Nkalata ya Bubiji ku Bena Kolinda
8 Balongo bami, twakeba namba muyuke lusa lukatampe lwa Lesa lo amwesha bipwilo bya mu Makedonya.+ 2 Bapichilenga mu makatazho avula bingi, nangwa lusekelo lwabo lukatampe ne buyanji bwabo bibalengejile kwikala banonshi na mambo a bumpanyi bwabo. 3 Mambo bapainenga monka mwayijile bintu byo bajinga nabyo,+ ne amiwa nemwenejile, kine bapaine kukila ne pa bintu byo bajinga nabyo,+ 4 saka betusashijila na mukoyo pa mambo a kupana bya bupe, kuba’mba bengileko mwingilo wakukwasha bazhijikwa.+ 5 Kabiji baubile bintu byakijile pa byo twaketekejile, mambo patanshi bepaine abo bene kwi Nkambo ne kwi atweba kupichila mu kyaswa muchima wa Lesa. 6 Onkao mambo, twatundaikile Titusa+ amba, byonkatu byo atendekele uno mwingilo mwi anweba, atwajijile kwingila yenka uno mwingilo wa kutambula bya bupe byenu. 7 Nangwa byonkabyo, byonkatu byo mubena kuba bulongo mu bintu byonse, mu lwitabilo ne mu byambo ne mu kuyuka ne mu kwibikishako ne mu butemwe bo twimutemwa, twajijilai kupana na muchima yense bino bya bupe.+
8 Kechi mbena kwamba kino nobe kwimukambizha ne, bino mbena kwimubuula namba muyuke bingila bakwenu na mukoyo ne kwimweseka namba mmone butemwe bwenu bwa kine. 9 Mambo mwayuka lusa lukatampe lwa Nkambo yetu Yesu Kilishitu lwa kuba’mba, nangwa kya kuba wajinga munonshi, waalukile ke muyanji na mambo a anweba,+ pa kuba’mba mwikale banonshi kupichila mu buyanji bwanji.
10 Kabiji na mambo a kino nalanguluka namba:+ Kino kyo kimuwamina ne anweba, mwaka wapwa kechi mwajingatu batanshi kuba kino ne, bino mwamwesheshe ne muchima wa kukeba kwikyuba. 11 Onkao mambo, pa kino kimye pwishai akya kyo mwatendekele, pa kuba’mba akya kyo mwafuukwijile jimo mwikifikizhe monka mwayila bintu byo muji nabyo. 12 Mambo umvwe kuji kufuukwila jimo, kya bupe kitabilwa ke kyokya kipana muntu mwayila bintu byo aji nabyo,+ kechi mwayila bintu byo abula ne. 13 Mambo kechi nakeba’mba bamo kibapelele, bino anweba kimukatazhe ne; 14 bino amba kwikale kwesakana, bintu byenu byavula byo muji nabyo pa kino kimye bikwashe boba babulabyo, kuba’mba bintu byabo byavula nabyo bimukwashe mu byo mwakajilwa, pa kuba’mba bonse mwesakane. 15 Monka mo kyanembelwa’mba: “Muntu wajinga na byavula kechi waikele na byavujisha ne, kabiji muntu wajinga na bicheche naye kechi waikele na byakepeshatu ne.”+
16 Twamusanchila Lesa pa kulengela Titusa kwimuta muchima byonka byo twimuta muchima,+ 17 mambo waubijile monka mo bamutundaikijile, bino byo akebesha aye mwine, ubena kwiya kwi anweba. 18 Bino tubena kumutumina pamo na mulongo ye batakaika na mambo a kusapwila kwanji kwa mambo awama mu bipwilo byonse. 19 Kino kechi kyo kyonkatu ne, bino bamutongwele ne ku bipwilo kwikala mukwetu wa kwenda nanji mu mwingilo wa kupana kino kya bupe kuba’mba tumuletele lukumo Nkambo ne kumwesha’mba twipana kukwasha bakwetu. 20 Onkao mambo, twauba kino kuchina’mba muntu nangwa umo waketunena bibi na mambo a bino bya bupe byo tubena kupana.+ 21 Mambo atweba ‘tutesha muchima ku bintu byonse mu bukishinka, kechi kwi Yehoba* konkatu ne, bino ne ku bantu.’+
22 Kabiji tubena kwibatumina pamo na mulongo wetu ye twaeseka javula ne kutaana’mba wa kishinka mu bintu byavula, bino wakilamo kuteshako muchima na mambo a luketekelo lwanji lwakosa lo emuketekela. 23 Umvwe pajipo byo mukeba kuyuka pe Titusa, aye ye mukwetu kabiji twi ba mwingilo umo mu kwimwingijila; kabiji umvwe pajipo byo mukeba kuyuka pa balongo betu, abo bo batumwa ba bipwilo kabiji bamuletela lukumo Kilishitu. 24 Onkao mambo, bamweshai butemwe+ ne kumwesha bipwilo ene mambo o twitotela na mambo a anweba.