Byubilo bya Batumwa
23 Paulo byo atajishe kije kya Saniedilini, waambile’mba: “Anweba bakwetu, balongo, kufika ne ku jino juba ja lelo naikala na jiwi ja mu muchima jatoka+ kwi Lesa.” 2 Ponkapo ñanga mwine mukatampe aye Ananyasa wakambizhe baimene kwipi ne Paulo amba bamupume pa kanwa. 3 Pakuba Paulo wamwambijile’mba: “Lesa usakukupuma, obewa lubumbulu ye bashinga mpemba. Nanchi waikala na kunchibila mambo monka mwayila Mizhilo kabiji pa kimye kimo ne kuzhilulula Mizhilo kupichila mu kukambizha’mba bampume nyi?” 4 Aba baimene ko ajinga bamwipwizhe’mba: “Obewa ubena kutukila ka ñanga mwine mukatampe wa kwa Lesa?” 5 Paulo waambile’mba: “Balongo bami, kechi naji kuyuka’mba ye ñanga mwine mukatampe ne. Mambo kyanembwa’mba, ‘Kechi wafwainwa kwambila mwenga kalama wa bantu bobe ne.’”+
6 Kabiji Paulo byo ayukile’mba bamo bajinga Basadusea bakwabo Bafaliseo, wabijikile mu kije kya Saniedilini amba: “Anweba bakwetu, balongo, amiwa yami Mufaliseo,+ mwana wa Bafaliseo. Babena kunchibila mambo na mambo a kuba naketekela kuba’mba bafu bakasangulwa.” 7 Byo aambiletu bino, mu Bafaliseo ne Basadusea mwabuukile mapata, kabiji jibumba jaabenejilemo. 8 Mambo Basadusea baambanga’mba kafwako lusanguko nangwa bamalaika nangwa bilengwa bya mupashi ne, bino Bafaliseo baitabijile* amba bino byonse kobiji.+ 9 Onkao mambo, kwabuukile kiwowo kikatampe, ne banembeshi bamo ba mu Bafaliseo baimene ne kutendeka kupachika’mba: “Kechi twamonamo kyatama mu iwe muntu ne; bino umvwe kilengwa kya mupashi nangwa malaika ye waambile nanji+—.” 10 Mapata byo abayile, mwine mukulumpe wa bashilikale waubile bingi moyo kuba’mba Paulo basakumutabaula, kabiji wakambizhe bashilikale kuyako ne kumufumyamo mukachi kabo ne kumuleta mu kamba ka bashilikale.
11 Bino juba jalondejilepo bufuku, Nkambo waimene ko ajinga ne kumwambila’mba: “Chinchika!+ Mambo byonka byo ubena kunshimuna bulongo mu Yelusalema, byo byo ukanshimuna ne mu Loma.”+
12 Byo bwakile, Bayudea bakonkene pamo ne kwifingisha bene amba, kechi basakuja nangwa kutoma ne, poso bamwipaye Paulo. 13 Banabalume bakonkene ne kuchipa luno luchipo bakijile pa 40. 14 Bano banabalume bayile ku bañanga bakatampe ne ku bakulumpe ne kwibambila’mba: “Atweba twifingisha* kuba’mba kechi tusakuja ne, posotu Paulo tumwipaye. 15 Onkao mambo, anweba pamo na kije kya Saniedilini mwafwainwa kubuula mwine mukulumpe wa bashilikale amba amulete Paulo kwi anweba kuba’mba musaka kumwipuzha bulongo pa mambo anji. Bino saka akyangye kufika kwipi, atweba tusakumwipaya.”
16 Nangwa byonkabyo, mwipwa wa kwa Paulo waumvwine byo balangulukilenga kumubelamina, kabiji wayile na kutwela mu kamba ka bashilikale ne kubuula Paulo kino. 17 Onkao mambo, Paulo waichile mukulumpe wa bashilikale umo ne kumwambila’mba: “Twalai uno nsongwalume ku mwine mukulumpe wa bashilikale, mambo kuji byo akeba kumubuula.” 18 Byonkabyo, wamusendele ne kumutwala ku mwine mukulumpe wa bashilikale ne kumwambila’mba: “Paulo aye kaili, waji kungita ne kuñambila’mba ndete uno nsongwalume kwi anweba mambo paji kyo akeba kwimubuula.” 19 Mwine mukulumpe wa bashilikale wamukwachile pa kuboko ne kumutwala pa mbaji ne kumwipuzha’mba: “Ñanyi kintu kyo ukeba kumbuula?” 20 Aye waambile’mba: “Bayudea baumvwañana’mba bemulombe anweba kumutwala kesha Paulo ku kije kya Saniedilini uba nobe babena kukeba kumvwisha bulongo mambo anji.+ 21 Bino kange muswe ne, mambo banabalume kukila pa 40 bamubelamina, kabiji befingisha* bene amba kechi basakuja nangwa kutoma ne, poso Paulo bamwipaye;+ kabiji benengezha kala, babena kupembelelatu mukumbu kufuma ko muji.” 22 Onkao mambo, mwine mukulumpe wa bashilikale wamwambijile uno nsongwalume kuya byo amubuujile’mba: “Kange ubuulepo muntu nangwa umo amba wambuula kino ne.”
23 Kabiji waichile bakulumpe ba bashilikale babiji ne kwibambila’mba: “Konkanyai bashilikale 200 baye ku Kesalea, ne benda pa bambili 70 ne ba mafumo 200, pa jiola* ja busatu bufuku. 24 Kabiji munengezhe ne bambili ba kwendapo Paulo kuba’mba mukamufikizhe bulongo kwi kitumbafumu Felikisa.” 25 Wanembele ne nkalata amba:
26 “Amiwa Kaludiusa Lisiasa kwi Anweba wa Buneme Kitumbafumu Felikisa: Mutende mwane! 27 Uno muntu ye ye bakwachile ku Bayudea amba bamwipaye, bino amiwa naishile na bashilikale bami ne kumupokolola+ mambo naumvwine’mba mwina Loma.+ 28 Kabiji byo nakebelenga kuyuka mambo o bamushiinenga, namutwajile ku kije kyabo kya Saniedilini.+ 29 Nataaine kuba’mba mambo o bamushiinenga ajinga a pa mambo a Mizhilo yabo,+ bino kechi pajingapo mambo a kumwipayilapo nangwa kumukashilapo mu kaleya ne. 30 Bino na mambo a kuba bambuujile’mba uno muntu bamumvwañena kumwipaya,+ namutuma kwi anweba kabiji nakambizha ba kumushiina kuba’mba bakamushiine kwi anweba.”
31 Onkao mambo, bashilikale bamusendele Paulo+ byonka byo bebakambizhe ne kumutwala bufuku ku Antipatalisa. 32 Juba jalondejilepo, baswishishe benda pa bambili kuya nanji, bino bashilikale bakwabo babwelele ku kamba ka bashilikale. 33 Benda pa bambili byo bafikile mu Kesalea bafikizhe nkalata ne Paulo kwi kitumbafumu. 34 Onkao mambo, wiitangile ne kumwipuzha Paulo ku kibunji ko afumine, kepo ayukile’mba wafumine ku Kilikya.+ 35 Kitumbafumu waambile’mba: “Nkomvwa mambo obe onse umvwe ba kukushiina bakafike.”+ Kabiji wakambizhe kuba’mba bamusopenga mu kipango kya kwa Heloda.