Musapwishi

9 Onkao mambo, nayukile kuba’mba bantu baoloka ne ba maana ne byubilo byabo byonse biji mu maboko a Lesa wa kine.+ Bantu kechi bayuka ene mambo bantu kala o betemenwe nangwa kwishikwa, abo saka bakyangye kusemwa ne. 2 Kujitu kintu kimo kimwekela* bonse,+ baoloka, babi,+ bawama, bazhila ne babula kuzhila, ne boba batapisha bitapisho ne babula kutapisha. Muntu wawama ujitu pamo na ndengamambo; awa uchipa ujitu pamo na yewa ubula kuchipa kichipechipe. 3 Bino byo bintu byatama bimwekela bantu pano pa ntanda: Na mambo a kuba kintutu kimo kibamwekela* bantu bonse,+ mu michima yabo mwayulatu bubi; ne mu bwikalo bwabo bobatu bya bukonye, kabiji bafwa!*

4 Muntu yense ukiji na bumi uji na luketekelo, mambo kabwa mumi wawama kukila bokwe wafwa.+ 5 Mambo bantu bomi bayuka’mba bakafwa,+ pakuba bantu bafwa kafwako kintu nangwa kimo kyo bayuka ne,+ kabiji kechi bakishala na mfweto ne, mambo bintu byonse byo baubile, bantu bebilubako.+ 6 Kabiji butemwe bwabo, lupato lwabo ne kichima kyabo byonse byaonaika, kabiji kafwako kintu nangwa kimo kyo bafwainwa kuba pano pa ntanda ne.+

7 Onkao mambo, jainga kajo kenu na lusekelo ne kutoma binyu byenu saka mwasangalala,+ mambo Lesa wa kine wasekela mu mingilo yenu.+ 8 Kimye kyonse vwalainga bivwalo bitoka,* kabiji kange mubulenga kushinga manyi ku mitwe yenu ne.+ 9 Sekelainga na bakazhi benu bo mwatemwa+ mu bwikalo bwenu bonse Lesa bo emupa pano pa ntanda, mu moba enu onse mo mubena kubila bintu byatu, mambo kino kyo kintu kyo emupa mu bwikalo bwenu ne mu mingilo yenu yo mwingila pano pa ntanda.+ 10 Bintu byonse byo mukeba kuba mu bwikalo bwenu, byubai na bulume bwenu bonse, mambo mu Kilende* mo mubena kuya kechi muji kwingila mingilo,+ kulanguluka, kuyuka kintu nangwa kwikala na maana ne.

11 Kabiji namwene kintu kikwabo kyuba bantu pano pa ntanda kya kuba’mba, aba banyemesha lubilo kechi bo bashinda mu kapela ne, nangwatu bantu bakosa kechi bo bashinda mu nkondo ne,+ nangwatu ba maana kechi bo bekala na kajo ne,+ nangwatu boba bayuka mwa kubila bintu kechi bo bekala na bunonshi ne,+ nangwatu baji na maana kechi bo bekala bulongo ne, mambo bimye ne bintu bya kubula kuketekela,* bibamwekela bantu bonse. 12 Mambo muntu kechi wayuka juba janji ja kufwa ne.+ Byonkatu masabi byo afwa mu bukonde ne bañonyi byo bafwa mu kakose, ne bantu byo byo kikala umvwe bya malwa bibafikila kyakubazhimukilatu.

13 Namwene kintu kikwabo kyuba bantu na maana pano pa ntanda, kabiji kyansangajikile bingi: 14 Kwajinga kamuzhi mwaikalanga bantu bacheche; kabiji mfumu kilobo wikalukukile ne kwikazhokolosha na nsakwa yakosa. 15 Bino mu kano kamuzhi mwajinga muntu muyanji wajinga na maana wapokolwele kano kamuzhi na maana anji. Nangwa byonkabyo, kafwakotu nangwa umo wamuvulukilepo uno muyanji ne.+ 16 Kabiji naambile namba: ‘Kwikala na maana kwawama kukila kwikala kilobo;+ pano bino, bantu balengulwile muyanji wajinga na maana, ne byambo byanji kechi bebyumvwine ne.’+

17 Kyawama kumvwina byamba muntu wa maana kukila kulondela byabaukatu muntu ulama bantu bakosama.

18 Kyawama kwikala na maana kukila kwikala na byela bya nkondo, bino ndengamambo umo wakonsha konauna bintu byawama byavula.+