko. 21 Mambo ka? Kuba’mba byonka bundengamambo byo bwalaminenga nobe mfumu pamo ne lufu,+ ne lusa lukatampe lwa Lesa nalo lulama nobe mfumu mu bololoke ne kutangijila bantu ku bumi bwa myaka ne myaka mwi Yesu Kilishitu Nkambo yetu.+