Musapwishi

7 Jizhina* jawama, jawama kukila manyi a mutengo,+ ne juba ja kufwa jawama kukila juba ja kusemwa. 2 Kyawama kuya ku nzubo kuji kijilo kukila kuya ku nzubo kuji majiila,+ mambo muntu yense ufwa, kabiji aba bakiji bomi bafwainwa kuvulukanga kino. 3 Kwikala na bulanda kwawama kukila tuseko,+ mambo kupopomenwa kunekenya muchima.+ 4 Muntu wa maana ulanguluka pa bumi ne lufu, pakuba muntu wakosama ulangulukatu pa bya kisangajimbwe.*+

5 Kyawama kumvwina bikufundako muntu wa maana+ kukila kuteleka ku nyimbo ya bantu bakosama. 6 Mambo tuseko twa bantu bakosama tujitu nobe kutotauka kwa miba ibena kuteema munshi ya mpuki;+ kino nakyo kyo kyatutu. 7 Pano bino, bya malwa byakonsha kulengela muntu wa maana kuba bintu nobe mukonye, kabiji mazhikakanwa avulañanya muchima wa muntu.+

8 Mpelo ya kintu yawama kukila ntendekelo yakyo. Kutekanya kwawama kukila kwilundumika.+ 9 Kechi mwafwainwa kuzhingilanga bukiji* ne,+ mambo bantu bakosama* bo bazhingila bukiji.+

10 Kange mwambe’mba, “Mambo ka moba a kala o awamine kukila ano?” ne. Mambo kwipuzha bino kumwesha kubula maana.+

11 Kwikala na maana ne bya buswanyi kwawama kabiji kukwasha boba bakiji na bumi. 12 Mambo maana akwashañana+ byonkatu mali byo akwashañana,+ bino buwame bwa kuyuka bintu ke bwa kuba’mba: Maana alengela muntu uji nao kwikala na bumi.+

13 Akilangulukai pa bintu byauba Lesa wa kine, ñanyi wakonsha kuwamisha bintu byo aswisha kuya munsunya?+ 14 Pa juba ja bya malwa, mwafwainwa kuvuluka’mba Lesa waswisha moba awama+ ne atama*+ kuba’mba bantu babule kuyuka* bintu bikebamwekela kulutwe.+

15 Mu bwikalo bwami bwatu,+ namona muntu waoloka byo afwila mu bololoke bwanji,+ ne muntu watama byo ekala moba avula nangwa kya kuba uba bintu byatama.+

16 Kechi mwafwainwa kukizhamo kwimona koloka+ nangwa kukizhamo kwimwesha’mba muji na maana ne.+ Mambo ka o mukebela kwiipayisha anweba bene?+ 17 Kange mukizhemo kuba bubi nangwa kwikala bantu bakosama ne.+ Nanchi mambo ka o mukebela kufwila bukiji?+ 18 Kyawama kumvwina lujimuno lonse,+ mambo awa wakamwa Lesa umvwina byonse byo bamujimunako.

19 Maana alengela muntu wa maana kwikala na bulume kukila bantu bakosa jikumi baji mu muzhi.+ 20 Mambo kafwako muntu nangwa umo pano pa ntanda ubatu byawama kimye kyonse kwa kubula kulengapo mambo ne.+

21 Kabiji kange muteshe muchima ku bintu byonse byamba bantu ne;+ kuchina’mba mwakomvwa wa mwingilo wenu na kwamba byatama pe* anweba; 22 mambo mwayukishatu bulongo kuba’mba ne anweba mwakyambilapo kala bakwenu byambo byatama.+

23 Na maana ami onse, nalangulukilepo bingi pa bino bintu byonse, kabiji naambile namba: “Nkekala na maana.” Pano bino, nakankelwe kwikala nao. 24 Bintu byonse byamweka kala kechi nakonsha kwibiyuka ne, byavujisha. Ñanyi wakonsha kwibikwatakanya?+ 25 Natele muchima wami pa kukeba kuyuka bintu bikwabo, mambo nakebeshe kuyuka maana byo aji ne ene mambo bintu o byaikelako. Kabiji nakebeshe kuyuka kukosama ne bukonye kyo byatamina.+ 26 Kepo nataaine kino kuba’mba: Kintu kyakila lufu ke mwanamukazhi uji nobe kakose ne muchima wanji uji nobe bukonde ne maboko anji aji nobe minyololo. Awa utokesha Lesa wa kine ku muchima kechi ukafwamo ne,+ pakuba ndengamambo ukafwamo.+

27 Musapwishi waamba’mba:+ “Umvwai, abino byo byo nataaine. Nakebele kebele bintu byonse kuba’mba ngyuke byo biji, 28 pano bino, bintu byo nakebele* kebelenga kechi nebitaaine ne. Pa bantu kiumbi, nataainepotu mwanamulume umo waoloka, bino kafwako mwanamukazhi nangwa umo waoloka ye nataainemo ne. 29 Akino kyo kyo nataaine kuba’mba: Lesa wa kine walengele bantu baoloka,+ bino bantu bene bakeba kwiubila bintu byavula.”+