Buku Mutanshi wa Bamfumu

7 Solomone washimikile nzubo yanji pa myaka 13, kufikatu ne nzubo* yanji+ yonse byo yapwile.+

2 Kabiji washimikile nzubo yatelwanga’mba Nzubo ya Jisaka ja ku Lebanoni,+ mu bula yajinga makyubichi 100,* mu bwipi makyubichi 50 ne mu kimino makyubichi 30 pa mikuku ina ya mashiki a bichi bya sida; kabiji peulu ya mashiki pajinga myamba ya bichi bya sida.+ 3 Beivwetele peulu na mapulanga a bichi bya sida ajinga peulu ya myamba ya byela yajinga pa mashiki; mashiki ajinga 45, mu mukuku umo mwajinga 15. 4 Kwajinga mikuku isatu ya bipenze byajinga na mafulemu, bipenze byonse byatalañene na bikwabo mu mikuku yonse isatu. 5 Bibelo byonse ne myamba ya pa bibelo byaesakene* monse monse, byonka byajinga bipenze byatalañene mu mikuku yonse isatu.

6 Kabiji washimikile Nzubo Ikatampe ya Mashiki yalepele mu bula makyubichi 50 ne mu bwipi makyubichi 30, kabiji kulutwe yayo kwajinga kibamba kya pa kibelo kyajinga na mashiki ne kamusemi.

7 Washimikile ne Nzubo Ikatampe ya Jitanda,+ mwa kuchibila mambo—Nzubo Ikatampe ya Kije+—kabiji beilamikile mapulanga a kichi kya sida kufumatu panshi kufika ne mu myamba.

8 Nzubo* yo aikalangamo yajinga mu kipango kikwabo,+ kechi wiilamankenye na Nzubo Ikatampe ne, kabiji beishimikile mutundutu umo. Kabiji Solomone washimikijile mwana wa kwa Felo ye asongwele nzubo ya mutundu umo na ino Nzubo Ikatampe.+

9 Bino byonse bebishimikile na mabwe a buneme+ o basongele monka mwayijile kipimo, o bachibile na baso ba mabwe, mukachi ne pangye, kutendekelatu ku kitendekesho kufika ne peulu, ne pangye kukafika ne ku kipango kikatampe.+ 10 Kabiji kitendekesho bekyajile na mabwe akatampe, a buneme; mabwe amo ajinga makyubichi jikumi ne akwabo, ajinga makyubichi atanu na asatu. 11 Kabiji peulu yao pajinga mabwe a buneme, o basongele monka mwayijile kipimo, pamo na bichi bya sida. 12 Kuzhokoloka kipango kikatampe kwajinga lubumbulu wa mikuku isatu ya mabwe a kusonga ne mukuku umo wa myamba ya kichi kya sida, byonka byajinga kipango kya mukachi+ kya nzubo ya Yehoba ne kibamba kya ku kibelo kya nzubo.+

13 Mfumu Solomone watumine ba kuya na kwita Hilama+ ne kumuleta kufuma ku Tila. 14 Wajinga mwana wa mwanamukazhi wafwilwa wa mu mukoka wa kwa Nafitali, kabiji shanji wajinga mwina Tila sendwe wa mukuba;+ Hilama wajinga sendwe, wajinga na milangwe+ kabiji wayukile bingi mingilo yonse ya mukuba.* Waishile kwi Mfumu Solomone ne kwingila mingilo yonse yo bamupele.

15 Walengele mashiki abiji a mukuba;+ mashiki onse ajinga makyubichi 18 mu kimino, kabiji pa kupima jishiki* jimo kwijizhokoloka, baingijishenga lutambo wa kupiminako walepele makyubichi 12.+ 16 Kabiji walengele mitwe ibiji ya mukuba ya kubika kwiulu ya mashiki. Mutwe umo wajinga makyubichi atanu mu kimino, ne mukwabo wajinga makyubichi atanu mu kimino. 17 Ino mitwe yajinga kwiulu ya mashiki yajinga na makonde ajinga na minyololo ya maluba;+ mutwe umo wajinga na makonde atanu na abiji ne mukwabo wajinga na makonde atanu na abiji. 18 Kabiji walengele mikuku ibiji ya mapomegulanchi kuzhokoloka makonde a kuvweta mitwe yajinga kwiulu ya mashiki; waubile kintutu kimo ku mitwe yonse ibiji. 19 Mitwe yajinga kwiulu ya mashiki ajinga ku kibamba kya pa kibelo ajinga na maluba alepele makyubichi ana mu kimino. 20 Mitwe yajinga kwiulu ya mashiki abiji, beizhokolokele ku makonde; kabiji kwajinga mapomegulanchi 200 ajinga mu mikuku kuzhokoloka mutwe umo.+

21 Waimikile mashiki ku kibamba kya pa kibelo kya nzubo ya Lesa.+ Waimikile jishiki ja ku kilujo,* ne kwijitumba’mba Yakina,* kabiji waimikile ne jishiki ja ku kipiko* ne kwijitumba’mba Boaza.*+ 22 Kabiji kwiulu ya mashiki kwajinga maluba. Byonkabyo, wapwishishe kulenga mashiki.

23 Kepo alengele Kizhiba* kya kyela.+ Kyajinga kya kizhingu, kufuma bushiya ne bushiya bwa muvumbo pajinga makyubichi jikumi, mu kimino kyajinga makyubichi atanu, kabiji pa kupima mo kyazhokolokela,* baingijishe lutambo wa kupiminako walepele makyubichi 30.+ 24 Kabiji kwajinga bintu byapasha bainamunwa+ kunshi ya muvumbo wakyo, byazhokolokeleko, byajinga jikumi mu kyubichi umo kuzhokoloka Kizhiba, ne mikuku ibiji ya bainamunwa yo balengejileko. 25 Bekitentekele pa bañombe 12,+ basatu batajile ku kabeta ka ku buyeke, bakwabo basatu batajile ku muzhika, ne bakwabo basatu batajile ku kabeta ka ku bulenge, kabiji bakwabo basatu batajile ku musela; ne Kizhiba bekitentekele pa bañombe, kabiji bya matako byabo byonse byajinga na pakachi ka Kizhiba. 26 Mujita wakyo wajinga nobe mu bwipi bwa kuboko;* ne muvumbo wakyo wajinga nobe muvumbo wa kapu, nobe jiluba jakenuka. Kyatwezhanga mabbafi* a mema 2,000.

27 Kabiji walengele bikochikala bya mukuba jikumi.+ Kikochikala kimo kyajinga makyubichi ana mu bula, makyubichi ana mu bwipi ne makyubichi asatu mu kimino. 28 Kabiji bino byo byo balengele bikochikala: Ku mbaji byajinga bya malata, kabiji malata a ku mbaji ajinga mu mafulemu. 29 Kabiji pa malata ajinga mu mafulemu balengejilepo mabokwe,+ bañombe, ne bakelubi,+ kabiji byonka bino byo byajinga ne ku mafulemu. Peulu ne panshi ya mabokwe ne bañombe pajinga maluba azenzumuka. 30 Bikochikala byonse byajinga na bitanga bya mukuba bina ne misomali ya mukuba, kabiji makonka akyo ana o a kwachile misomali. Munshi ya shomeka mwajinga byela biikwachile, byajinga na maluba ku mbaji konse. 31 Kanwa kakyo kufuma panshi kufika kwiulu kajinga kyubichi umo; kabiji kajinga kazhinguluka, ne kitako kyakyo kyajinga kyubichi umo ne kichika, kabiji ku kanwa kakyo banembeleko kya kukololola. Kabiji malata a kwapela ajinga a makonka aesakana, kechi ajinga anzhingwile ne. 32 Munshi ya malata a kwapela, mwajinga bitanga bina, kabiji byela bya kwachile bitanga byalamachile ku kikochikala, kabiji kitanga kimo mu kimino kyajinga kyubichi umo ne kichika. 33 Bitanga bebilengele nobe bitanga bya ku kalaki. Byela byo byakwachile bitanga, bingelengele, mashipoko ne maabbu byonse byajinga bya kyela. 34 Ku makonka ana a kikochikala kimo kwajinga byela byakwachile bitanga bina; kabiji bino byela byakwachile bitanga bebilengejile konka ku kikochikala. 35 Peulu ya kikochikala pajinga kintu kyazhinguluka kyajinga kichika kya kyubichi, kabiji peulu ya kikochikala pajinga mafulemu ne malata a kunsa byo balengejile konka. 36 Pa mafulemu ne pa malata a kwapela walengejilepo bakelubi, mabokwe ne maluba konse konse ne bisonga kwesakana na tupunzha twashajilepo.+ 37 Abino byo byo alengele bikochikala jikumi;+ byonse wibilengele bya kyela, kipimo kimotu ne mutundu umotu.+

38 Walengele mashomeka a mukuba jikumi;+ shomeka umo watwezhanga mabbafi a mema 40. Shomeka umo wajinga makyubichi ana.* Bikochikala jikumi byajinga na shomeka umo umo. 39 Kepo abikile bikochikala bitanu ku kilujo kya nzubo ne bikochikala bitanu ku kipiko kya nzubo, kabiji wabikile Kizhiba ku kilujo kya nzubo ku kabeta ka ku bulenge na ku musela.+

40 Kabiji Hilama+ walengele mashomeka ne mafosholo+ ne masanyi afukumana.+ Byonkabyo, Hilama wapwishishe kwingila mingilo yonse ya Mfumu Solomone ya ku nzubo ya Yehoba:+ 41 mashiki abiji+ ne mitwe yapasha masanyi afukumana yajinga kwiulu ya mashiki abiji; makonde abiji+ avwetele mitwe ibiji yapasha masanyi afukumana yajinga kwiulu ya mashiki; 42 mapomegulanchi 400+ a ku makonde abiji, mikuku ibiji ya mapomegulanchi ku bukonde bumo, a kuvweta ku mitwe ibiji yapasha masanyi afukumana yajinga kwiulu ya mashiki abiji; 43 bikochikala jikumi+ ne mashomeka jikumi+ ajinga pa bikochikala; 44 Kizhiba+ ne bañombe 12 po batentekele Kizhiba; 45 ne bikopo, mafosholo, masanyi afukumana, ne bipe byonse, Hilama byo alengele bya mukuba ye batubwile bulongo bya Mfumu Solomone bya ku nzubo ya Yehoba. 46 Mfumu wibilengejile mu bikombola bya buchimba mu nkambi ya Yodano, pakachi ka Sukota ne Zaletana.

47 Bipe byonse Solomone kechi wibipimine ne, mambo byavujile bingi. Kinemenezhi kya mukuba kechi kyayukanyikilwe ne.+ 48 Solomone walengele bipe byonse bya ku nzubo ya Yehoba: kya kusokelapo bitapisho+ kya ngolode; tebulu wa ngolode+ pa kubika bashinkwa ba kupana kwi Lesa; 49 bya kutulapo malampi+ bya ngolode yawamisha, bitanu ku kilujo ne bitanu ku kipiko kulutwe ya kibamba kya mwine mukachi; ne maluba,+ ne malampi, ne tubimano, byonse byajinga bya ngolode;+ 50 mashomeka, bya kuzhimyako mujilo,+ masanyi afukumana, makapu,+ bya kwapwilapo mujilo,+ byajinga bya ngolode yawama; ne mainchezi a binzhilo bya ku kibamba kya mwine mukachi,+ ko kuba’mba Mwazhijisha, ne a binzhilo bya ku nzubo ya Lesa,+ byajinga bya ngolode.

51 Byonkabyo, Mfumu Solomone wapwishishe mingilo yonse ya ku nzubo ya Yehoba. Kepo Solomone aletele bintu byazhijikile Davida shanji,+ ne kubika siliva, ngolode ne bipe mwa kulamina bya buneme mu nzubo ya Yehoba.+