Ku Bena Loma
15 Atweba twakosa twafwainwa kukwasha boba bakooka mu kubula kukosa kwabo,+ kabiji kechi kwitokeshatu ku muchima atweba bene ne.+ 2 Atweba bonse tutokeshenga bakwetu ku muchima kupichila mu kwibobila byawama bya kwibakomesha.+ 3 Mambo ne Kilishitu kechi witokeshenga mwine ku muchima ne,+ bino byonkatu byo kyanembwa’mba: “Mwenga wa boba bemwambila mwenga wamfikila.”+ 4 Mambo bintu byonse byanembelwe kala bebinembele’mba tufunjileko,+ kuba’mba mu kuchinchika kwetu+ ne mu lutekenesho lwa mu Binembelo twikale na luketekelo.+ 5 Onkao mambo, Lesa witulengela kuchinchika kabiji witutekenesha, emukwashe kwikala na muchima wajingapo na Kilishitu Yesu, 6 kuba’mba bonse mukwatankane+ pamo kabiji na jiwi* jimo, mumutumbijike Lesa Shanji Nkambo yetu Yesu Kilishitu.
7 Onkao mambo, itambwilainga* anwe bene na bene,+ byonkatu Kilishitu byo etutambwijile+ mu kumuletela lukumo Lesa. 8 Mambo nemubuula namba Kilishitu waikele ke wa mwingilo wa boba ba mukanda+ na mambo a bukine bwa Lesa, kuba’mba afikizhe milaye Lesa yo alayile bashakulu babo,+ 9 ne kuba’mba bisaka bya bantu bimutumbijike Lesa na mambo a lusa lwanji.+ Byonkatu byo kyanembwa’mba: “O ene mambo o nkemutumbijikila mu bisaka bya bantu kabiji nkemba nyimbo ya kutota jizhina jenu.”+ 10 Kabiji waamba jikwabo amba: “Anweba bisaka bya bantu, sangalelai pamo na bantu banji.”+ 11 Kabiji amba: “Mutotai Yehoba,* anweba bisaka bya bantu, ne mitundu ya bantu yonse imutote.”+ 12 Ne Isaya naye waambile’mba: “Kukekala muzhazhi wa kwa Yese+ ukeya na kulama bisaka bya bantu;+ mwi aye bisaka bya bantu mo mo bikaketekela.”+ 13 Lesa upana luketekelo emuyuzhe na lusekelo ne mutende na mambo a kumuketekela, kuba’mba luketekelo lwenu lubaye na bulume bwa mupashi wazhila.+
14 Amiwa nashiinwa pe anweba balongo bami namba, ne anweba mwayula na buwame bonse, byonkatu byo mwayula na maana onse, ne kuba’mba mubena kwifunjisha anwe bene na bene. 15 Nangwa byonkabyo, nemunembela kwa kubula kwimufya pa bishinka bimo, kuba’mba nemuvululeko na mambo a lusa lukatampe Lesa lo angubila, 16 pa kuba’mba ngikale kalume wa Kilishitu Yesu wa kwingijila bisaka bya bantu.+ Mbena kwingila mwingilo wazhila wa mambo awama a Lesa,+ kuba’mba bino bisaka bya bantu bikale ke mulambo waitabilwa, wazhijikwa na mupashi wazhila.
17 Onkao mambo, nji na bishinka bya kusekela mwi Kilishitu Yesu pa mambo a bintu bya Lesa. 18 Mambo kechi nsakwamba pa kintu kikwabo ne, kanatu abya bintu Kilishitu byo auba kupichila mwi amiwa kuba’mba bisaka bya bantu bikookele na mambo a byambo byami ne mingilo yami, 19 na biyukilo ne bya kukumya*+ ne na bulume bwa mupashi wa Lesa, kuba’mba nsapwile bulongo mambo awama aamba pe Kilishitu kufuma ku Yelusalema kuzhokoloka kukafikatu ne ku Ililikuma.+ 20 Na mambo a kino, nakebeshe bingi kubula kusapwila mambo awama ku mapunzha ko bamuyukile kala Kilishitu, kuba’mba mbule kushimika pa kitendekesho kya muntu mukwabo; 21 bino, byonkatu byo kyanembwa’mba: “Aba babujile kumvwa nkuwa yanji bakamona, kabiji aba babula kumvwa, bakomvwisha bulongo.”+
22 O ene mambo, bimye byavula o bankainyenga kwiya ko muji. 23 Bino kafwako nyaunda yo nabula kusapwilamo mu ano mapunzha ne, mambo pa myaka yavula* nakebeshanga bingi kwiya ko muji. 24 Onkao mambo, naketekela kuba’mba byo nkayanga ku Sipaina, nkeya na kwimumona, mukanshinjikinye ne kunshinjikinyako byo nkekalako nenu pa kakimye kacheche. 25 Bino katatakatu nkaye ku Yelusalema na kwingijila bazhijikwa.+ 26 Mambo aba baji mu Makedonya ne mu Akaya kibatokele ku muchima kupana bya bupe bya kukwasha bayanji baji mu bazhijikwa mu Yelusalema.+ 27 Ibyo, batemenwe bingi kuba kino kabiji kine bajinga na nkongole kwi abo; mambo umvwe bazhijikwa bapapo ba mu bisaka bya bantu bintu bifuma kwi Lesa, ko kuba’mba ba mu bisaka bya bantu nabo bafwainwa kukwasha bazhijikwa na bintu bya ku mubiji.+ 28 Onkao mambo, byo nkapwisha uno mwingilo ne kwibapa bya bupe,* po po nkapita kwenu pa kuya ku Sipaina. 29 Kabiji byo nkeya kwi anweba, nkemuletela mapesho avula kufuma kwi Kilishitu.
30 Balongo bami, mbena kwimukambizha mwi Nkambo yetu Yesu Kilishitu ne mu butemwe bwiya na mambo a mupashi namba, mwibikisheko pamo ne amiwa mu milombelo yo mundombelako kwi Lesa,+ 31 pa kuba’mba nkapokololwe+ ku bantu babula kwitabila baji mu Yudea ne kuba’mba mwingilo wami wa kwingijila baji mu Yelusalema aketabilwe ku bazhijikwa,+ 32 pa kuba’mba kupichila mu kyaswa muchima wa Lesa nkeye ko muji na lusekelo ne kukokolokela pamo nenu. 33 Lesa upana mutende ekale ne anweba bonse.+ Amena.