Buku Mutanshi wa Bamfumu

21 Bino bintu byo byapwile, kwamwekele kintu ku bujimi bwa miñanzañanza bwa kwa Nabota mwina Yezelela; buno bujimi bwajinga mu Yezelela,+ kwipi na kipango kya kwa Ahaba mfumu wa Samaliya. 2 Ahaba waambijile Nabota amba: “Umpe bujimi bobe bwa miñanzañanza bwikale ke mashamba ami a bishu, mambo buji kwipi na nzubo yami. Ne amiwa nsakukupa bujimi bwa miñanzañanza bukwabo bwawamisha. Nangwa inge ukeba, nsakukupa mali aesakana na mutengo wa bujimi.” 3 Bino Nabota waambijile Ahaba amba: “Kwesakana na Yehoba byo amona bintu, kechi kyawama kuba’mba nemupe buswanyi bwa bashakulu bami ne.”+ 4 Ponkapo Ahaba watwelele mu nzubo saka apopomenwa kabiji wajinga bingi na bulanda, na mambo a byamukumbwile Nabota mwina Yezelela byo aambile’mba: “Kechi nsakwimupa buswanyi bwa bashakulu bami ne.” Kepo alaajile pa mwanya wanji ne kutala kunyuma, kabiji wakaine kuja.

5 Mukazhanji aye Yezebeli+ waishile ko ajinga ne kumwipuzha’mba: “Mambo ka o mwaubila* bulanda bibye kya kuba mwakana ne kuja?” 6 Aye wakumbwile mukazhanji amba: “Mambo naji kwambila Nabota mwina Yezelela namba, ‘Mpoteshe bujimi bobe bwa miñanzañanza. Nangwa inge ukeba nkupe bujimi bwa miñanzañanza bukwabo.’ Bino aye waji kuñambila’mba, ‘Kechi nsakwimupa bujimi bwami bwa miñanzañanza ne.’” 7 Mukazhanji aye Yezebeli wamwambijile’mba: “Nanchi kechi yenu mfumu ubena kulama bena Isalela nenyi? Buukai mujepo kajo muchima wenu asangalale. Amiwa nsakwimupa bujimi bwa miñanzañanza bwa kwa Nabota mwina Yezelela.”+ 8 Onkao mambo, Yezebeli wanembele makalata mu jizhina ja kwa Ahaba ne kubikapo katetesho ka mfumu+ kabiji watumine ano makalata ku bakulumpe+ ne ku babinemanga baikalanga mu muzhi mwaikalanga Nabota. 9 Mu ano makalata wanembelemo amba: “Tayai mbila kuba’mba bantu bazhikilwe na nzala, kabiji Nabota mumwikazhe kulutwe ya bantu. 10 Kabiji mulete bantu babiji babula maana bekale kulutwe yanji, ne kumushinawina’mba,+ ‘Obewa watuka Lesa ne ba mfumu!’+ Kabiji mumulupule pangye ne kumwasa mabwe afwe.”+

11 Byonkabyo, bantu ba mu muzhi mo aikalanga, ne bakulumpe ne babinemanga baikalanga mu muzhi wanji, baubile byonka byanembelwe mu makalata Yezebeli o ebatumijile. 12 Batayile mbila ya kuba’mba bantu bazhikilwe na nzala kabiji baikezhe Nabota kulutwe ya bantu. 13 Kepo bantu babiji babula maana baishile ne kwikala kulutwe yanji ne kutendeka kumushinawina Nabota pa meso a bantu, ne kwamba’mba: “Nabota watuka Lesa ne ba mfumu!”+ Kabiji bamulupwijile pangye ya muzhi ne kumwipaya na mabwe.+ 14 Kepo batumine mawi kwi Yezebeli amba: “Nabota bamwipaya na mabwe.”+

15 Aku Yezebeli umvwatu amba Nabota bamwipaya na mabwe, waambijile Ahaba amba: “Imanai mukatambule bujimi bwa miñanzañanza bwa kwa Nabota mwina Yezelela+ bo akaine kwimupotesha na mali, mambo Nabota kechi ke mumi ne. Wafwa.” 16 Ahaba byo aumvwinetu amba Nabota wafwa, wabuukile ne kuya ku bujimi bwa miñanzañanza bwa kwa Nabota mwina Yezelela kuba’mba ebutambule ke bwanji.

17 Pakuba byambo bya Yehoba byaishile kwi Elaija+ mwina Tishibe amba: 18 “Imana uye na kusambakana Ahaba mfumu wa Isalela uji mu Samaliya.+ Aye uji mu bujimi bwa miñanzañanza bwa kwa Nabota, ko aya kuba’mba ebutambule ke bwanji. 19 Wafwainwa kumubuula’mba, ‘Yehoba waamba’mba: “Nanchi waipaya muntu+ ne kutambula buswanyi* bwanji nyi?”’+ kabiji umwambile’mba, ‘Yehoba waamba’mba: “Ku mpunzha bakabwa ko bamyangijile mashi a kwa Nabota, ne obewa bakabwa ko ko bakamyangila mashi obe.”’”+

20 Ahaba waambijile Elaija amba: “Wantaana, obewa mulwanyi wami!”+ Aye wamwambijile’mba: “Ee nemutaana. Lesa waamba’mba, ‘Na mambo a kuba wakebeshatu* kuba byatama kwi Yehoba,+ 21 mbena kuleta bya malwa pe obewa, kabiji nkapyanga bonse bakalondela pe obewa ne kuvizha banabalume* bobe bonse obewa Ahaba,+ kuvwangakotu ne babula bakwibakwasha ne babula kukosa baji mu Isalela.+ 22 Kabiji nkalengela nzubo yobe kwikala nobe nzubo ya kwa Yeloboma+ mwana wa kwa Nebati ne kwikala nobe nzubo ya kwa Baasha+ mwana wa kwa Ahiya, mambo wakolomona bukaji bwami ne kulengela bena Isalela kuba bubi.’ 23 Kabiji pa mambo a ba Yezebeli, Yehoba waamba’mba: ‘Bakabwa bakamujiila Yezebeli mu mpunzha iji mu Yezelela.+ 24 Kabiji muntu yense wa kwa Ahaba ukafwila mu muzhi bakamuja ku bakabwa, kabiji yense ukafwila mu jisaka bakamuja ku bañonyi.+ 25 Kine, kechi kwajingapo muntu wajinga nobe Ahaba,+ wakebeshengatu* kuba byatama kwi Yehoba, ye batundaikilenga ku mukazhanji aye Yezebeli ne.+ 26 Aye waubilenga bintu bya bunya byakilamo kutama kupichila mu kwingijila bankishi ba bunya,* byonkatu byaubilenga bena Amoli, bonka Yehoba bo apangile ku meso a bena Isalela.’”+

27 Ahaba byo aumvwinetu bino byambo, watabwile bivwalo byanji ne kwinyinga kisapi kya majila; kabiji wazhikilwenga na nzala ne kulaala na bisapi bya majila ne kwenda saka apopomenwa. 28 Kepo byambo bya Yehoba byaishile kwi Elaija mwina Tishibe amba: 29 “Nanchi wamona Ahaba byo epelula kwi amiwa nyi?+ Na mambo a kuba’mba wipelula kwi amiwa, kechi nkaleta bya malwa mu moba a bumi bwanji ne. Nkaleta bya malwa pa ba mu nzubo yanji mu moba a mwananji.”+