Buku wa Bubiji wa Bamfumu

17 Mu mwaka wa bu 12 wa bukalama bwa kwa Ahaza Mfumu wa Yuda, Hosheya+ mwana wa kwa Ela mo mo aikele mfumu wa Isalela mu Samaliya; walamine pa myaka itanu na ina. 2 Waubilenga byatama kwi Yehoba, bino kechi byonka byaubilenga bamfumu ba mu Isalela bajingako kala ne. 3 Shalamaneza Mfumu wa Asilya waishile na kulwa nanji,+ kabiji Hosheya waikele kalume wanji kabiji watendekele ne kumupa milambo.+ 4 Nangwa byonkabyo, mfumu wa Asilya wayukile’mba Hosheya wamusatukila, mambo watumine baluwe kwi Mfumu So wa bena Ijipita+ kabiji kechi waletele milambo kwi mfumu wa Asilya byonka byo aubanga myaka yonse ne. Onkao mambo, mfumu wa Asilya wamutayile mu kaleya.

5 Mfumu wa Asilya walukukile kyalo kyonse, kabiji waishile ku Samaliya ne kumushinkila pa myaka isatu. 6 Mu mwaka wa butanu na buna wa bukalama bwa kwa Hosheya, mfumu wa Asilya washinjile muzhi wa Samaliya.+ Kabiji watwajile bena Isalela mu buzha+ ku Asilya ne kwibekazha mu muzhi wa Hala ne wa Habola ku mukola wa Gozani+ ne mu mizhi ya bena Meda.+

7 Kino kyamwekele na mambo a kuba bena Isalela bamulengele mambo Yehoba Lesa wabo, yenka wibafumishe mu kyalo kya Ijipita mu bukalama bwa kwa Felo mfumu wa Ijipita.+ Bapopwejilenga* balesa bangi,+ 8 ne kulondela bisho bya bisaka bya bantu Yehoba byo apangile ku meso a bena Isalela, kabiji balondejilenga bisho byaletele bamfumu ba bena Isalela.

9 Bena Isalela baubilenga bintu byabujile koloka kwi Yehoba Lesa wabo. Balengele mapunzha atuntama mu mizhi yabo yonse,+ kufuma ku kyamba kya usopa kukafika ne ku muzhi* wa nsakwa yakosa. 10 Beimikijilenga bene mashiki azhila ne bichi* bya milumbulumbu byazhila+ pa tutumbatumba tonse twalepa ne munshi ya bichi byonse bikatampe;+ 11 kabiji pa mapunzha onse atuntama basokejilengapo bya kufutumuna byonka byaubanga bisaka bya bantu Yehoba byo atwajile mu buzha kufuma ku meso abo.+ Baubilenga bintu byatama ne kufichisha Yehoba ku muchima.

12 Batwajijile kupopwela bankishi ba bunya*+ Yehoba bo ebabuujile’mba: “Kechi mwafwainwa kuba kino ne!”+ 13 Yehoba wibajimwinengako bena Isalela ne bena Yuda kupichila mu bangauzhi banji bonse ne bonse bamonanga bimwesho+ amba: “Kilekai kwenda mu mashinda enu atama!+ Lamainga mikambizho yami ne malamuna ami monka mwayila mizhilo yonse yo nakambizhe bashakulu benu ne yo nemutumijile kupichila mu bakalume bami bangauzhi.” 14 Bino kechi baumvwine ne, batwajijile kukosesha michima yabo byonkatu byajinga* bashakulu babo babujile kwitabila mwi Yehoba Lesa wabo.+ 15 Batwajijile kukana malamuna anji ne lulayañano lwanji+ lo alayañene na bashakulu babo ne bya kwibavululako byanji byo ebapele bya kwibajimunako,+ kabiji balondejilenga bankishi batutu+ ne abo baikele ke batutu,+ saka balondela bisaka bya bantu bibazhokolokele, byonka Yehoba byo ebakambizhe kubula kwibilondela.+

16 Batwajijile kukana mikambizho yonse ya Yehoba Lesa wabo, kabiji balengele bipashañano bya byela bya baana babiji ba bañombe,+ ne kichi kya mulumbulumbu kyazhila,*+ kabiji bafukamijilenga bintu bya mwiulu byonse+ ne kwingijila Baela.+ 17 Kabiji basokelenga mu mujilo*+ baana babo ba balume ne baana babo ba bakazhi, ne kuponga+ ne kuba bya lubuko, kabiji bepainenga* kuba byatama ku meso a Yehoba, ne kumuzhingijisha.

18 Onkao mambo, Yehoba wibazhingijile bingi bena Isalela, kya kuba wibafumisheko ne ku meso anji.+ Kechi washilepo muntu nangwa umo ne, kanatu mukoka wa bena Yuda.

19 Nangwatu bena Yuda nabo kechi balaminenga mikambizho ya Yehoba Lesa wabo ne;+ nabo balondejilenga bisho byonka byalondejilenga bena Isalela.+ 20 Yehoba wakaine bisemi byonse bya kwa Isalela kabiji wibalengeshe bumvu ne kwibapana mu maboko a bebapukwile bintu, kufikatu ne byo ebafumishe ku meso anji. 21 Wafumishe bena Isalela mu nzubo ya kwa Davida, ne abo batongwele Yeloboma mwana wa kwa Nebati kwikala mfumu.+ Bino Yeloboma walengejile bena Isalela kuleka kulondela Yehoba, kabiji wibalengejile kuba bubi bukatampe. 22 Kabiji bena Isalela batwajijile kwenda mu bubi bonse Yeloboma bo aubile.+ Kechi bebulekele ne, 23 kufikatu ne Yehoba byo afumishe bena Isalela ku meso anji, byonkatu byo aambile kupichila mu bakalume banji bangauzhi bonse.+ Onkao mambo, bena Isalela bebafumishe mu kyalo kyabo ne kwibatwala mu buzha ku Asilya+ konka ko baji kufika ne lelo jino.

24 Kepo mfumu wa Asilya avilwile bantu kufuma ku Babilona, ku Kuta, ku Ava, ku Hamata ne ku Sefwabaimu+ ne kwibaleta mu mizhi ya mu Samaliya mwajinga bena Isalela kala; batambwile Samaliya ne kwikala mu mizhi yanji. 25 Byo batendekeletu kwikala monka, kechi baakaminwenga* Yehoba ne. Onkao mambo, Yehoba wibatumijile mabokwe,+ kabiji aipayilepo bantu bamo. 26 Mfumu wa Asilya bamutumijile sawakya amba: “Bisaka bya bantu byo mwatwala mu buzha ne kwibikazha mu mizhi ya mu Samaliya kechi byayuka bya kupopwela* Lesa wa mu kyokya kyalo ne. Onkao mambo, ubena kwibatumina mabokwe abena kwibepaya, mambo mwi abo kafwamo nangwa umo wayuka bya kupopwela Lesa wa mu kyokya kyalo ne.”

27 Ponkapo mfumu wa Asilya wakambizhe’mba: “Sendaipo ñanga umo ye mwafumishe kokwa ne kumutwala mu buzha, abwele na kwikala kokwa ne kwibafunjisha bya kupopwela Lesa wa mu kyokya kyalo.” 28 Onkao mambo, ñanga umo ye bafumishe mu Samaliya ne kumutwala mu buzha, wabwelele ne kukekala mu Betele,+ kabiji watendekele kwibafunjisha bya kwakamwa* Yehoba.+

29 Nangwa byonkabyo, bisaka bya bantu byonse bilengejile balesa babyo, bo babikile mu mazubo a kupopwelamo ajinga pa mapunzha atuntama alengele bena Samaliya; bisaka bya bantu byonse byaubilenga byonka bino mu mizhi mo byaikelenga. 30 Byonkabyo, bantu ba mu Babilona balengele Sukota-benota, ne bantu ba mu Kuta balengele Nelagala, ne bantu ba mu Hamata+ balengele Ashima, 31 ne bena Ava balengele Nibahaza ne Talataka. Bena Sefwabaimu basokelenga baana babo ba balume kwi Adalameleki ne Anameleki, balesa ba mu Sefwabaimu.+ 32 Nangwa kya kuba baakamwanga Yehoba, batongwele bañanga ba pa mapunzha atuntama kufuma mu bantutu, kabiji bano bo bebengijilanga ku mazubo a kupopwelamo ajinga pa mapunzha atuntama.+ 33 Byonkabyo, baakamwanga Yehoba, bino bapopwelanga ne balesa babo monka mwayijile bupopweshi* bwa bisaka bya bantu byo bebafumishemo.+

34 Kufikatu ne lelo jino balondela bupopweshi* bo bajingamo patanshi. Kafwako muntu nangwa umo upopwela* Yehoba, nangwa ulondela malamuna anji, Mizhilo yanji, ne mikambizho Yehoba yo apele baana ba kwa Yakoba, yenka ye apimpwile jizhina amba Isalela ne.+ 35 Yehoba byo alayañene lulayañano nabo,+ wibakambizhe’mba: “Kechi mwafwainwa kwakamwa balesa bangi ne, kabiji kechi mwafwainwa kwibafukamina nangwa kwibengijila nangwa kutapisha kwi abo ne.+ 36 Bino Yehoba yenka wimufumishe mu kyalo kya Ijipita na bulume bukatampe ne na kuboko kwakosa,+ ye ye mwafwainwa kwakamwa, kabiji ye yenka ye mwafwainwa kufukamina,+ kabiji mwafwainwa kutapisha kwi aye. 37 Kabiji malamuna, Mizhilo ne mikambizho yo emunembejile,+ mwafwainwa kuteshako muchima kwiilondela, kabiji kechi mwafwainwa kwakamwa balesa bangi ne. 38 Kabiji kechi mwafwainwa kuvulama lulayañano lo nalayañene ne anweba ne,+ kabiji kechi mwafwainwa kwakamwa balesa bangi ne. 39 Bino mwafwainwa kwakamwanga Yehoba Lesa wenu, mambo ye ukemupokolola mu maboko a balwanyi benu bonse.”

40 Bino kechi bakookejile ne, balondejilenga bupopweshi* bo bajingamo patanshi.+ 41 Byonkabyo, bino bisaka bya bantu byaakaminwenga Yehoba,+ bino byaingijilenga ne bipashañano byabo bya kusonga. Baana babo ne bankana babo baubilenga byonka byaubilenga bashakulu babo, kufika ne lelo jino.