Kubala

15 Yehoba waambijile Mosesa jibiji amba: 2 “Buula bena Isalela amba, ‘Byo mukafika mu kyalo kyo mbena kwimupa kwikalamo+ 3 ne kulambula mulambo wa kusoka pa mujilo kwi Yehoba kufuma mu bañombe nangwa mikooko, nangwa mulambo wa kusoka+ nangwa kitapisho kya luchipo nangwa mulambo wa kwifuukwila+ nangwa mulambo wa pa bijiilo+ byenu kwikala bwema bwawama* kwi Yehoba,+ 4 muntu ukaleta mulambo wanji, wafwainwa kuleta kwi Yehoba mulambo wa kajo wa kipimo kimo kya bunga bwalamba+ kya mu bipimo jikumi bitwela mu efa* bwavwangakana na kipimo kimo kya mu bipimo bina bitwela mu hini* wa manyi. 5 Kabiji wafwainwa ne kuleta kipimo kimo kya mu bipimo bina bitwela mu hini kya binyu bya mulambo kwikala ke mulambo wa binyu, pamo na mulambo wa kusoka+ nangwa kitapisho kya mwana mukooko mulume umo umo. 6 Nangwa akalambule mukooko mulume pamo na mulambo wa kajo wa bipimo bibiji bya mu bipimo jikumi bitwela mu efa bya bunga bwalamba bwavwangakana na kipimo kimo kya manyi kya mu bipimo bisatu bitwela mu hini. 7 Kabiji akalete kipimo kimo kya binyu kya mu bipimo bisatu bitwela mu hini kwikala mulambo wa binyu wa bwema bwawama* kwi Yehoba.

8 “‘Umvwe akalambule ñombe kwikala mulambo wa kusoka+ nangwa kitapisho kya kufikizha luchipo+ nangwa kitapisho kya mutende kwi Yehoba,+ 9 ñombe akamuletele pamo na mulambo wa kajo+ wa bipimo bisatu bya mu bipimo jikumi bitwela mu efa bya bunga bwalamba bwavwangakana na kichika kya hini kya manyi. 10 Kabiji akalete ne binyu malita abiji bya mulambo wa binyu,+ kwikala mulambo wa kusoka pa mujilo wa bwema bwawama* kwi Yehoba. 11 Abino byo byo bafwainwa kuba na ñombe umo nangwa mukooko mulume umo nangwa baana ba mikooko balume nangwa bambuzhi. 12 Monka mwayila kuvula kwa banyama bo akalambula, abino byo byo akoba ku nyama yense, monka mwayila kuvula kwabo. 13 Abino mwina Isalela yense byo byo akalambulanga mulambo wa kusoka pa mujilo, kwikala bwema bwawama* kwi Yehoba.

14 “‘Muntu wafuma ku kyalo kingi ye wikala nanji nangwa ye waikala nanji myaka yavula, naye wafwainwa kulambula mulambo wa kusoka pa mujilo wa bwema bwawama* kwi Yehoba, ne aye wafwainwa kuba byonkatu byo uba.+ 15 Anweba ba mu kipwilo ne bantu bafuma ku byalo bingi bo mwikala nabo, mukekalatu na jilamuna jimo. Jikekala ke jilamuna ja myaka ne myaka ku bisemi byenu byonse bya kulutwe. Muntu wafuma ku kyalo kingi ne anweba mukekala kimotu kwi Yehoba.+ 16 Kukekalatu muzhilo umo kwi anweba ne ku muntu wafuma ku kyalo kingi ye mwikala nanji.’”

17 Yehoba waambijile Mosesa amba: 18 “Buula bena Isalela amba, ‘Byo mukafika mu kyalo kyo mbena kwimutwalamo, 19 ne byo mukaja shinkwa* wa mu kyokya kyalo,+ mwafwainwa kupana bupe kwi Yehoba. 20 Ku bunga bwenu butanshi+ bwa nkapankapa mukalengeko bashinkwa banzhingwile. Byonkatu byo mukapananga bupe bwafuma pa kipujilo, ne buno bupe byo byo mukebupananga. 21 Bunga bwenu butanshi bwa nkapankapa mukebupane kwikala bupe kwi Yehoba kufika ne ku bisemi byenu byonse bya kulutwe.

22 “‘Umvwe mwalubankanya ne kubula kulondela ino mikambizho yonse Yehoba yo akambizhe Mosesa, 23 ne bintu byonse Yehoba byo emukambizhe kupichila mwi Mosesa kufumatu juba Yehoba jo apaine mikambizho kukafikatu ne ku bisemi byenu bya kulutwe, 24 kabiji umvwe bekyubile kya mapuso kwa kubula jibumba kuyuka, jibumba jonse jikapane mwana ñombe umo wa mulambo wa kusoka wa bwema bwawama* kwi Yehoba, pamo na mulambo wa kajo ne mulambo wa binyu monka mwayila jishinda ja kumupainamo,+ ne mwana mbuzhi umo wa mulambo wa bubi.+ 25 Ñanga akafuchileko mambo jibumba jonse ja bena Isalela ne mambo abo akalekelwa,+ mambo bekyubile kwa kubula kuyuka. Kabiji baletele mulambo wabo wa kusoka pa mujilo kwi Yehoba, ne mulambo wabo wa bubi kwi Yehoba na mambo o balengele kwa kubula kuyuka. 26 Jibumba jonse ja bena Isalela ne muntu wafuma ku kyalo kingi ye bakekala nanji, bakebalekelako mambo abo, mambo bantu balengele mambo kwa kubula kuyuka.

27 “‘Umvwe muntu* walenga mambo kwa kubula kuyuka, wafwainwa kuleta mbuzhi mukazhi wa mwaka umo wa mulambo wa bubi.+ 28 Ñanga akamufuchileko mambo muntu* walengele mambo kwi Yehoba kwa kubula kuyuka, kabiji mambo anji akalekelwa.+ 29 Pa mambo a mwina kyalo wasemekelwa mu bena Isalela ne muntu wafuma ku kyalo kingi ye mwikala nanji, kukekalatu muzhilo umo pa mambo alenga muntu kwa kubula kuyuka.+

30 “‘Umvwe muntu* walenga mambo kya nshiji,+ nangwa mwina Isalela nangwa muntu wafuma ku kyalo kingi, awo muntu waleta mwenga pe Yehoba kabiji bafwainwa kumuchibako* ku balongo banji. 31 Mambo walengulula byambo bya Yehoba ne kuzhilulula mukambizho wanji, awo muntu* bafwainwa kumuchibako kwa kubula kukankazhama.+ Kabiji ukatwikwa na bubi bwanji.’”+

32 Bena Isalela byo bajinga mu kiselebwa, bataaine muntu saka atolaula nsala pa juba ja Sabado.+ 33 Aba bamutaaine na kutolaula nsala, bamutwajile kwi Mosesa ne Alona ne ku jibumba jonse. 34 Ne abo bakimulaminenga,+ mambo mizhilo kechi yakyambilepo pa byo bafwainwe kumuba ne.

35 Kabiji Yehoba waambijile Mosesa amba: “Awo muntu bafwainwa kumwipaya,+ ne jibumba jafwainwa kumwasa mabwe pangye ya kampu.”+ 36 Onkao mambo, jibumba jonse jamulupwijile pangye ya kampu ne kumwasa mabwe ne aye wafwile, byonkatu Yehoba byo akambizhe Mosesa.

37 Yehoba waambijile Mosesa jibiji amba: 38 “Buula bena Isalela amba bafwainwa kulenga nsenkebele kunsa kunsa ya bivwalo byabo kufika ne ku bisemi byabo byonse bya kulutwe, kabiji bakabikeko mufumo wafituluka peulu ya nsenkebele iji kunsa kunsa ya kivwalo.+ 39 ‘Mwafwainwa kwikala na nsenkebele ku bivwalo byenu pa kuba’mba byo mukeimonanga, mukavulukenga mizhilo ya Yehoba ne kwiilondela.+ Kechi mukalondelenga bikeba michima yenu nangwa bimona meso enu bimulengela kubula kwikala ba kishinka kwi amiwa* ne.+ 40 Kino kikemukwasha kuvuluka ne kulama mikambizho yami ne kwikala bazhila kwi Lesa wenu.+ 41 Amiwa yami Yehoba Lesa wenu wimufumishe mu kyalo kya Ijipita kuba’mba nemweshe’mba yami Lesa wenu.+ Amiwa yami Yehoba Lesa wenu.’”+