Ezikyo
47 Ponkapo wambwezhezhe ku kibelo kya nzubo ya Lesa,+ kabiji namwene mema saka akonkolokela ku musela kufumina panshi ya kibelo kya nzubo ya Lesa,+ mambo ino nzubo ya Lesa yatajile ku musela. Mema akonkolokelenga kufumina ja ku kilujo kya nzubo ya Lesa ne kupichila ku kabeta ka ku bulenge bwa kya kusokelapo bitapisho.
2 Kepo andupwijile pangye ku kibelo kya ku kabeta ka ku buyeke+ ne kuntwala pangye kumpisha ku kibelo kya pangye kyatajile ku musela,+ kabiji namwene mema akonkolokelenga pachepache kufumina ja ku kilujo.
3 Uno muntu byo ayile ja ku musela saka asenda lutambo wa kupiminako mu maboko anji,+ wapimine makyubichi* 1,000 kabiji wañambijile kwabuka pa mema; mema afikile mu tupokoso.
4 Kepo apimine makyubichi akwabo 1,000, kabiji wañambijile kwabuka pa mema, ne mema afikile mu manungo.
Wapimine makyubichi akwabo 1,000, kabiji wañambijile kwabuka pa mema, ne mema afikile mu lubunda.
5 Kabiji byo apimine makyubichi akwabo 1,000, namwene kakola ko nakonsheshe kubula kwabuka, mambo mema avujile bingi a kulengela muntu kukankalwa kufwenka. Kano kakola kavujile bingi mema a kukankalwa kwabuka panshi.
6 Wangipwizhe’mba: “Obewa mwana muntu, wikimona kino nyi?”
Kabiji wambuujile kuba’mba mbwele ku kitulu kya kakola. 7 Byo nabwelele, namwene bichi byavula bingi ku kitulu kya kakola ku bushiya ne bushiya.+ 8 Kepo añambijile’mba: “Ano mema akonkolokela ku mpunzha yaikela ku musela shoo ne mu Alaba,*+ apa bino akafika ne mu kalunga ka mema. Ano mema byo akafika mu kalunga ka mema,+ akalengela mema a mu kalunga kwikala ke awama. 9 Konse kukakonkolokelanga mema,* bilengwa* byumi byonse ko ko bikekalanga. Kabiji mukekala masabi avula bingi, mambo ano mema akakonkolokelanga monka. Ne mema a mu kalunga ka mema akawama bingi kabiji konse kukaya uno mukola, bintu byonse ko ko bikekala.
10 “Bantu bakwata masabi bakemana kunsa ya mukola kufuma ku mpunzha ya Enagedi+ kukafika ne ku Enegalaimu, ko baanyikilanga makonde. Mukekala mitundu ya masabi yavula bingi, byonkatu biji masabi aji mu Kalunga ka Mema Kakatampe.*+
11 “Ku kano kalunga kukekala misapa ne mateshi, kabiji bino kechi bikekala na mema awama ne. Abino byonse bikalukatu ke mukele.+
12 “Bichi byonse byapusana pusana bipanga bipangwa, bikamenena ku bitulu bya kakola ku bushiya ne bushiya. Mabuula abyo kechi akalela ne; kabiji bichi kechi bikakankalwa kupanga bipangwa ne. Pa ñondo pa ñondo, bikapanganga bipangwa mambo mema akonkolokelako, afuma ku nzubo yazhila.+ Bipangwa byabyo bikekala kajo, ne mabuula abyo akekala muchi.”+
13 Nkambo Mfumu Yehoba waamba’mba: “Ino yo mpunzha yo ukapa mikoka 12 ya bena Isalela kwikala mpunzha yabo, kabiji Yosefwa ukekala na mapunzha abiji.+ 14 Mukeitambula kabiji muntu yense bakamupa mpunzha* yanji. Nachipile kupana kino kyalo ku bashakulu benu,+ pano luno bemupakyo* kwikala ke kyenu.
15 “Uno ye mupaka wa kyalo kyaikela ku kabeta ka ku buyeke: Wafuma ku Kalunga ka Mema Kakatampe kupita ku Hetelona+ kukafika ne ku Zedada,+ 16 ku Hamata,+ Belota+ ne Shibalaimu, wajinga pakachi ka mupaka wa Damasakasa ne mupaka wa Hamata kukafika ne ku Hazela-hatikona wajinga ku mupaka wa Haulana.+ 17 Onkao mambo, mupaka ukafuma ku kalunga ka mema ukafika ne ku Hazala-enana+ ku mupaka wa Damasakasa, ku kabeta ka ku buyeke, ne ku mupaka wa Hamata.+ Uno ye mupaka wa ku kabeta ka ku buyeke.
18 “Mupaka wa ku musela watendekela pakachi ka Haulana ne Damasakasa, kabiji ukapita ku Yodano ne pakachi ka Gileada+ ne kyalo kya Isalela. Ukapime mupaka kufuma ku kalunga ka mema* kaji ku musela. Uno ye mupaka wa ku musela.
19 “Mupaka* wa ku kabeta ka ku bulenge ukafuma ku Tamala kukafika ne ku mema a Meliba-kadeshi,+ akapite ne ku Kakola* kukafika ne ku Kalunga ka Mema Kakatampe.+ Uno ye mupaka wa ku kabeta ka ku bulenge.
20 “Ku muzhika kuji Kalunga ka Mema Kakatampe, kufuma ku mupaka kukafika ku mpunzha yatalañana na Lebo-hamata.*+ Uno ye mupaka wa ku muzhika.”
21 “Mukeabanye kino kyalo anwe bene na bene monka mwayila mikoka 12 ya bena Isalela. 22 Mukeabanye kino kyalo anweba bene kwikala ke kyenu ne kuchibilako bantu bafuma ku byalo bingi basemene baana kimye kyo baikelenga nenu; kabiji bano bakekala kwi anweba nobe basemwa ku bena Isalela. Nabo bakatambula mpunzha pamo ne anweba mu mikoka ya bena Isalela. 23 Mwafwainwa kuchibilako muntu wafuma ku kyalo kingi mpunzha kwikala ke yanji kufuma mu mikoka mo aikalanga,” byo byaamba Nkambo Mfumu Yehoba.