Ezikyo
43 Kabiji wantwajile ku kibelo kyatajile ku musela.+ 2 Byo nafikile kokwa, namwene lukumo lwa Lesa wa Isalela saka lwiya kufuma ku musela,+ kabiji jiwi janji jaumvwanyikilenga nobe mpoota ya mema;+ ne pa ntanda patokeletu too na mambo a lukumo lwanji.+ 3 Kintu kyo namwene, kyajinga nobe kimwesho kyo namwene kimye kyo naishile na konauna muzhi; kabiji kyamwekelengatu nobe kintu kyo namwene ku mukola wa Keba;+ ponkapo naponene panshi kinkuvumene.
4 Kabiji lukumo lwa Yehoba lwatwelele mu nzubo ya Lesa kupichila mu kibelo kyatajile ku musela.+ 5 Ponkapo mupashi wanshikwile ne kuntwala mu kipango kya mukachi, kabiji namwene nzubo ya Lesa saka yakumbana lukumo lwa Yehoba.+ 6 Kepo naumvwine jiwi ja muntu mu nzubo ya Lesa saka amba kwi amiwa, kabiji uno muntu waishile ne kwimana kwipi ne amiwa.+ 7 Lesa wañambijile’mba:
“Obewa mwana muntu, ino mpunzha mo muji jitanda jami+ ne pa kunyanta maulu ami,+ amuno mo mo nkekala na bena Isalela myaka ne myaka.+ Kisaka kya Isalela ne bamfumu bakyo, kechi bakatamishapo jibiji jizhina jami jazhila+ na mambo a kubula bukishinka kwi amiwa* ne na mibiji ya bamfumu babo bafwa ne. 8 Byo babikile kibelo kyabo kwipi na kibelo kyami ne mashiki abo kwipi na mashiki ami, byo pajingatu lubumbulu pakachi kabo ne amiwa,+ batamishe jizhina jami jazhila na bintu bya bunya byo baubilenga, o ene mambo o nebonawijile, mambo banzhingijishe.+ 9 Onkao mambo, baleke kubula bukishinka kwi amiwa* ne kufumya mibiji ya bamfumu babo bafwa kwi amiwa, ne amiwa nkekala nabo myaka ne myaka.+
10 “Pakuba obewa mwana muntu, ubuule kisaka kya Isalela bikekala nzubo ya Lesa,+ pa kuba’mba kikebalenge bumvu na mambo a bubi bwabo,+ kabiji bafwainwa kuyuka byo ikamwekanga.* 11 Umvwe kikebalenge bumvu pa bintu byonse byo bauba, ukebamweshe bikekala nzubo ya Lesa panshi, byo ikamwekanga, bibelo mo bakalupukilanga ne mo bakatwelelanga.+ Ukebamweshe bintu byonse byo ikamwekanga panshi, bintu bya kulondela ne mizhilo yayo yonse. Kabiji ukebinembe byonse saka bamonako pa kuba’mba bakebilame ne kulondela mizhilo yonse ya byo ikekala.+ 12 Uno ye muzhilo wa bikekala nzubo ya Lesa. Mpunzha yonse iji peulu ya mutumba yo yazhijisha.+ Umvwa! Uno ye muzhilo wa bikekala nzubo ya Lesa.
13 “Bino byo bya kupima kya kusokelapo bitapisho mu makyubichi+ (kyubichi yense bamulepesheko kwesakana na mu kuboko kwa muntu).* Ku kitako kya kya kusokelapo bitapisho ne mu bwipi bwakyo mukekale kyubichi umo. Konse kwapela bakazhokolosheko momeno walepa kichika* kya kyubichi. Bino byo bikekala kitako kya kya kusokelapo bitapisho. 14 Kufuma pa kitako panshi kukafika ku momeno peulu pakekale makyubichi abiji, ne mu bwipi bwakyo mukekale kyubichi umo. Kufuma ku momeno mucheche kukafika ne ku momeno wakyo mukatampe pakekale makyubichi ana, ne mu bwipi bwakyo mukekale kyubichi umo. 15 Kyoto kya pa kya kusokelapo bitapisho kikekale makyubichi ana, kabiji pakapelela kyoto kya pa kya kusokelapo bitapisho bakabikepo nsengo ina.+ 16 Kyoto kya pa kya kusokelapo bitapisho kyaesakene monse muna, mu bula makyubichi 12 ne makyubichi 12 mu bwipi.+ 17 Mu mbaji yonse ina ya momeno wa ku kya kusokelapo bitapisho, mu bula mwajinga makyubichi 14 ne mu bwipi mwajinga makyubichi 14. Kabiji kwapela kwalepele kichika kya kyubichi, ne kitako kyakyo kyajinga kyubichi umo konse konse.
“Kabiji bya kukanjijilapo byakyo byatajile ku musela.”
18 Kepo añambijile’mba, “Obewa mwana muntu, Nkambo Mfumu Yehoba waamba’mba: ‘Ino yo mizhilo ya kulondela byo mukapwisha kulenga kya kusokelapo bitapisho, pa kuba’mba bakasokelengapo milambo yonse ne kusansapo mashi.’+
19 “Nkambo Mfumu Yehoba waamba’mba, ‘Mukalambule mwana ñombe kwikala mulambo wa bubi+ ku ba mu kisemi kya kwa Zadoki+ bafumine mu bañanga ba bena Levi beya kwi amiwa na kuñingijila.’ 20 ‘Mukashikulepo mashi amo mukeashinge ku nsengo ina ya ku kya kusokelapo bitapisho, ne pa makonka ana a ku momeno wakyo ne kuzhokolosha konse, pa kuba’mba mukekitokeshe ku bubi ne kwikifuchila mambo akyo.+ 21 Apa bino mukashikulepo mwana ñombe wa mulambo wa bubi, pa kuba’mba bañanga bakamusokele pa mpunzha ya mu nzubo ya Lesa pangye.+ 22 Pa juba ja bubiji mukalambule mbuzhi mulume wabula bulema kwikala mulambo wa bubi; ne abo bakatokeshe kya kusokelapo bitapisho ku bubi byonkatu byo bekitokesheshe ku bubi na mwana ñombe.’
23 “‘Byo mukapwisha kwikitokesha ku bubi, mukalambule mwana ñombe wabula bulema ne mukooko mulume wabula bulema wa mu jitanga. 24 Anweba mukebilambule kwi Yehoba, kabiji bañanga bafwainwa kubikako mukele+ ne kwibilambula kwikala mulambo wa kusoka kwi Yehoba. 25 Pa moba atanu na abiji mukalambulenga mbuzhi mulume kwikala mulambo wa bubi,+ ne mwana ñombe ne mukooko mulume wa mu jitanga; mukalambulenga banyama babula bulema.* 26 Kabiji pa moba atanu na abiji bakapananga mulambo wa kufuchila mambo a kya kusokelapo bitapisho, kabiji bafwainwa kwikitokesha kuba’mba bakekingijishenga. 27 Ano moba byo akapwa, pa juba ja butanu na busatu+ ne kuya kulutwe, bañanga bakalambulanga milambo yenu* ya kusoka ne milambo ya mutende pa kya kusokelapo bitapisho; ne amiwa nkemutemwa bingi,’+ byo byaamba Nkambo Mfumu Yehoba.”