Buku Mutanshi wa Bamfumu

9 Solomone byo apwishishetu kushimika nzubo ya Yehoba, ne nzubo* ya mfumu,+ ne bintu byonse Solomone byo akebelenga kulenga,+ 2 Yehoba wamwekele kwi Solomone ja bubiji, byonkatu byo amwekele kwi aye mu Gibeona.+ 3 Yehoba wamwambijile’mba: “Naumvwa lulombelo lobe ne misashijilo yobe, yo walomba kwi amiwa. Neizhijika ino nzubo yo washimika kabiji neinemeka kupichila mu kubikamo jizhina jami kikupu,+ kabiji meso ami ne muchima wami bikekala monka kimye kyonse.+ 4 Kabiji obewa inge ukendenga ku meso ami byonka byaendelenga shobe Davida,+ na muchima yense+ ne mu bololoke,+ kupichila mu kuba bintu byonse byo nakukambizha,+ kabiji inge ukakookelenga malamuna ami ne mizhilo yami,+ 5 nkekajika jitanda ja bufumu bobe pa bena Isalela myaka ne myaka, byonkatu byo nalayile Davida shobe namba, ‘Mu kisemi kyobe kechi mukabula muntu wa kwikala pa jitanda ja bena Isalela ne.’+ 6 Pakuba obewa ne baana bobe inge mukaleke kundondela ne kuleka kulama mikambizho yami ne malamuna ami o nemupa, ne kuya na kwingijila balesa bangi ne kwibafukamina,+ 7 nkebafumyamo bena Isalela mu kyalo kyo nebapa,+ ne nzubo yo nazhijikila jizhina jami nkeikana,+ kabiji bena Isalela bakebasekanga* ne kwibendeleka ku bantu bonse.+ 8 Kabiji ino nzubo ikekalatu ke milumba ya bikulukulu.+ Yense ukapitanga ukakumyanga ne kwita mulozhi ne kwamba’mba, ‘Mambo ka Yehoba o aubijile bibye kino kyalo ne ino nzubo?’+ 9 Kepo bakamba’mba, ‘Mambo bamushile Yehoba Lesa wabo, yenka wafumishe bashakulu babo mu kyalo kya Ijipita, kabiji bekebejile balesa bangi ne kwibafukamina ne kwibengijila. O ene mambo Yehoba o aletejile bino bya malwa byonse pe abo.’”+

10 Ku mpelo ya myaka 20, Solomone yo ashimikijilemo ano mazubo abiji, nzubo ya Yehoba ne nzubo* ya mfumu,+ 11 Hilama+ mfumu wa Tila wapele Solomone bichi bya sida ne bya yunipa ne ngolode yonse yo akebelenga,+ kabiji Mfumu Solomone wapele Hilama mizhi 20 yajinga mu kyalo kya Ngalilea. 12 Onkao mambo, Hilama wafumine ku Tila ne kuya na kumona mizhi yamupele Solomone, bino kechi wiitemenwe ne.* 13 Waambile’mba: “Mulongo wami, mizhi ya mutundu ka ye yo wampa?” Byonkabyo, beitela’mba Kyalo kya Kabula* kufika ne lelo jino.

14 Kabiji Hilama watumijile mfumu matalenta* a ngolode 120.+

15 Kabiji Mfumu Solomone wakambizhe baingilanga mingilo ya mfumu+ kuba’mba bashimike nzubo ya Yehoba,+ ne nzubo yanji mwine, ne kulenga Kituntaulo,*+ ne nsakwa ya Yelusalema, ne Hazola,+ ne Megido+ ne Gezela.+ 16 (Felo mfumu wa Ijipita waishile ne kushinda muzhi wa Gezela ne kumusoka na mujilo, kabiji waipayile ne bena Kenana+ baikalanga mu uno muzhi. Onkao mambo, wamupaine ku mwananji wa mukazhi muka Solomone kwikala bupe*+ bwa kwishajikapo.) 17 Solomone washimikile* Gezela, Bete-holona Wakunama,+ 18 ne Baalata,+ ne Tamala wajinga mu kiselebwa, monka mu kyalo, 19 kubikapotu ne mizhi yonse ya kwa Solomone ya kulaminamo bipe,+ mizhi mwa kulamina makalaki, mizhi mwa kwikala benda pa bambili, ne bintu byonse Solomone byo akebelenga kushimika mu Yelusalema, ne mu Lebanoni ne mu kyalo kyonse kyo alaminenga. 20 Kabiji bantu bonse bashajilepo ba mu bena Amoli, ba mu bena Hiti, ba mu bena Pelizi, ba mu bena Hivi, ne ba mu bena Yebusi,+ babujile bena Isalela,+ 21 ba mu bisemi byabo bashajile mu kyalo, bonka bo babujile kwipaya ku bena Isalela, Solomone wibakambizhe kwikala ba kwingijila mfumu ne kwikala bazha kufikatu ne lelo jino.+ 22 Bino Solomone kechi waalwilepo mwina Isalela nangwa umo kwikala muzha ne,+ mambo bajinga bashilikale banji, bakalume banji, babitumbafumu banji, bakulumpe ba bashilikale banji, ne bakulumpe ba benda pa makalaki ne ba benda pa bambili. 23 Kwajinga bakulumpe 550 ba babitumbafumu batangijilanga mwingilo wa kwa Solomone, basopelenga bantu baingijilenga mwingilo.+

24 Bino mwana wa mukazhi wa kwa Felo+ wafumine mu Muzhi wa Davida+ ne kuya ku nzubo yanji yo bamushimikijile kwi Solomone; kepo Solomone alengele Kituntaulo.*+

25 Solomone watapishanga bitapisho bya kusoka ne bya mutende jisatu mu mwaka+ ponka pa kya kusokelapo bitapisho kyo ashimikijile Yehoba,+ kabiji wasokanga ne bya kufutumuna pa kya kusokelapo bitapisho kyajinga ku meso a Yehoba, byonkabyo wapwishishe kushimika nzubo.+

26 Mfumu Solomone walengele ne maato mu Eziona-gebela,+ uji kwipi na Elata ku kitulu kya Kalunga ka Mema Kachila mu kyalo kya Edomu.+ 27 Hilama watumine bakalume banji na maato,+ bapijilwa kwenda pa kalunga ka mema, ba kuya na kwingijila pamo na bakalume ba kwa Solomone. 28 Bayile ku Ofila+ na kusenda matalenta a ngolode 420 ne kwiatwala kwi Mfumu Solomone.