Nkalata ya Bubiji ku Bena Kolinda
2 Nafuukulapo namba kechi nemulengeshe jibiji bulanda byo nkemupempula jikwabo ne. 2 Mambo umvwe nemulengela kwikala na bulanda, ñanyi ukansangajika muchima, kana yenkawa ye nalengela kwikala na bulanda? 3 Nanembele byo naubile, namba byo nkeya kechi nkekale na bulanda pa bantu bafwainwa kundengela kwikala na lusekelo ne, mambo naketekela’mba kintu kindetela lusekelo ne anweba kyo kimuletela lusekelo luntutu lumo. 4 Mambo mu bya malwa byavula ne bulanda bukatampe bwa mu muchima wami mo mo nemunembejile na mipolo yavula, kechi mu kwimulengela kwikala na bulanda ne,+ poso namba muyuke butemwe bukatampe bo nemutemwa.
5 Umvwe muntu umo waleta bulanda,+ kechi waletelatu bulanda amiwa ne, poso anweba bonse—kechi nakeba kwambishapo kyakosa pa kino kishinka ne. 6 Uno muntu kumukajipila ko bamukajipila bavula kwawaina; 7 mwafwainwa kumulekelako mambo ne kumutekenesha,+ pa kuba’mba abule kukizhamo kwikala na bulanda.+ 8 Onkao mambo, nemusashijila anweba bonse namba mumumweshe butemwe.+ 9 O ene mambo o nemunembejile namba: ngyuke inge mwakonsha kukookela mu bintu byonse nangwa ne. 10 Umvwe mwalekelako muntu mambo, ne amiwa namulekelako. Kabiji mambo o namulekelako amiwa (umvwe kuji mambo o namulekelako) namulekelao namba mumwenemo byawama ku meso a Kilishitu, 11 pa kuba’mba Satana abule kwitushinda,*+ mambo kechi twaluba bya bujimuku* byanji ne.+
12 Byo nafikile mu Toloasa+ na kusapwila mambo awama aamba pe Kilishitu ne byo banshinkwijile kibelo mwi Nkambo, 13 muchima wami kechi waikele bulongo ne, mambo kechi namutaaine Titusa+ mulongo wami ne. Onkao mambo, nebashajikilepo ne kuya ku Makedonya.+
14 Bino tubena kusanchila Lesa, yenka witutangijila kuba’mba tushindenga pamo na Kilishitu kabiji kupichila mu mwingilo ye twingila usolola* bwema bwawama bwa kumuyuka mu mapunzha onse! 15 Mambo atweba kwi Lesa tuji nobe bwema bununka bulongo bwa Kilishitu ku boba babena kupuluka ne ku boba babena konaika; 16 ku babena konaika twi bwema* bwa lufu butwala ku lufu,+ ku boba babena kupuluka, twi bwema bwa bumi butwala ku bumi. Nanchi ñanyi wafikilamo bulongo kwingila bino bintu? 17 Atweba twafikilamo, mambo kechi twi basulu* ba byambo bya Lesa+ byonka byuba bantu bavula ne, bino twamba na muchima wa kishinka byo betutuma kwi Lesa, ee kine konka ku meso a Lesa kabiji pamo ne Kilishitu.