Ku Bena Efisesa
5 Onkao mambo, londelainga Lesa+ byo muji baana bo atemwa, 2 kabiji endainga mu butemwe,+ byonka Kilishitu byo etutemenwe atweba*+ ne kwipana mwine na mambo a atweba* kwikala ke mulambo ne kitapisho kya bwema bwawama kwi Lesa.+
3 Byo muji bakalume ba Lesa, kange mwambenga pa bulalelale* ne pa bubipisho bonse nangwa pa lwiso mo muji ne;+ 4 nangwa kwamba pa byubilo bya bunya nangwa ñambilo yatama nangwa kusengula kubi ne+—bintu byabula kufwainwa—bino kana kusanchila Lesa.+ 5 Mambo mwayukishatu bulongo kino anwe bene amba, kafwako muntu uba bulalelale*+ nangwa watama nangwa wa lunkumbwa,+ ko kuba’mba upopwela bankishi ukaswana Bufumu bwa Kilishitu ne bwa Lesa ne.+
6 Kange muleke muntu nangwa umo emujimbaike na byambo byatutu ne, mambo na mambo a byonka bino bintu bukaji bwa Lesa bubena kwiya pa bantu babula kukookela. 7 Onkao mambo, kange mupwanañanenga nabo ne; 8 mambo kala mwajinga mfishi, pakuba luno mwi kyeya+ monka mwi Nkambo.+ Endainga nobe baana ba kyeya, 9 mambo bipangwa bya kyeya biji na buwame bonse, bololoke ne bukine.+ 10 Yukainga kintu kimutokesha Nkambo ku muchima;+ 11 Kabiji mwikileke kwingila mingilo yatu ya mu mfishi;+ bino isololainga patoka. 12 Mambo bintu byo boba mu bufyamfya byo bya bumvu pa kwibitela. 13 Bintu byonse byo basolola* bebimwesha patoka ku kyeya, byonkabyo byonse byasololwa patoka, byaaluka ke kyeya. 14 Onkao mambo, kyaambiwa’mba: “Buuka obewa walaala, ne kusanguka+ mu bafu kabiji Kilishitu ukakusamina.”+
15 Byonkabyo, monainga bulongo byo mwenda, kechi mwendenga nobe bantu babula maana ne, poso nobe bantu ba maana, 16 saka mwingijisha kimye* kyenu bulongo+ mambo ano moba atama. 17 Na mambo a kino, kilekai kwikala babula maana, bino yukainga kyaswa muchima wa Yehoba.*+ 18 Kabiji kange mupendwenga binyu ne,+ mambo bilengela kwikala bwikalo buncha, bino yulainga mupashi. 19 Saka mwisamba anwe bene na bene* mu masalamo, kwimba nyimbo ya kutota Lesa, ne nyimbo ya ku mupashi, kwimba+ ne kuba kimenge na nyimbo+ mu michima yenu kwi Yehoba,*+ 20 kimye kyonse saka mumusanchila Lesa wetu+ Tata pa bintu byonse kupichila mu jizhina ja Nkambo yetu Yesu Kilishitu.+
21 Inekenenainga anwe bene na bene+ na mambo a kwakamwa Kilishitu. 22 Banabakazhi banekenenenga bamwatawabo+ byonka byo banekenena Nkambo, 23 mambo mulume ye mutwe wa mukazhanji+ byonkatu Kilishitu byo aji mutwe wa kipwilo,+ byo aji mupulushi wa uno mubiji. 24 Kabiji byonkatu kipwilo byo kinekenena Kilishitu, banabakazhi nabo bafwainwa kunekenenanga bamwatawabo mu bintu byonse. 25 Anweba banabalume, temwainga bakazhi benu,+ byonkatu ne Kilishitu byo atemenwe kipwilo ne kwipana mwine na mambo a akyo,+ 26 kuba’mba ekizhijike ne kwikitokesha pa kwikyovwa na mema kupichila mu mambo a Lesa,+ 27 pa kuba’mba kipwilo kikale kya lukumo kwi aye, kyabula jintomya nangwa bulema nangwa bintu bikwabo bya byonka bino,+ bino kyafwainwa kwikala kyazhila kabiji kyabula kaneneno.+
28 Ne banabalume nabo byo byo bafwainwa kutemwa bakazhi babo byonka byo batemwa mibiji yabo. Mwanamulume watemwa mukazhanji witemwa ne aye mwine, 29 mambo kafwako muntu nangwa umo ushikwa mubiji wanji ne, bino umujiisha ne kumulama bulongo byonkatu Kilishitu byo alama kipwilo, 30 mambo atweba twi binungwa bya mubiji wanji.+ 31 “Na mambo a kino, mwanamulume ukasha bashanji ne bainanji ne kulamachila* ku mukazhanji ne bano babiji bakekala ke mubiji umo.”+ 32 Kino kyafyamika kyazhila+ kyanema bingi. Pano mbena kwamba pe Kilishitu ne kipwilo.+ 33 Nangwa byonkabyo, muntu yense wafwainwa kutemwa mukazhanji+ byonka byo etemwa aye mwine; kabiji mwanamukazhi naye wafwainwa kwikala na mushingi mukatampe ku mwatawanji.+