Danyela

4 “Mfumu Nebukaneza waambijile mitundu yonse ya bantu, bisaka bya bantu ne bantu bamba milaka yapusana pusana bekala pano pa ntanda ponse amba: Mutende ekale ne anweba! 2 Nakebesha bingi kwamba pa biyukilo ne bya kukumya byangubila Lesa Mwine Wakila. 3 Biyukilo byanji ne mingilo yanji yo ya kukumya! Bufumu bwanji bo bwa myaka ne myaka, ne bukalama bwanji bo bwa ku bisemi byonsetu.+

4 “Amiwa Nebukaneza, naikelenga mu kipango kya nzubo yami ku matwi nzoo kabiji namwenenga byawama. 5 Nalotele kiloto kyandengejile kumvwa moyo. Byo nalaajile pa mwanya, bipashañano ne bimwesho byo namwene byandetejile bingi moyo.+ 6 Onkao mambo, nakambizhe namba balete banabalume bonse ba maana ba mu Babilona kuba’mba beye bandumbulwile mwatala kiloto kyami.+

7 “Ponkapo bañanga ba lubuko, boba bingelekezha, bena Kalodeya* ne bashayuka ba tubangabanga+ batwelele. Byo nebabuujile kiloto kyami, bakankelwe kundumbulwila mo kyatala.+ 8 Kyapeleleko, Danyela ye batumbile amba Beleteshaza+ kunemeka jizhina ja lesa wami+ kabiji yenka wajinga na mupashi wa balesa bazhila+ waishile kwi amiwa, ne amiwa namubuujile kiloto kyami namba:

9 “‘Obewa Beleteshaza mukulumpe wa bañanga ba lubuko,+ nayuka namba uji na mupashi wa balesa bazhila,+ kabiji amba kafwako kintu kyo wakonsha kukankalwa kusolola ne.+ Onkao mambo, mbuule bimwesho byo namwene mu kiloto kyami ne kwibilumbulula mo byatala.

10 “‘Byo nalaajile pa mwanya, mu bimwesho byami namwene kichi+ pakachi ka ntanda kyalepa bingi.+ 11 Kino kichi kyakomene ne kukosa, kyafikile ne mwiulu kabiji kyamwekelenga konse kwapela ntanda. 12 Mabuula akyo amwekelenga bingi bulongo kabiji kyapangile bipangwa byavula bingi, kyajinga na kajo ka kuja bilengwa byonse. Banyama ba mungye baikelenga munshi yakyo ne bañonyi baikelenga ku misampi yakyo, kabiji bilengwa byonse byajiilenga kajo kapangangako.

13 “‘Mu bimwesho byami byo namwene saka nalaala pa mwanya, namwene kasopa, wazhila saka ekila kufuma mwiulu.+ 14 Wabijikile’mba: “Tema kichi,+ kopola misampi yakyo, pulula mabuula akyo ne kukunta bipangwa bijiko! Banyama banyememo munshi yakyo ne bañonyi batumbukeko ku misampi yakyo. 15 Pano bino, ushe kishiki na mizhazhi yakyo mu mushiji monka mu nsono mungye kabiji upombeko kyela kya kapotwe ne mukuba. Wikileke kizobe na kime kabiji kikale monka muji banyama mu nsono mungye.+ 16 Muchima wakyo afume mu bumuntu, kikale na muchima wa bunyama poso pakapite bimye bitanu na bibiji.+ 17 Uno ye mukambizho wa bakasopa,+ kabiji byo byambo byaambile aba bazhila, kuba’mba bantu bomi bayuke’mba

Mwine Wakila ye Kalama mu bufumu bwa bantu,+ kabiji amba ye upana bufumu ku muntu yense ye akeba kabiji ubika bantu bo balengulula pa bufumu.”

18 “‘Kino kyo kiloto amiwa Mfumu Nebukaneza kyo nalotele; pano obewa Beleteshaza ndumbulwile mo kyatala, mambo banabalume bonse ba maana ba mu bufumu bwami bakankalwa kundumbulwilakyo.+ Pakuba obewa usankundumbulwila mambo uji na mupashi wa balesa bazhila.’

19 “Pa kyokya kimye, Danyela wa jizhina ja Beleteshaza+ wakikankamenetu, ne kumvwa moyo pa bintu byo alangulukilenga.

“Mfumu wamwambijile’mba, ‘Obewa Beleteshaza, kange umvwe moyo na mambo a kiloto ne mo kyatala ne.’

“Beleteshaza waambile’mba, ‘Anweba nkambo yami, kino kiloto kyambe pa boba bemushikwa ne ndumbulwilo yakyo yambe pa balwanyi benu.

20 “‘Akya kichi kyo mwamwene, kyakomene ne kukosa, kyafikile mwiulu kabiji kyamwekelenga konse kwapela ntanda,+ 21 kyajinga na mabuula amwekelenga bingi bulongo, kyapangile bipangwa byavula bingi, kyajinga na kajo ka kuja bilengwa byonse, kyajinga na kimfutele mwaikalanga banyama ba mungye kabiji kyajinga na misampi kwaikelenga bañonyi,+ 22 ye anweba mfumu, mambo anweba mwatumbalala ne kukosa, ne bulume bwenu bwabaya kabiji bwafika ne mwiulu,+ ne bukalama bwenu bwakumbana ntanda yonse.+

23 “‘Kabiji mfumu wamwene kasopa, wazhila+ saka ekila kufuma mwiulu waambilenga’mba: “Tema kichi ne kwikyonauna, bino ushe kishiki na mizhazhi yakyo mu mushiji monka mu nsono mungye kabiji upombeko kyela kya kapotwe ne kya mukuba. Wikileke kizobe na kime kabiji kikale monka muji banyama mu nsono mungye poso pakapite bimye bitanu na bibiji.”+ 24 Bino byo byo kyalumbulula, anweba mfumu; kyalumbulula bintu bimutongwela Mwine Wakila bikemumwekela anweba nkambo yami mfumu. 25 Anweba bakemufumya ku bantu, mukekalanga na banyama ba mungye, mukajanga nsono nobe bañombe; mukazobanga na kime+ kabiji pakapita bimye bitanu na bibiji,+ kufikatu ne byo mukayuka’mba Mwine Wakila ye Kalama mu bufumu bwa bantu, kabiji amba ye upana bufumu ku muntu yense ye akeba.+

26 “‘Bakambizhe’mba kishiki bekishe na mizhazhi yakyo,+ mambo bufumu bwenu bukekala bwenu jikwabo kimye kyo mukayuka’mba Lesa ye ubena kulama mwiulu. 27 Onkao mambo, anweba mfumu, umvwai bintu byo mbena kwimubuulako. Lekai kuba bintu byatama, mubenga byawama, kabiji muleke kuyanjisha bantu, mubilenga bayanji lusa. Umvwe mwauba bino, kampe bakemunungilako moba enu a kwikala bulongo.’”+

28 Bino byonse byamumwekejile Mfumu Nebukaneza.

29 Byo papichile bañondo 12 waendelenga pa musemi wa nzubo yanji ya bufumu mu Babilona. 30 Mfumu waambilenga’mba: “Nanchi uno kechi ye muzhi Mukatampe wa Babilona ye nashimikijile ba ku bufumu na bulume bwami, ngovu ne na lukumo lwami nenyi?”

31 Mfumu byo akyambilenga, jiwi jafumine mwiulu amba: “Obewa Mfumu Nebukaneza, yobe babena kwambapo, ‘Bufumu bakwangatabo,+ 32 kabiji bakufumya ku bantu. Ukekalanga na banyama ba mungye, ukajanga nsono nobe bañombe, kabiji pakapita bimye bitanu na bibiji, kufikatu ne byo ukayuka’mba Mwine Wakila ye Kalama mu bufumu bwa bantu, kabiji amba ye upana bufumu ku muntu yense ye akeba.’”+

33 Pa kyonkakya kimye, byambo byo baambile pe Nebukaneza byafikile. Bamufumishe ku bantu, kabiji watendekele kuja nsono nobe bañombe, ne mubiji wanji wazobelenga na kime kufikatu ne nsuki yanji byo yalepele nobe mayona a mpungu ne ngala yanji yamwekelenga nobe ya bañonyi.+

34 “Abya bimye byo byapwile,+ amiwa Nebukaneza natajile mwiulu, kabiji maana ami abwelelemo; natakaikile Mwine Wakila, kabiji namutotele ne kumupa lukumo aye waikala myaka ne myaka, mambo bukalama bwanji bo bwa myaka ne myaka ne bufumu bwanji bo bwa ku bisemi byonsetu.+ 35 Bantu bonse bekala pano pa ntanda wibamonatu nobe bafwapo, kabiji uba bintu monka mwayila kyaswa muchima wanji ku mazhita a mwiulu ne ku bantu bekala pano pa ntanda. Kabiji kafwako muntu nangwa umo wakonsha kumukanya*+ nangwa kumwambila’mba, ‘Ki ka kyo mwauba?’ ne.+

36 “Pa kyokya kimye, maana ami abwelelemo, kabiji lukumo lwa bufumu bwami, bulume bwami ne kutumbalala kwami byambwelejile.+ Babitumbafumu ne babinemanga bami bankebele kebele kabiji naikajikilwe pa bufumu jibiji ne kunemekwa bingi kukila kala.

37 “Pano luno, amiwa Nebukaneza mbena kutota, kutumbijika ne kupana lukumo ku Mfumu wa mwiulu,+ mambo mingilo yanji yonse yo ya kine+ ne mashinda anji onse o aoloka, mambo ulengesha bumvu bantu betota.”+