Ku Bena Efisesa
2 Kabiji Lesa wimusangwile kwikala bomi nangwa kya kuba mwafwile mu mizhilulwila yenu ne mu mambo enu,+ 2 mo mwaendelenga kimye kimo monka mwayila buno bwikalo bwa pano pa ntanda,+ monka mwayila mfumu wa luusa lwa mwela,+ ye mupashi+ ubena kwingila mu bantu babula kukookela. 3 Mwi abo ne atweba kimye kimo twaikelanga monka mwayila bisakasaka mubiji wetu,+ kuba bintu bikeba mubiji wetu ne milanguluko yetu,+ kabiji kufumatu pa kusemwa kwetu twajinga bafwainwa bukaji bwa Lesa+ byonka bijitu ne bantu bakwabo. 4 Bino Lesa byo aji na lusa lwavula+ ne butemwe bwanji bukatampe bo etutemenwe,+ 5 witusangwile kwikala bomi pamo ne Kilishitu nangwa kya kuba twafwile mu mizhilulwila yetu,+ bino bemupulusha na mambo a lusa lukatampe lwa Lesa. 6 Kabiji witusangwile pamo ne aye ne kwitwikazha pamo ne Kilishitu Yesu mu mapunzha a mwiulu,+ 7 pa kuba’mba mu bwikalo* bukeya akamweshe kuvula kwa lusa lwanji lukatampe kupichila mu bibusa byanji byo etubila atweba tuji mwi Kilishitu Yesu.
8 Kupichila mu luno lusa lukatampe bemupulusha na mambo a lwitabilo,+ kechi mwapuluka na mambo a kukeba kwenu ne; bino ke bupetu bwa Lesa. 9 Kabiji kechi na mambo a mingilo yenu ne,+ pa kuba’mba muntu nangwa umo abule mwa kwitotela. 10 Twi mingilo* ya maboko a Lesa kabiji witulengele+ mwi Kilishitu Yesu+ kuba’mba twingilenga mingilo yawama, Lesa yo afuukwijile jimo kuba’mba twendenga monka.
11 Onkao mambo, vulukai’mba ne anweba pa kimye kimo mwajinga bantu ba mu bisaka bya bantu ku mubiji, bo batelanga’mba “babula kuya ku mukanda” ku boba batelwa’mba “ba mukanda,” yenka waubilwe ku mubiji na maboko a bantu. 12 Pa kyokya kimye kechi mwamuyukile Kilishitu ne, mwajinga bangi mu kisaka kya bena Isalela, benyi ku lulayañano lwa mulaye;+ kechi mwajinga na luketekelo ne, kabiji kechi mwamuyukile Lesa pano pa ntanda ne.+ 13 Anweba mwajinga kwalepa ne Lesa, pano luno muji mwi Kilishitu Yesu kabiji bemufwenyesha kwipi ne Lesa na mambo a mashi a Kilishitu. 14 Mambo aye wituletela mutende,+ wapwanya mabumba abiji kwikala ke jimo+ ne kukundula lubumbulu wajinga pakachi kabo.+ 15 Kupichila mu mubiji wanji wafumishepo bulwanyi, Mizhilo yajinga na mikambizho ne byatongolwa kuba’mba alenge mabumba abiji aji mwi aye kwikala ke muntu umo mupya+ ne kuleta mutende, 16 ne kupwanya ano mabumba abiji ne Lesa kwikala mubiji umo kupichila mu kichi* kya lumanamo,+ mambo aye mwine ye wafumyapo bulwanyi.+ 17 Kabiji waishile kwi anweba mwajinga kwalepa ne Lesa ne ku boba bajinga kwipi ne Lesa ne kwimusapwila mambo awama a mutende, 18 mambo kupichila mwi aye, atweba bonse mabumba abiji twakasuluka kumusolomoka Tata kupichila mu mupashi umo.
19 Byonkabyo, kechi mukiji bangi nangwa benyi ne,+ bino ne anweba mwi bangikazhi+ pamo na bakwenu bazhijikwa kabiji mwi ba mu nzubo ya Lesa,+ 20 kabiji bemushimika pa kitendekesho kya batumwa ne bangauzhi,+ ne Kilishitu Yesu ye jibwe ja pa jikonka ja kitendekesho.+ 21 Monka mwi aye, kishimikwa kyonse kibena kunungakana pamo,+ kabiji kibena kukoma kwikala ke nzubo yazhila ya Yehoba.*+ 22 Monka mwi aye ne anweba mo mo babena kwimushimikila kuba’mba mwikale ke kya kwikalamo Lesa kupichila mu mupashi.+