Ku Bena Loma
14 Mutambwilai awa muntu wakooka mu lwitabilo,+ bino kange muzhachishe muntu na mambo a kupusana milanguluko* ne. 2 Muntu umo uji na lwitabilo lwa kuja bintu byonse, bino muntu wakooka ujatu bishu. 3 Awa uja kange alengulule yewa ubula kuja ne, kabiji awa ubula kuja kange azhachishe yewa uja ne,+ mambo bamutambulwila kwi Lesa. 4 Nanchi yobe ñanyi wa kuzhachisha kalume wa muntu ungi?+ Nkambo yanji ye uji na luusa lwa kufuukula kana wakonsha kwimana nangwa kupona.+ Kine bakamwimika, mambo Yehoba* uji na bulume bwa kumwimika.
5 Muntu umo ulanguluka’mba juba jimo janema bingi kukila juba jikwabo;+ pakuba mukwabo ulanguluka’mba moba onse ajitu pamo;+ muntu yense ashiinwe kuba’mba kintu kyo aitabilamo kya kine. 6 Awa ulama juba wijilama na mambo a kunemeka Yehoba.* Kabiji awa uja, uja na mambo a kunemeka Yehoba,* mambo umusanchila Lesa;+ ne aye ubula kuja, kechi ubula kuja na mambo a kubula kunemeka Yehoba* ne, bino umusanchila Lesa.+ 7 Kafwako nangwa umo mwi atweba wikala na bumi na mambo a aye mwine ne,+ kabiji kafwako wifwila mwine ne. 8 mambo umvwe twaikala na bumi, twikala nabo na mambo a Yehoba*+ kabiji inge twafwa, tufwila mwi Yehoba.* Onkao mambo, nangwa tuji na bumi nangwa twafwa twi ba kwa Yehoba.*+ 9 O ene mambo, Kilishitu o afwijile ne kwikala na bumi jibiji, kuba’mba ekale Nkambo wa bafu ne bomi.+
10 Pano mambo ka o uzhachishisha mulongo obe?+ Nangwa mambo ka o ulengulwila mulongo wobe? Mambo bonse tukemana ku kipona kya Lesa kya kuchibilapo mambo.+ 11 Mambo kyanembwa’mba: “Aye Yehoba* waamba’mba,+ ‘Byonka byo nji na bumi, manungo onse akamfukamina kabiji bantu bonse bakayuka’mba yami Lesa.’ ”+ 12 Onkao mambo, atweba bonse pa muntu pa muntu tuketotolwela kwi Lesa.+
13 Onkao mambo, kange twizhachishenga atwe bene na bene ne,+ bino tufuukulepo kubula kubika kya kwituntulako nangwa mukiika ku mulongo wetu.+ 14 Nayuka ne kushiinwa mwi Nkambo Yesu amba kafwako kintu kikala kya muzhilo akyo kine ne;+ kanatu muntu wikitongola amba kya muzhilo, kwi aye kikala kya muzhilo. 15 Mambo umvwe mulongo wenu wituntula na mambo a kajo, ko kuba’mba kechi mubena kwenda mu butemwe ne.+ Kange muleke kajo kenu konaune muntu ye bafwijile kwi Kilishitu ne.+ 16 Onkao mambo, kange muleke kyawama kyo muba bekitele’mba kyatama ne. 17 Mambo kutwela mu Bufumu bwa Lesa kechi kwaimena pa kajo nangwa bya kutoma ne.+ Bino muntu wafwainwa kwikala waoloka, wa mutende kabiji wa lusekelo, abino bintu wikala nabyo na mambo a mupashi wazhila. 18 Mambo awa wingijila Kilishitu mu jino jishinda, ye waitabilwa kwi Lesa ne ku bantu.
19 Onkao mambo, twayai tubenga bintu bileta mutende+ ne bintu bya kwikomesha atwe bene na bene.+ 20 Kilekai konauna mwingilo wa Lesa na mambotu a kajo.+ Kya kine, bintu byonse byatoka, bino umvwe muntu waja ne kutuntwisha bakwabo, kino kechi kyawama ne.+ 21 Kyawama kubula kuja nyama, kutoma binyu nangwa kubula kuba kintu kyonse kyakonsha kutuntwisha mulongo wenu.+ 22 Lwitabilo lo muji nalo, mwikale nalo kwi Lesa. Ye wa lusekelo awa muntu ubula kwizhachisha pa kintu kyo aitabizha. 23 Bino umvwe wazhinauka, wazhatwa kala inge waja, mambo kechi waja na mambo a lwitabilo ne. Kine bintu byonse byabula kwimena pa lwitabilo, ko kulenga mambo.