Danyela
1 Mu mwaka wa busatu wa bukalama bwa kwa Yehoyakimu+ Mfumu wa Yuda, Nebukaneza Mfumu wa Babilona waishile na kulukuka Yelusalema.+ 2 Kabiji Yehoba wapaine Yehoyakimu Mfumu wa Yuda mu kuboko kwanji+ pamo ne bipe bimo byajinga mu nzubo ya Lesa wa kine, kabiji wibitwajile ku kyalo kya Shinala*+ ku nzubo ya lesa wanji. Wabikile bipe mo balamina bintu bya buneme bya lesa wanji.+
3 Ponkapo mfumu wakambizhe Ahipenaze mukulumpe wa bamitonyi kuba’mba alete bena Isalela* bamo, kuvwangakotu ne ba ku bufumu ne baana ba babinemanga.+ 4 Bano bansongwalume* bafwainwe kwikala babula bulema, bamweka bulongo, ba maana, bayuka bintu ne ba milangwe+ kabiji bafwainwa kwingila bulongo ku jilapa ja mfumu. Wafwainwe kwibafunjisha kunemba ne kuyuka mulaka wa bena Kalodeya. 5 Kabiji mfumu wibakambizhe kuja kajo kawamisha ko ajanga pa juba pa juba ne kutoma binyu byo atomangapo. Bafwainwe kwibafunjisha* pa myaka isatu, kabiji pa kupwa ino myaka bafwainwe kutendeka kwingila mingilo ya mfumu.
6 Pa bano bansongwalume pajinga ne bafumine mu kisaka* kya Yuda: Danyela,*+ Hananiya,* Mishela* ne Azaliya.*+ 7 Kabiji mukulumpe wa bamitonyi wibatumbile mazhina* angi; Danyela wamutumbile’mba Beleteshaza,+ Hananiya amba Shadalaka, Mishela amba Meshaka ne Azaliya wamutumbile’mba Abedenego.+
8 Pano bino, Danyela wafuukwilepo mu muchima wanji amba kechi ukezhilulula na kajo kawamisha kajapo mfumu nangwa kutoma binyu byo atomangapo ne. Onkao mambo, wasashijile mukulumpe wa bamitonyi kuba’mba kechi ukezhilulula na kano kajo ne. 9 Kabiji Lesa wa kine walengejile mukulumpe wa bamitonyi kumvwa byaambile Danyela ne kumubila lusa.+ 10 Pakuba mukulumpe wa bamitonyi waambijile Danyela amba: “Amiwa nachina nkambo yami mfumu, yenka wimukambizha kuja kajo ne kutoma binyu. Kyakonsha kwikala byepi umvwe wimumona kunyana ne kupusanako na bansongwalume* bakwenu? Anweba musakulengela mfumu kumpamo mambo.” 11 Pano bino, Danyela waambijile yewa ye batongwele ku mukulumpe wa bamitonyi kulama Danyela, Hananiya, Mishela ne Azaliya amba: 12 “Mwane, esekai bakalume benu pa moba jikumi, kabiji mwitupengatu bishu ne mema a kutoma kwapwa; 13 kepo mukesakanye mwekelo yetu na ya bansongwalume* bakwabo babena kuja kajo kawamisha ka mfumu, kabiji mukobile bakalume benu monka mwayila bintu byo mukamona.”
14 Byonkabyo, aye waswile byo bamwambijile kabiji wibesekele pa moba jikumi. 15 Moba jikumi byo apwile, abo bamwekelenga bingi bulongo ne kubaya* kukila bansongwalume* bakwabo bajiilenga kajo kawamisha ka mfumu. 16 Onkao mambo, awa wibalaminenga wibapelengatu bishu, kechi wibapelenga kajo kawamisha ne binyu bya mfumu ne. 17 Kabiji Lesa wa kine wapele bano bansongwalume* bana maana a kuyuka bintu ne milangwe ya kuyuka bintu byonse byanembwa ne kwikala na maana; kabiji Danyela bamupele ne maana a kulumbulula mwatala bimwesho ne biloto byonse.+
18 Moba a kwibaletelamo ebatongwejile mfumu byo afikile,+ mukulumpe wa bamitonyi wibaletele kwi Nebukaneza. 19 Mfumu byo esambile nabo, kafwako nangwa umo wajinga nobe Danyela, Hananiya, Mishela ne Azaliya ne;+ kabiji abo batwajijiletu kwingijila mfumu. 20 Bintu byonse mfumu byo ebepwizhe pa bintu byonse byakebewenga maana ne milangwe, wamwene kuba’mba bakijile bañanga ba lubuko ne boba bingelekezha+ bimye jikumi bajinga mu bufumu bwanji bonse. 21 Kabiji Danyela waikelenga monkamwa kufikatu ne mwaka mutanshi wa bukalama bwa Mfumu Kilusa.+