Mitonyi
7 Kepo Yelubaela, ko kuba’mba Gidiona,+ ne bantu bonse bo ajinga nabo baimene lukelokelo ne kukatebelela ku mushima wa Haloda, kampu wa bena Mijanyi saka aji ku kabeta ka ku buyeke, ku katumbatumba ka Mole, mu musanza. 2 Yehoba waambijile Gidiona amba: “Bantu bo uji nabo bavula bingi kuba’mba mpane bena Mijanyi mu maboko abo.+ Mambo inge ne, bena Isalela baketotanga ne kuñambila’mba, ‘Maboko etu o etupokolola.’+ 3 Pano bijika ku bantu amba: ‘Yense uji na moyo kabiji ubena kuzakama, abwele ku nzubo yanji.’”+ Byonkabyo, Gidiona wibesekele. Ponkapo bantu 22,000 babwelele ku mazubo kabiji pashajiletu bantu 10,000.
4 Nangwa byonkabyo, Yehoba waambijile Gidiona amba: “Bantu bakivula. Bambile baye ku mema kuba’mba nkwesekelebo konkakwa. Inge nkwambile namba, ‘Awe usakuya ne obewa,’ ye ye usakuya nanji, bino inge nkwambile namba, ‘Awe kechi usakuya ne obewa ne,’ kechi uye nanji ne.” 5 Byonkabyo, watwajile bantu ku mema.
Kepo Yehoba aambijile Gidiona amba: “Usale yense usakukabaula mema na lujimi wanji byonkatu bikabaula kabwa, kufuma ku boba basakufukama pa kutoma.” 6 Bonse bakabawilenga mema na maboko abo bajinga banabalume 300. Bantu bonse bashala bafukamine pa kutoma.
7 Kepo Yehoba aambijile Gidiona amba: “Nsakwimupokolola na banabalume 300 bakukabaulanga mema, kabiji nsakupana bena Mijanyi mu kuboko kobe.+ Bino wibaleke bantu bonse bashala babwele ku mazubo.” 8 Byo atambwile mpao ne nsengo ku bantu, waambijile banabalume bena Isalela bakwabo kubwelamo ku mazubo abo, kabiji washajiletu na banabalume 300. Kampu wa bena Mijanyi wajinga mu musanza munshi ya kampu wanji.+
9 Bonkabwa bufuku, Yehoba wamwambijile’mba: “Imana, ulukuke kampu, mambo namupana mu kuboko kobe.+ 10 Bino inge waumvwa moyo kumulukuka, kunkulukila ku kampu ne Pula kalume wobe. 11 Uteleke byo basakwamba, apa bino uchinchike* ne kulukuka kampu.” Ponkapo aye ne Pula kalume wanji bakunkulukijile kwapela kampu wa nzhita.
12 Bena Mijanyi ne bena Amaleki ne bonse ba ku Musela+ bakumbene mu musanza nobe nzhiye, ne bangamela babo bajinga bakukankalwa kubala,+ bavujile nobe busenga bwa ku kitulu kya kalunga ka mema. 13 Gidiona byo afikile, waumvwine mwanamulume walotolwejilenga mukwabo kiloto kyanji, kabiji waambile’mba: “Akino kyo kiloto kyo nakulota. Naji kulota shinkwa wanzhingwile wa mbaale saka a kunkulukila mu kampu wa bena Mijanyi. Waji kufika ku tente ne kumupuma bingi kya kuba ne tente waji kupona.+ Kine, waji kufulamuna tente, ne tente waji kulaalatu panshi.” 14 Ponkapo mukwabo waambile’mba: “Ino yakonsha kwikalatu mpoko ya kwa Gidiona+ mwana wa kwa Yoashi, mwanamulume mwina Isalela. Lesa wapana bena Mijanyi ne kampu yense mu kuboko kwanji.”+
15 Gidiona byo aumvwinetu byo alumbulwile kiloto ne mo kyatajile,+ wafukamine ne kupopwela Lesa. Kabiji wabwelele ku kampu wa bena Isalela ne kwamba’mba: “Imanai, mambo Yehoba wapana kala kampu wa bena Mijanyi mu maboko enu.” 16 Kepo aabenye banabalume 300 mu mabumba asatu, kabiji bonse wibapele nsengo+ ne milondo ikatampe mwabula bintu ne masoko a mujilo mu milondo. 17 Kepo ebambijile’mba: “Muntalenga, ne kuba byonkatu byo nsakuba. Byo nsakufika kwapela kampu, mube byonka byo nsakuba. 18 Inge mvumye lusengo, amiwa ne bonse bo nji nabo, ne anweba mwafwainwa kuvumya nsengo konse kwapela kampu ne kubijika amba, ‘Ya kwa Yehoba ne ya kwa Gidiona!’”
19 Gidiona ne banabalume 100 bo ajinga nabo bafikile kwapela kampu ku ntatwilo ya kilo* kya pakachi ka bufuku, pa kyonka kimye kipimpwile bakasopa. Bavuminye nsengo+ ne kulalaula milondo ikatampe ya mema yajinga mu maboko abo.+ 20 Mabumba asatu avuminye nsengo ne kulalaula milondo ikatampe. Bakwachile masoko a mujilo na maboko abo a kipiko ne kuvumya nsengo yajinga ku maboko abo a kilujo, kabiji babijikile’mba: “Mpoko ya kwa Yehoba ne ya kwa Gidiona!” 21 Muntu yense watwajijile kwimana ponka po ajinga kuzhokoloka kampu yense, ne bashilikale bonse banyemenenga saka batama miteto.+ 22 Banabalume 300 batwajijiletu na kuvumya nsengo, kabiji Yehoba walengejile bajinga mu kampu kwialukilamo abo bene na bene na mpoko;+ ne nzhita yonse yanyemene kufika ku Bete-shita, ne ku Zelela, kukafika ne ku mupaka wa Abela-mehola+ ku Tabata.
23 Kabiji banabalume bena Isalela bebakonkenye pamo kufuma mu mukoka wa bena Nafitali, wa bena Ashela ne wa bena Manase+ kabiji bapupijile bena Mijanyi. 24 Gidiona watumine baluwe monse mu kibunji kya mitumba kya Efelaimu na kwamba’mba: “Kunkulukai mukalukuke bena Mijanyi ne kwibachibijila ku myaba ya mu Yodano ne tukola twanji kufika ku Bete-bala.” Byonkabyo, banabalume bonse bena Efelaimu bakonkene pamo, kabiji baangachile myaba ya mu Yodano ne tukola twanji kufika ku Bete-bala. 25 Kabiji bakwachile ne babinemanga babiji ba bena Mijanyi, Oleba ne Ziba; Oleba bamwipayijile pa jibwe ja kwa Oleba,+ kabiji Ziba bamwipayijile ku kya kufiinamo binyu kya kwa Ziba. Batwajijile kupupila bena Mijanyi,+ kabiji baletele mutwe wa kwa Oleba ne wa kwa Ziba kwi Gidiona mu kibunji kya Yodano.