Byubilo bya Batumwa
24 Byo papichile moba atanu, ñanga mwine mukatampe Ananyasa+ waishile ku Kesalea pamo na bakulumpe ne shabyambo aye Teletulusa. Baishile kwi kitumbafumu Felikisa na kumubuula mambo a kwa Paulo.+ 2 Byo bamwichile, Teletulusa watatwile kupamo mambo Paulo amba:
“Mwitulama bingi bulongo na mutende kabiji na mambo a maana enu, mu kino kisaka muji bukomo, 3 kimye kyonse ne mu mapunzha onse twibitambula bino byonse na kusanta kukatampe, anweba wa Buneme Felikisa. 4 Bino kwa kubula kwimutayila kimye, mwane nalomba namba monka mu butekanye bwenu, mwitumvwe. 5 Mambo twataana uno muntu kwikala uvulañanya* mutende,+ ne kulengela Bayudea bonse kusatuka+ pano pa ntanda ponse kabiji ye mwine ntangi wa bupopweshi bwa bena Nazala.+ 6 Wakebelenga ne kuzhilulula nzubo ya Lesa, bino twamukwachile.+ 7 *—— 8 Umvwe mumwipuzhe anwe bene, musakumvwa bino bintu byonse byo tubena kumushiina.”
9 Kabiji Bayudea nabo bamushiinenga’mba bino bintu bya kine. 10 Kitumbafumu byo alabwile Paulo amba ambe, wakumbwile’mba:
“Mwane byo nayuka’mba anweba mwaikala myaka yavula na kuchibila mambo kino kisaka, natemwa bingi pa kwiambila amiwa mwine mambo.+ 11 Byonka anwe bene byo mwakonsha kuyuka, moba kechi akila pa 12 kufuma po nayijile ku Yelusalema na kupopwela ne;+ 12 kabiji kechi bantaaine na kwipachika na muntu nangwa umo mu nzubo ya Lesa ne, nangwa kuvulañanya jibumba mu mashinagoga nangwa mu muzhi yense ne. 13 Kabiji kechi bakonsha kumona mwa kwimulumbulwila bintu byo babena kunshiina lonka luno ne. 14 Bino naswa kino kwi anweba kuba’mba, kwesakana na jino jishinda, jo batela’mba bupopweshi, mo mo ñingijila mwingilo wazhila kwi Lesa wa bashakulu bami,+ kabiji naitabila bintu byonse byanembwa mu Mizhilo ne byaawile Bangauzhi.+ 15 Kabiji naketekela mwi Lesa byonka byo baketekela ne abo kuba’mba, kukekala lusanguko+ lwa baoloka ne babula koloka.+ 16 Na mambo a kino, ne amiwa nebikishako kwikala na jiwi ja mu muchima jatoka* kwi Lesa ne ku bantu.+ 17 Byo papichile myaka yavula, nayile mu Yelusalema na kupana bya bupe+ ku kisaka kyetu ne kulambula milambo kwi Lesa. 18 Byo naubilenga bino bintu, bantaaine mu nzubo ya Lesa saka netokesha kala mwayila mizhilo,+ bino kechi kwajinga jibumba nangwa kiwowo ne. Bino kwajingatu Bayudea bamo bafumine ku kibunji kya Asha 19 bonka bafwainwa kwiya kwi anweba ne kunshiina inge paji kyatama kyo bamwene mwi amiwa.+ 20 Nangwa ambilai bano baji pano beambile abo bene inge paji kyatama kyo bataaine mwi amiwa kimye kyo naimene mu kije kya Saniedilini, 21 kanatu byambo byo naambile kimye kyo nabijikile saka naimana mukachi kabo amba: ‘Lelo jino, babena kunchibila mambo na mambo a kuba naketekela kuba’mba bafwa bakasangulwa!’”+
22 Bino Felikisa byo ayukile bulongo pa mambo a jino Jishinda,+ wakainye bantu ne kwibambila’mba: “Poso Lisiasa mwine mukulumpe wa bashilikale akeye, po po nkemuchibila ano mambo enu.” 23 Kabiji wakambizhe mukulumpe wa bashilikale kumusopanga, bino saka eendela ne kubula kukanya balongo banji kwiya na kumukwasha.
24 Byo papichile moba amo, Felikisa waishile pamo na mukazhanji Dulusila wajinga Muyudea, kabiji watumineko ba kumwita Paulo kuba’mba omvwe byo aitabila mwi Kilishitu Yesu.+ 25 Bino Paulo byo aambilenga pa bololoke, kwikanya ne luzhachisho lukeya,+ Felikisa waubile moyo ne kwamba’mba: “Pa kino kimye akiyanga, bino umvwe nkekalepo na kimye, nkakwita jikwabo.” 26 Kabiji waketekejile’mba Paulo ukamupa mali. Na mambo a kino, wamwitanga javula ne kwisamba nanji. 27 Bino byo papichile myaka ibiji, Felikisa bamuswaine kwi Polokiusa Fesatusa; kabiji na mambo a kuba Felikisa wakebelenga kwibatokesha pa muchima Bayudea,+ washile Paulo mu kaleya.