Yoba
23 Yoba wakumbwile’mba:
3 Nanchi inge nayukile kwa kumutaana Lesa!+
Inge naya ku mpunzha ko ekala.+
4 Inge namubuula mambo ami
Ne kuyuzha kanwa kami na byambo bya kwijizhanya;
5 Inge nayuka mo ankumbwila
Ne kutako muchima ku byo añambila.
6 Nanchi aye wakonsha kunkatazha na bulume bwanji bukatampe nyi?
Ine, aye wakonsha kuñumvwa.+
7 Kepo muntu waoloka akomvwañana ne aye,
Kabiji Mutonyi wami ukambingisha myaka ne myaka.
8 Bino inge naya ku musela, kechi namutaanako ne;
Kabiji inge nabwela, kechi namutaana ne.
9 Umvwe ubena kwingijila ku kipiko, kechi namumona ne;
Inge waalulukila ku kilujo, napotu kechi namumona ne.
10 Bino aye wayuka jishinda jo ñendamo.+
Kabiji inge wangeseka, nkafumamotu nobe ngolode yawamisha.+
11 Maulu ami alondela monka mu ngayo yanji;
Natwajijila kwenda mu jishinda janji kwa kubula kusendukamo ne.+
12 Kechi naleka kulama mikambizho yanji ne.
Nalama byambo byanji+ kukilatu ne pa byo añambijile.*
13 Umvwe wafuukula kuba kintu, ñanyi wakonsha kumukanya?+
Umvwe ubena* kukeba kuba kintu, wikyuba.+
14 Mambo aye ukafikizha kintu kyo amfuukwila,
Kabiji walama bintu byavula bya uno mutundu.
15 O ene mambo o naakaminwa na mambo a aye;
Inge nalanguluka pe aye, ngikala bingi na moyo.
16 Lesa wandengela kwikala na moyo,
Kabiji wa Bulume Bonse wandengela kwakamwa.
17 Bino mfishi kechi yandengela kuzhindamapo ne
Nangwatu mfishi ine ikatampe yavweta kilungi kyami.