Ezikyo

26 Mu mwaka wa bu 11, pa juba jitanshi ja ñondo, Yehoba wañambijile’mba: 2 “Obewa mwana muntu, na mambo a kuba bena Tila baamba byatama pa Yelusalema+ amba, ‘Talai, kibelo mwatwelelanga ba mu mitundu ya bantu kyaonaika!+ Bintu byonse bikekala ke byami kabiji nkanonka, muzhi byo ashalatu masala’; 3 onkao mambo, Nkambo Mfumu Yehoba waamba’mba: ‘Obewa muzhi wa Tila, nakuzhingijila kabiji nkaleta bisaka bya bantu byavula kuba’mba bikakulukuke, byonkatu pa kalunga ka mema byo pekala manyaki. 4 Bakonauna nsakwa ya muzhi wa Tila ne kukundula byamba bijimo,+ kabiji nkafumyapo maloba ne kulengela muzhi kwikala jibwe jashalatu patoka jibena kubekauka. 5 Ukekala muzhi wa kwanyikamo makonde pa kalunga ka mema.’+

“Nkambo Mfumu Yehoba waamba’mba, ‘Amiwa yami naamba, kabiji ukekala nobe bipukulwa ku bisaka bya bantu. 6 Aba baji mu mande* a kyalo kyanji bakebatapa na mpoko kabiji bantu po po bakayuka’mba amiwa yami Yehoba.’

7 “Nkambo Mfumu Yehoba waamba’mba: ‘Amiwa mbena kuleta Nebukaneza Mfumu wa Babilona kuba’mba alukuke muzhi wa Tila kufuma ku kabeta ka ku buyeke;+ aye ye mfumu wa bamfumu+ ukeya na bambili,+ makalaki a nkondo,+ bashilikale benda pa bambili ne bakwabo bashilikale* bavula. 8 Aye ukonauna boba baji mu mande a mu kyalo na mpoko, kabiji ukashimika lubumbulu, kutuchika mushiime wa kukulukukilapo ne kusuntula jikebo jikatampe ja kufyamamo. 9 Aye ukalalaula lubumbulu wobe na byela byanji* kabiji ukakundula byamba byobe na tutemo* twanji. 10 Bambili banji bakavula bingi kabiji bakakufukawila lukungu, ne kyungwe kya benda pa bambili, mituutu ya bitanga ne ya makalaki bikatenkenya lubumbulu wobe byo bakatwelanga pa bibelo nobe banabalume babena kulukuka muzhi ye bakundula lubumbulu. 11 Mikono ya bambili banji ikanyantaula mu mikwakwa yobe yonse;+ kabiji aye ukatapa bantu bobe na mpoko ne konauna mashiki obe akosa. 12 Bakakwangata bunonshi bobe, bya busulu byobe,+ ne kukundula masakwa obe ne kukonawina mazubo obe awama. Kabiji bakataya mabwe obe, bintu byo wasongele ne maloba mu mema.’

13 “‘Nkalekesha nyimbo yobe kumvwanyika kabiji kuvuma kwa byansa byobe kechi kukomvwanyikapo jibiji ne.+ 14 Nkakulengela kwikala jibwe jashalatu patoka jibena kubembela, kabiji ukekala muzhi wa kwanyikamo makonde.+ Kechi bakakushimukululapo ne, mambo amiwa Yehoba yami naamba,’ byo byaamba Nkambo Mfumu Yehoba.

15 “Nkambo Mfumu Yehoba waambila muzhi wa Tila amba: ‘Nanchi bantu bekala pa makuji kechi bakazakama pa kumvwa byo ukapona, kubinza kwa bantu babena kufwa* ne bantu babena kwiipaya mwi obewa nenyi?+ 16 Babinemanga* bonse ba ku kalunga ka mema bakafuma pa matanda abo, bakavuula minkukumba* yabo ne bivwalo byabo byo basona bulongo, kabiji bakebakwata saka bazakama. Bakekala panshi saka bazakama ne kukumya pa kukutala.+ 17 Kabiji bakakwimbila lwimbo wa bulanda*+ ne kukwambila’mba:

19 “Nkambo Mfumu Yehoba waamba’mba: ‘Byo nkakonauna ne kukushatu nobe mizhi mwabula bantu, kabiji byo nkakukumpula na mema avula ne kukwibizha,+ 20 nkakuleta obewa ne boba babena kuya mu kimbo* muji bantu bafwile kala. Nkakulengela kwikala mu mpunzha ya panshi pamo na boba babena kuya mu kilende,+ ne kwikala nobe mapunzha aonaikile kala, pa kuba’mba mwi obewa mukabule kwikala muntu nangwa umo ne. Kepo nkanemeka* bantu bomi.

21 “Nkambo Mfumu Yehoba waamba’mba, ‘Nkakuletela bintu bilenga moyo pe obewa kabiji kechi ukekalako jibiji ne.+ Bakakukeba, bino kechi bakakutaana ne.’”