Buku Mutanshi wa Bamfumu

13 Muntu wa Lesa+ wafumine ku Yuda monka mwamukambizhizhe Yehoba ne kuya ku Betele, kimye Yeloboma kyo aimene ku kya kusokelapo bitapisho+ na kusoka bya kufutumuna. 2 Ponkapo wabijikile ku kya kusokelapo bitapisho byambo byamukambizhe Yehoba amba: “Obewa kya kusokelapo bitapisho, obewa kya kusokelapo bitapisho! Abino byo byaamba Yehoba amba: ‘Umvwa! Mu nzubo ya kwa Davida mukasemwa mwana wa mulume wa jizhina ja Yosiya!+ Aye ukatapisha pe obewa bañanga ba pa mapunzha atuntama, bonka basoka bya kufutumuna pe obewa, kabiji ukasokela bikupa bya bantu pe obewa.’”+ 3 Pa jonkaja juba wibapele kiyukilo ne kwamba’mba: “Kino kyo kiyukilo Yehoba kyo atongola: Talai! Kya kusokelapo bitapisho kisakwabanapo, ne buto* bujipo busakusukumukapo.”

4 Mfumu byo aumvwinetu byambo muntu wa Lesa wa kine byo aambijile kya kusokelapo bitapisho ku Betele, Yeloboma watanyikile kuboko kwanji kufuma ku kya kusokelapo bitapisho ne kwamba’mba: “Mukwatai!”+ Ponkapotu, kuboko kwanji ko atanyikile ku uno muntu kwaumine,* kabiji kechi wakonsheshe kwikubwezha ne.+ 5 Kepo kya kusokelapo bitapisho kyaabenepo ne buto bwajingapo bwasukumukilepo monka mwayijile kiyukilo kyapaine muntu wa Lesa wa kine monka mwamubuujile Yehoba.

6 Ponkapo mfumu waambijile muntu wa Lesa wa kine amba: “Napopwela, musashijile* Yehoba Lesa wobe, ne kundombelako kuba’mba kuboko kwami kubwele byonka byo kwajinga.”+ Kepo muntu wa Lesa wa kine amusashijile Yehoba, ne kuboko kwa mfumu kwabwelele byonka byo kwajinga. 7 Kabiji mfumu waambijile muntu wa Lesa wa kine amba: “Twayai ku nzubo yami mukajepo kajo, nemupepo ne bupe.” 8 Bino muntu wa Lesa wa kine waambijile mfumu amba: “Nangwa kya kuba mumpe kichika kya nzubo yenu, kechi nakonsha kuya nenu ne kuja kajo nangwa kutoma mema mu ino mpunzha ne. 9 Mambo Yehoba waamba’mba: “Kechi wafwainwa kuja kajo nangwa kutoma mema ne, kabiji kechi wafwainwa kubwelela mu jishinda jo ukayilamo ne.’” 10 Byonkabyo, wayile mu jishinda jingi kabiji kechi wabwelele mu jishinda jo aishijilemo ku Betele ne.

11 Kwajinga ngauzhi mukote waikalanga mu Betele, kabiji baana banji ba balume baishile ku nzubo ne kumubuula bintu byonse byaubile muntu wa Lesa wa kine pa joja juba mu Betele ne byambo byo aambijile mfumu. Byo bapwishishetu kubuula shabo bino, 12 aye wibashikishe’mba: “Waya jepi?” Baana banji bamubuujile jishinda jayilemo muntu wa Lesa wa kine wafumine ku Yuda. 13 Ponkapo waambijile baana banji amba: “Mbikilai kya kwikalapo pa mbongolo.” Bamubikijile kya kwikalapo pa mbongolo, ne aye wakanjijilepo.

14 Wamupupijile awa muntu wa Lesa wa kine kabiji wamutaaine saka aikala munshi ya kichi kikatampe. Kepo amushikishe’mba: “Nanchi yobe muntu wa Lesa wa kine waji kufuma ku Yuda nyi?”+ Ne aye wakumbwile’mba: “Yami iye.” 15 Kabiji wamwambijile’mba: “Twaya ku nzubo yami ukajepo kajo.” 16 Bino aye waambile’mba: “Kechi nakonsha kubwela ne anweba nangwa kuswa byo mwangita ne, kabiji kechi nakonsha kuja kajo nangwa kutoma mema ne anweba mu ino mpunzha ne. 17 Mambo Yehoba wankambizhe’mba, ‘Kechi wafwainwa kuja kajo nangwa kutoma mema kokwa ne. Kabiji kechi wafwainwa kubwelela mu jishinda jo ukayilamo ne.’” 18 Kepo amwambijile’mba: “Ne amiwa nengauzhi byonka byo uji, kabiji malaika waji kumbuula byambo bya Yehoba amba, ‘Mubwezhe ku nzubo yobe kuba’mba aje kajo ne kutoma mema.’” (Wamubepele.) 19 Onkao mambo, wabwelele pamo nanji ne kuja kajo ne kutoma mema mu nzubo yanji.

20 Byo baikele ku tebulu, byambo bya Yehoba byaishile ku yewa ngauzhi wamubwezhezhemo, 21 kabiji waambijile muntu wa Lesa wa kine wafumine ku Yuda amba, “Yehoba waamba’mba: ‘Mambo a kuba kechi wakookela mukambizho wa Yehoba ne, kabiji kechi walondela byakukambizhe Yehoba Lesa wobe ne, 22 bino wabwela ne kuja kajo ne kutoma mema mu mpunzha yo bakwambijile’mba, “Kechi ukaje kajo nangwa kutoma mema ne,” mubiji wobe kechi bakamuzhiika mu kilende kya bashakulu bobe ne.’”+

23 Muntu wa Lesa wa kine byo apwishishe kuja ne kutoma, ngauzhi mukote wabikijile yewa ngauzhi ye abwezhezhemo kya kwikalapo pa mbongolo. 24 Kepo ayile, bino bokwe wamusambakene mu jishinda ne kumwipaya.+ Mubiji wanji walaajile mu jishinda ne mbongolo saka aimana kwipi; bokwe naye waimene kwipi na uno muntu wafwa. 25 Kwajinga banabalume bapichilenga bamwene muntu wafwa saka alaala mu jishinda ne bokwe saka aimana kwipi na muntu wafwa. Bayile na kubulañana mu muzhi mwaikalanga ngauzhi mukote.

26 Ngauzhi wamubwezhezhemo byo aumvwine kino, ponkapo waambile’mba: “Awo ke muntu wa Lesa wa kine wabujile kukookela mukambizho wa Yehoba;+ onkao mambo, Yehoba wamupana ku bokwe kuba’mba amutabaule ne kumwipaya, monka mwayila byambo byamwambijile Yehoba.”+ 27 Kepo aambijile baana banji amba: “Mbikilai kya kwikalapo pa mbongolo.” Ne abo bekibikilepo. 28 Kepo ayile ne kutaana muntu wafwa saka alaala mu jishinda, mbongolo ne bokwe saka baimana kwipi na uno muntu wafwa. Bokwe kechi wajiile muntu wafwa nangwa kutabaula mbongolo ne. 29 Awa ngauzhi mukote washikwile mubiji wa muntu wa Lesa wa kine ne kumubika pa mbongolo, kabiji wamuletele mu muzhi wanji kuba’mba bamujile ne kumuzhiika. 30 Onkao mambo, wazhiikile mubiji mu kilende kyanji, kabiji bamujijilenga amba: “Kyatama bingi, mulongo wami!” 31 Byo bapwishishe kuzhiika, waambijile baana banji amba: “Inge nafwa, mukanzhiike mu mpunzha mo twazhiika muntu wa Lesa wa kine. Mukabike bikupa byami kwipi na bikupa byanji.+ 32 Byambo bya Yehoba byo aambijile kya kusokelapo bitapisho mu Betele ne mazubo onse a kupopwelamo aji pa mapunzha atuntama+ mu mizhi ya mu Samaliya, kine bikafika.”+

33 Nangwatu bino bintu byo byamwekele, Yeloboma kechi wafuminemo mu jishinda janji jatama ne, bino watwajijile kutongola bantutu kwikala bañanga ba pa mapunzha atuntama.+ Watongwelenga* muntu yense wakebelenga kwikala ñanga ne kwamba’mba: “Ekale ñanga wa pa mapunzha atuntama.”+ 34 Buno bubi bwa ba mu nzubo ya kwa Yeloboma+ bwibalengejile konaika ne kwibavizha pano pa ntanda.+