Yelemiya
5 Pitañanai mu mikwakwa ya mu Yelusalema.
Kenkentai mumone.
Kebai mu mabanza anji mumone
Inge mwakonsha kutaanamo muntu uba bintu byaoloka,+
Muntu ukebesha kwikala wa kishinka,
Kabiji amiwa nkamulekelako mambo anji.
2 Nangwa kya kuba bamba’mba: “Byonkatu Yehoba byo aji na bumi!”
Abo bachipa bintu bya bubela.+
3 Anweba Yehoba, nanchi meso enu kechi akeba bukishinka nenyi?+
Anweba mwibakambwile, bino kechi bafunjijileko ne.*
Mwibavizhizhe, bino bakaine kuswa byo mwibafunjileko.+
4 Bino amiwa naambile mu muchima namba: “Kine, bano bantutu.
Boba bintu byabula maana, mambo kechi bayuka mashinda a Yehoba ne,
Kabiji kechi bayuka mizhilo ya Lesa wabo ne.
5 Amiwa nkaya ku bantu bo banemeka ne kwisamba nabo,
Mambo abo bafwainwa bayuka mashinda a Yehoba,
Mizhilo ya Lesa wabo.+
Pano bino, bonse bachimawine kikonkoji
Ne kuchibaula minyololo.”*
6 O ene mambo bokwe o ebalukukila,
Ne musuka wa mu kiselebwa o ebonawina,
Ne kisumpa o ebabelamina mu mizhi yabo.
Muntu yense ulupuka mu muzhi bamutabaula.
Mambo mizhilulwila yabo yavujisha;
Ne byubilo byabo byatama byakilamo.+
7 Pano nakonsha kwimulekelako byepi mambo pa bino bintu?
Baana benu bankaana,
Kabiji kechi bachipa kwi Lesa wa kine ne.+
Amiwa nebapele bintu byo bakebelenga,
Nangwa byonkabyo, batwajijiletu na kuba bukende,
Kabiji bayilenga ku nzubo ya mwanamukazhi pite.
8 Baji nobe bambili baji pa kipembela,
Babena kupangisha bakazhi ba bakwabo.+
9 Yehoba waamba’mba, “Nanchi amiwa kechi nafwainwa kwibazhachisha pa bino bintu nenyi?”
“Nanchi amiwa* kechi nafwainwa kushinkanya na kino kisaka nenyi?”+
10 “Lukukai bujimi bwanji bwa miñanzañanza ne kwibonauna,
Pano bino, kange mwibonaune bonsetu ne.+
Kopolaiko misampi yasapuka,
Mambo kechi yo ya kwa Yehoba ne.”
11 Yehoba waamba’mba, “Bena Isalela ne bena Yuda
Bansatukila.”+
Kafwako bya malwa biketufikila;
Kabiji kechi tukafwa ku mpoko nangwa ku kipowe kya nzala ne.’+
13 Bangauzhi babo bamba bintu byatutu,
Ne byambo* kechi baji nabyo ne.
Bakebonauna monka mwayila byambo byabo!”
14 Onkao mambo, Yehoba Lesa wa mabumba waamba’mba:
“Na mambo a kuba bano bantu babena kwamba bino,
Amiwa mbena kubika byambo byami mu kanwa kobe kwikala nobe mujilo,+
Ne bano bantu yo nkunyi,
Kabiji mujilo ukebasoka.”+
15 Yehoba waamba’mba, “Anweba bena Isalela,+ umvwai amiwa mbena kuleta kisaka kya bantu kufuma kwalepa.
Kyo kisaka kikekala myaka ne myaka.
Kyo kisaka kyajingako kala,
Kisaka kyamba mulaka ye mwabula kuyuka,
Kabiji kechi mwakonsha kumvwa byo kyamba ne.+
16 Fukuta wabo wa miketo uji nobe kilende kya kyashi;
Bonse bo babilobo.
17 Bakonauna majimi enu ne kajo kenu.+
Bakepaya baana benu ba balume ne baana benu ba bakazhi.
Bakepaya mikooko ne bañombe benu.
Bakonauna bichi byenu bya miñanzañanza ne bya makuyu.
Mizhi yenu yakosa yo mwakinkamo manungo bakeyonauna na mpoko.”
18 Yehoba waamba’mba, “Nangwatu mu oa moba amiwa kechi nkemonaunatu bonse pelu ne.+ 19 Kabiji inge bakemwipuzhe’mba, ‘Mambo ka Yehoba Lesa wetu kyo etubila bino bintu byonse?’ anweba mukebakumbule’mba, ‘Byonkatu byo mwankaine amiwa Lesa wenu ne kwingijila balesa bangi, byo byo mukengijilanga bantu ba mu kyalo kingi kyabula kyenu.’”+
20 Ambai bino byambo ku kisaka kya Yakoba,
Ne kutaya mbila mu Yuda, amba:
21 “Anweba bantu bakosama kabiji babula maana,*+ umvwai bino byambo:
22 Yehoba waamba’mba, ‘Nanchi anweba kechi mungakamwa amiwa nenyi?’
‘Nanchi kechi mwafwainwa kunchina nenyi?
Amiwa yami nabikile busenga kwikala mupaka wa kalunga ka mema,
Yami nakambizhe kuba’mba kalunga ka mema kabule kupitayila po kafwainwa kupelela
Nangwa kya kuba manyaki aimana, kechi akonsha kwikashinda ne;
Nangwa kya kuba manyaki akonsha kubaya byepi, kechi akonsha kupitaila pa kalunga ka mema ne.+
23 Pakuba bano bantu bakosa michima kabiji bo bansatuki;
Bansha amiwa ne kuya mu mashinda abo.+
24 Kabiji kechi bamba mu michima yabo amba:
“Twayai tumwakamwe Yehoba Lesa wetu,
Yenka witupa mvula mu kimye kyayo,
Mvula mutanshi ne upelako,
Kabiji yenka witutongwela milungu ya kunowenamo kajo ketu ne.”+
25 Bubi bwenu bwalengela bino bintu kubula kumweka;
Ne mambo enu emulengela kubula kumona bintu byawama.+
26 Mambo mu bantu bami mwatanwa ne bantu batama.
Babelamina bakwabo nobe bantu bata bañonyi tukose.
Bata kakose ka kwibepayilako.
Bata tukose kuba’mba bantu bafwemo.
27 Byonkatu kinsa byo kiyula na tuñonyi,
Ne mazubo abo ayula na bintu byo bamwena mu bujimbijimbi bwabo.+
O ene mambo o baikela na bulume ne kwikala na bunonshi.
28 Banuna ne kulezhima mibiji;
Bakizhamo kuba bintu byatama.
Kechi bachibila mambo mwana wabula bashanji ne,+
Boba kino kuba’mba abo bene bamwenemo;
Kabiji bakana kuchibila bayanji mambo monka mo aolokela.’”+
29 Yehoba waamba’mba, “Nanchi amiwa kechi nafwainwa kwibazhachisha pa bino bintu nenyi?”
“Nanchi amiwa* kechi nafwainwa kushinkanya na kino kisaka nenyi?
30 Kintu kya kukumya kabiji kyatama kyamweka mu kyalo:
31 Bangauzhi babo baula bintu bya bubela,+
Ne bañanga balama bantu monka mo bakebela.
Kabiji bantu bami batemwa bintu bya uno mutundu.+
Pano mukoba byepi umvwe mpelo ya bino bintu yafika?”