Masalamo

72 Anweba Lesa, funjishai mfumu mizhilo yenu,

Ne kupa mwana mfumu bololoke bwenu.+

 2 Azhikijile bantu benu na bololoke,

Ne bantu benu balanda ebachibile mambo mo aolokela.+

 3 Mitumba ilete mutende ku bantu,

Ne tutumbatumba tulete bololoke.

 4 Azhikijile* balanda baji mukachi ka bantu,

Apulushe baana ba bayanji,

Kabiji onaune mujimbijimbi.+

 5 Bakemwakamwanga moba onse akekalako juba

Ne moba onse akekalako ñondo,

Kufikatu ne ku bisemi byonse.+

 6 Aye ukekala nobe mvula unokela pa nsono yo bakupa,

Nobe mvula umima utekezha ntanda.+

 7 Mu kimye kya bukalama bwanji baoloka bakekalanga bulongo,*+

Ne mutende ukavula+ moba onse kufikatu ne ñondo byo akabula kwikalako.

 8 Aye ukekala na bangikazhi* kufuma ku kalunga ka mema kukafika ne ku kalunga ka mema kakwabo

Ne kufuma ku Mukola* kukafika ne konse kwapela ntanda.+

 9 Aba bekala mu kiselebwa bakamufukamina,

Ne balwanyi banji bakamyanga lukungu.+

11 Bamfumu bonse bakamufukamina,

Ne bisaka byonse bya bantu bikamwingijilanga.

12 Mambo aye ukapokolola muyanji ukeba bukwasho,

Ne mulanda ne yense wabula wa kumukwasha.

13 Ukobila lusa mulanda ne muyanji,

Kabiji ukapulusha bumi* bwa bayanji.

14 Ukebapokolola* ku lumanamo ne ku bukapondo,

Ne mashi abo akekala anema kwi aye.

Bamulombelengako kimye kyonse,

Kabiji bamupeshenga kimye kyonse.

16 Kajo kakavula bingi pano pa ntanda;+

Kakekala ne peulu ya mitumba.

Bipangwa bya mfumu bikavula nobe bichi bya mu Lebanoni,+

Ne bantu bakekalanga mu mizhi bakavula nobe nsono ya pano pa ntanda.+

17 Jizhina janji jikale myaka ne myaka,+

Kabiji jitwajijile kutumbalala moba onse akekalako juba.

Bantu bakamwene bibusa mwi aye;+

Bisaka byonse bya bantu bimutele’mba ye wa lusekelo.

18 Atotwe Yehoba Lesa, Lesa wa Isalela,+

Yenkatu uba bintu bya kukumya.+

19 Jizhina janji ja lukumo jitotwe myaka ne myaka,+

Ne lukumo lwanji lukumbane ntanda yonse.+