Ku Bena Tesalonika
2 Balongo bami, kine mwayuka’mba kechi twimupempwile kyatutu ne.+ 2 Nangwa kya kuba twamanamine patanshi ne kwituba byatama bya bumvu mu Filipai,+ byonkatu byo mwayuka, twachinchikile* na mambo a Lesa kuba’mba twimubuule mambo awama a Lesa+ nangwa kya kuba bantu bavula betukainyenga.* 3 Mambo kutundaika ko twimutundaika kechi kwaimena pa milanguluko ya bubela nangwa pa milanguluko yatama nangwa ya bujimbijimbi ne, 4 pakuba monka mo twaitabilwa kwi Lesa kwitupa mambo awama, kechi twamba bintu bitokesha bantu ku muchima ne, kana bitokesha Lesa yenka upimapima michima yetu.+
5 Kabiji mwayuka’mba kechi twaambilenga byambo bya mulambisha nangwa kwibepekezha na milanguluko ya lwiso ne;+ Lesa ye kamonyi wetu! 6 Kabiji kechi twakebelepo lukumo kufuma ku bantu, kwi anweba nangwa ku bantu bakwabo ne, nangwa kya kuba twakonsheshe kwimwambila kwitupotela bintu bya kwitukwasha byo tuji batumwa ba kwa Kilishitu.+ 7 Bino twimulaminenga bulongo byonka mwanamukazhi byo alama* na kifyele baana banji bo amisha. 8 Onkao mambo, byo twimutemwishe, kechi twakebeshetu* kwimubuula mambo awama a Lesa onkatu ne, bino twipaine ne atweba* bene,+ mambo twimutemenwe bingi.+
9 Kine balongo bami, mwavuluka mingilo yetu yakosa ne kwibikishako kwetu. Twaingijilenga bufuku ne mute kuba’mba tubule kukatazhapo muntu nangwa umo mwi anweba,+ kimye kyo twimusapwijilenga mambo awama a Lesa. 10 Anweba mwi bakamonyi ne Lesa pamo, bayuka byo twajinga ba kishinka, baoloka ne babula kaneneno kwi anweba baitabila. 11 Mwayukishatu bulongo byo twimutundaikilenga ne kwimutekenesha ne kwimukambizha pa muntu pa muntu+ byonka shabo+ byo oba na baana banji, 12 kuba’mba mwendenga monka mukebela Lesa,+ yenka ubena kwimwita ku Bufumu bwanji+ ne mu lukumo.+
13 Kine, o ene mambo o tusanchila Lesa kwa kubula kuzhikilwa,+ mambo byo mwatambwile mambo a Lesa, o mwaumvwine kwi atweba, kechi mwiatambwile nobe byambo bya bantu ne, poso byonka byo aji kine mambo a Lesa, abena kwingila mwi anweba baitabila. 14 Mambo anweba balongo bami, mwalondejilenga bipwilo bya Lesa bya mwi Kilishitu Yesu biji mu Yudea, mambo ne anweba bemumanyikilenga pa bintutu bimo ku bakwenu ba mu kyalo kyenu+ byonka byo babena kumanyika balongo ba mu Yudea ku Bayudea, 15 bonka baipayile Nkambo Yesu+ ne bangauzhi ne kwitumanyika.+ Kabiji kechi babena kutokesha Lesa ku muchima ne, bino bashikwa kintu kilengela bantu kumwenamo bintu byawama, 16 byo babena kukeba kwitukanya kwamba ku bantu ba mu bisaka bya bantu kuba’mba nabo bakapuluke.+ Byo babena kuba bino, babena kulenga mambo avula bingi. Bino bukaji bwa Lesa bwibafikila.+
17 Balongo bami, byo twaabene ne anweba pa kakimye kacheche (ku mubiji kechi mu michima yetu ne) na mambo a kukebesha kwetu, twaingijile bingi na ngovu kuba’mba twimumone.* 18 Na mambo a kino, twakebelenga kwiya ko muji, kine amiwa Paulo nakebele kwiya ko muji, kechi jimotu ne, bino jibiji; pano bino, Satana witushinkijile jishinda. 19 Nga luketekelo, lusekelo ne munchinya wetu wa kwitotelamo kwi Nkambo yetu Yesu mu kimye kya kwikalapo kwanji ye wepi? Nanchi kechi anweba nenyi?+ 20 Kine, anweba yenu lukumo ne lusekelo lwetu.