Ezikyo

40 Mu mwaka wa bu 25 ye twajinga mu buzha,+ ku ntendekelo ya mwaka, pa juba ja bujikumi ja ñondo, mu mwaka wa bu 14 kufuma kimye kyo baonawine muzhi,+ pa jonkaja juba bulume bwa Yehoba bwaishile pe amiwa, kabiji wansendele ne kuntwala mu muzhi.+ 2 Mu bimwesho byammwesheshe Lesa, Lesa wantwajile ku kyalo kya bena Isalela ne kungikazha pa mutumba walepesha+ pajinga kintu kyo bashimikile kyamwekelenga nobe muzhi ku kabeta ka ku bulenge.

3 Byo amfikizhe kokwa, namwene muntu wamwekelenga nobe mukuba.+ Walamine muzhinge wa bukusa ne jitete* ja kupiminako mu kuboko kwanji+ kabiji waimene mu kibelo. 4 Uno muntu wañambijile’mba: “Obewa mwana muntu, tajisha bulongo, telekesha ne kuteshako muchima* ku bintu byonse byo nsakukumwesha, mambo kyo kyo bakuletela kuno. Buula kisaka kya Isalela bintu byonse byo wamona.”+

5 Namwene nsakwa yazhokolokele pangye ya nzubo* ya Lesa. Uno muntu walamine jitete ja kupiminako mu kuboko kwanji jalepele makyubichi atanu na umo (kyubichi umo umo, bamulepesheko kwesakana na mu kuboko kwa muntu).* Watatwile kupima nsakwa, kabiji wataaine’mba kujita kwayo kwajinga jitete jimo ne kulepa kwayo kwajinga jitete jimo.

6 Kepo aishile ku kibelo kyatajile ku musela+ ne kukanjila pa bya kukanjijilapo. Byo apimine pa kibelo, mu bwipi mwajinga jitete jimo ne bula mwajinga jitete jimo, kabiji mu bwipi bwa pa kibelo kikwabo namo jitete jimo. 7 Tumazubo twa bakasopa twalepele jitete jimo ne mu bwipi jitete jimo. Kabiji kufuma pa kazubo kamo ka bakasopa+ kuya pa kakwabo pajinga makyubichi atanu. Pa kibelo kyaikejile kwipi na kibamba kya nzubo kya ku kibelo kyatajile mukachi, palepele jitete jimo.

8 Wapimine kibamba kya ku kibelo kyatajile mukachi, kabiji kyalepele jitete jimo. 9 Ponkapo wapimine kibamba kya ku kibelo, kyalepele makyubichi atanu na asatu; kabiji wapimine mashiki a kibamba ajinga makyubichi abiji; kabiji wapimine kibamba kya ku kibelo kyatajile mukachi.

10 Ku bushiya ne bushiya bwa kibelo kyajinga ku musela, kwajinga tumazubo tusatu twa bakasopa. Tuno tumazubo tonse tusatu twaesakenetu pamo, ne mashiki ajinga ku bushiya ne bushiya bwa kibelo aesakene.

11 Kabiji wapimine bwipi bwa kibelo pajinga makyubichi 10; ne bula bwa kibelo bwajinga makyubichi 13.

12 Tubibamba twaikejile kulutwe ya tumazubo twa bakasopa twajinga kyubichi umo mu bula ne mu bwipi. Kabiji tumazubo twa bakasopa twajinga makyubichi atanu na umo mu bula ne mu bwipi.

13 Kepo apimine kibelo kufuma ku musemi wa kazubo kamo ka kwa kasopa kufika ku musemi wa kazubo kakwabo,* kabiji pajinga makyubichi 25; kibelo kimo kyatajile ku kibelo kikwabo kyajinga ku bushiya.+ 14 Kabiji wapimine mashiki alepele makyubichi 60, ne mashiki akwabo ajinga mu bibelo byonse byajinga ku kipango. 15 Kufuma patendekela kibelo kukafika patendekela kibamba kya pa kibelo mukachi ka kibelo pajinga makyubichi 50.

16 Ku bushiya ne bushiya bwa kibelo, kwajinga tumazubo twa bakasopa ne mashiki, kabiji bino byonse byajinga na bipenze byo babikilemo mafulemu+ o bapikankenye. Ne mukachi mu kazubo namo mwajinga bipenze ku bushiya ne bushiya. Kabiji pa mashiki onse a pa bibelo balengejilepo bintu byamwekelenga nobe kya bisonga.+

17 Kepo antwajile mu kipango kya pangye, ne amiwa namwenemo bibamba* mwa kujiila+ ne mukwakwa ye baajilemo mabwe wazhokolokele kipango. Mu uno mukwakwa ye baajilemo mabwe mwajinga bibamba 30 mwa kujiila. 18 Mukwakwa ye baajilemo mabwe wajinga ku bibelo, waesakene pamo na bula bwa bibelo. Uno mukwakwa ye baajilemo mabwe waikejile munshi.

19 Kabiji wapimine bula bwajinga pakachi ka kibelo kyaikejile munshi kufika ku kipango kya mukachi. Pajinga makyubichi 100 kufuma ku musela kufika ku kabeta ka ku buyeke.

20 Kipango kya pangye kyajinga na kibelo kyatajile ku kabeta ka ku buyeke, kabiji wapimine bula ne bwipi bwakyo. 21 Kyajinga na tumazubo tusatu tusatu twa bakasopa ku bushiya ne bushiya. Mashiki akyo ne kibamba kya pa kibelo byaesakenetu pamo na byobya byajinga ku kibelo kitanshi. Mu bula kyajinga makyubichi 50, ne makyubichi 25 mu bwipi. 22 Bipenze byakyo, kibamba kyakyo kya pa kibelo ne bintu byo balengejile pa mashiki byamwekelenga nobe kya bisonga,+ byaesakenetu pamo na byobya byajinga ku kibelo kyajinga ku musela. Pa kuba’mba bantu batwele mukachi, bakanjijilanga pa bya kukanjijilapo byajinga na pa kunyanta patanu na pabiji, ne kibamba kyakyo kya pa kibelo kyajinga kulutwe yakyo.

23 Kwajinga bibelo byajinga mu kipango kya mukachi kyatajile ku kibelo kyajinga ku kabeta ka ku buyeke ne kyajinga ku musela. Wapimine bula bwajinga pakachi ka kibelo kimo kufika pa kibelo kikwabo, kabiji pajinga makyubichi 100.

24 Ponkapo wantwajile ku kabeta ka ku bulenge, kabiji namwene kibelo kyajinga ku kabeta ka ku bulenge.+ Wapimine mashiki akyo onse ne kibamba kya pa kibelo kyakyo kabiji byonse byaesakenetu pamo na bikwabo. 25 Ku bushiya ne bushiya bwa kibelo kwajinga bipenze ne kibamba kya pa kibelo, byonka byajinga bipenze bikwabo. Mu bula mwajinga makyubichi 50, ne makyubichi 25 mu bwipi. 26 Pa kutwelela pajinga bya kukanjijilapo byajinga na pa kunyanta patanu na pabiji,+ ne kibamba kyakyo kya pa kibelo kyajinga kulutwe yakyo. Kabiji ponse pa mashiki akyo balengejilepo bintu byamwekelenga nobe bisonga.

27 Kipango kya mukachi kyajinga na kibelo kyatajile ku kabeta ka ku bulenge; kabiji wapimine bula kufuma ku kino kibelo kufika ku kibelo kikwabo kyajinga ku kabeta ka ku bulenge, kabiji pajinga makyubichi 100. 28 Kabiji wantwajile mu kipango kya mukachi kutwelela ku kibelo kyajinga ku kabeta ka ku bulenge; kabiji byo apimine kibelo kyajinga ku kabeta ka ku bulenge, kyaesakenetu pamo na bibelo bikwabo. 29 Tumazubo twa bakasopa, mashiki akyo ne kibamba kyakyo kya pa kibelo, byaesakenetu pamo na byobya byajinga ku bibelo bikwabo. Ku bushiya ne bushiya bwa kibelo kwajinga bipenze ne kibamba kya pa kibelo. Mu bula kyajinga makyubichi 50, ne makyubichi 25 mu bwipi.+ 30 Ku bibelo byonse kwajinga bibamba bya pa kibelo; mu bula bwa kibamba mwajinga makyubichi 25, ne makyubichi 5 mu bwipi. 31 Kibamba kya pa kibelo kyatajile ku lubanza wa pangye, kabiji kibelo kyajinga na mashiki ajinga na bintu byamwekelenga nobe bisonga.+ Kabiji pa kutwela mukachi bakanjijilanga pa bya kukanjijilapo byajinga na pa kunyanta patanu na pasatu.+

32 Byo antwezhezhe mu kipango kya mukachi kutwelela ku musela, wapimine kibelo kabiji kyaesakenetu pamo na bibelo bikwabo. 33 Tumazubo twa bakasopa, mashiki akyo ne kibamba kyakyo kya pa kibelo, byaesakenetu pamo na byobya byajinga ku bibelo bikwabo. Kibelo kyajinga na kibamba kyakyo kya pa kibelo kabiji ku bushiya ne bushiya kwajinga bipenze. Mu bula kyajinga makyubichi 50, ne makyubichi 25 mu bwipi. 34 Kibamba kya pa kibelo kyatajile ku kipango kya pangye, kabiji ku bushiya ne bushiya bwa kibamba kwajinga mashiki o balengejilepo bintu byamwekelenga nobe bisonga. Kabiji pa kutwela mukachi bakanjijilanga pa bya kukanjijilapo byajinga na pa kunyanta patanu na pasatu.

35 Ponkapo wantwajile ku kibelo kyajinga ku kabeta ka ku bulenge+ kabiji byo ekipimine; kyaesakenetu pamo na bibelo bikwabo. 36 Tumazubo twa bakasopa, mashiki akyo ne kibamba kyakyo kya pa kibelo, byaesakenetu pamo na byobya byajinga ku bibelo bikwabo. Kibelo kyajinga na bipenze ku bushiya ne bushiya. Mu bula kyajinga makyubichi 50, ne makyubichi 25 mu bwipi. 37 Mashiki akyo atajile ku kipango kya pangye, kabiji ku bushiya ne bushiya bwa mashiki akyo balengejilepo bintu byamwekelenga nobe bisonga. Kabiji kyajinga na kya kukanjijilapo kyajinga na pa kunyanta patanu na pasatu.

38 Kibamba kya kujiilamo ne kibelo kyakyo kyajinga kwipi na mashiki a bibelo mo baovwelanga milambo ya kusoka.+

39 Ku mbaji yonse ibiji ya kibamba kya pa kibelo kwajinga matebulu abiji po baipayilanga banyama ba milambo yonse ya kusoka,+ milambo ya bubi+ ne milambo ya mambo.+ 40 Kabiji ku kibelo kya ku kabeta ka ku buyeke kwajinga matebulu abiji pangye ya kibelo. Kwajinga ne matebulu abiji mukachi, mu kibamba kya pa kibelo. 41 Ku bibelo byonse kwajinga matebulu ana, onse pamo ajinga atanu na asatu po baipayilanga banyama ba kutapisha. 42 Matebulu ana a kubikapo milambo ya kusoka bealengele na mabwe a kusonga. Mu bula ajinga kyubichi umo ne kichika, mu bwipi namo kyubichi umo ne kichika, kabiji alepele kyubichi umo. Pa ano matebulu po po batulanga bintu bya kwingijisha pa kwipaya banyama ba milambo ya kusoka ne bitapisho. 43 Mashelufu alepele kwesakana na mu kuboko kwa muntu, beapopele kuzhokoloka lubumbulu yense wa mukachi; kabiji pa matebulu batulangapo nyama ya milambo.

44 Pangye ya kibelo kya mukachi pajinga bibamba mwa kujiila banyimbi;+ byajinga mu kipango kya mukachi kwipi na kibelo kyajinga ku kabeta ka ku buyeke kyatajile ku kabeta ka ku bulenge. Kabiji kibamba kikwabo mwa kujiila kyajinga kwipi na kibelo kyajinga ku musela kyatajile ku kabeta ka ku buyeke.

45 Wañambijile’mba: “Kino kibamba mwa kujiila kyatala ku kabeta ka ku bulenge, kyo kya bañanga bengila mingilo mu nzubo ya Lesa.+ 46 Kabiji kibamba mwa kujiila kyatala ku kabeta ka ku buyeke, kyo kya bañanga bengila mwingilo wa ku kya kusokelapo bitapisho.+ Bano bo ba mu kisemi kya kwa Zadoki,+ bafumine mu bena Levi bo bapele mwingilo wa kwiya kwi Yehoba na kumwingijila.”+

47 Kepo apimine kipango kya mukachi. Mu bula kyajinga makyubichi 100 ne mu bwipi namo makyubichi 100, ko kuba’mba mu mbaji yonse ina ya kipango mwajinga makyubichi amu 100 amu 100. Kya kusokelapo bitapisho kyajinga kulutwe ya nzubo ya Lesa.

48 Ponkapo wantwezhezhe mu kibamba kya pa kibelo kya nzubo ya Lesa,+ kabiji wapimine bula bwa jishiki ja ku kibamba kya pa kibelo, kabiji ku bushiya bumo kyajinga makyubichi atanu ne ku bushiya bukwabo nako makyubichi atanu. Mu bwipi bwa kibelo ku lubaji lumo kwajinga makyubichi asatu, ne ku lubaji lukwabo nako makyubichi asatu.

49 Kibamba kya pa kibelo kyajinga makyubichi 20 mu bula ne makyubichi 11* mu bwipi. Pa kuba’mba bantu batwele mukachi, bakanjijilanga pa bya kukanjijilapo. Ku mbaji konse kubiji kwa kibamba kya pa kibelo kwajinga mashiki aku jimo, aku jimo.+