Ezikyo
32 Kabiji mu mwaka wa bu 12, mu ñondo wa bu 12, pa juba jitanshi ja ñondo, Yehoba wañambijile jikwabo amba: 2 “Obewa mwana muntu, imba lwimbo wa bulanda* pe Felo mfumu wa Ijipita, umwambile’mba,
‘Obewa wajinga nobe mwana bokwe mukaji, wa bisaka bya bantu,
Nangwa kya kuba wajinga bino, bakwipayile.
Obewa wajinga nobe kilengwa kikatampe kya mu kalunga ka mema,+ wayanjishenga bakwenu mu mikola yobe,
Wavundankenyenga mema na maulu obe, ne kutamisha mikola.’*
3 Nkambo Mfumu Yehoba waamba’mba:
‘Nkengijisha jibumba ja bisaka bya bantu byavula kukuta bukonde bwami,
Kabiji jikakufungila mu bukonde bwami.
4 Nkakunyukwila ku mutunta;
Nkakutaya mungye.
Nkaleta bañonyi kwiya na kwikala pe obewa,
Kabiji nkalengela banyama ba mungye ba pano pa ntanda ponse kukuja kabiji bakekuta.+
5 Nkataya mubiji wobe pa mitumba
Ne kuyuzha bimpachiko na nyama yobe yabola.+
6 Nkakumbanya kyalo na mashi obe akapokomokanga kukafikatu ne pa mitumba,
Kabiji mikola ikayula mashi.’*
7 ‘Byo nkakuzhimañanya, nkavweta jiulu ne kulengela tubangabanga kubula kusamisha kyeya.
Nkavweta makumbi pa juba,
Kabiji ñondo kechi ukasama ne.+
8 Nkambo Mfumu Yehoba waamba’mba, ‘Nkafichisha bintu byonse bipana kyeya biji mwiulu na mambo a obewa,
Kabiji nkaleta mfishi mu kyalo kyobe.’
9 ‘Nkalengela michima ya mitundu ya bantu yavula kukakilwa, byo nkatwala bazha bobe ku bisaka bikwabo,
Ku byalo byo wabula kuyuka.+
10 Nkalengela mitundu ya bantu yavula kukankamanatu,
Ne bamfumu babo bakoba moyo byo nkamwesha mpoko yami kwi abo.
Bonse pa muntu pa muntu bakazakamangatu na mambo a kuchina kufwa,
Pa juba jo ukafwa.’
11 Mambo Nkambo Mfumu Yehoba waamba’mba:
‘Mpoko ya mfumu wa Babilona ikeya pe obewa.+
12 Nkalengela mabumba obe kufwa ku mapoko a babiyangala,
Bantu bakilamo kushinta ba mu bisaka byonse bya bantu.+
Bakonauna bintu bitotelamo Ijipita, ne mabumba anji onse bakeepaya.+
13 Nkepaya banyama banji bonse bo alela baji ku mema avula,+
Kabiji mema kechi bakeavundankanyapo jibiji na maulu a bantu nangwa na mikono ya banyama ne.’+
14 Nkambo Mfumu Yehoba waamba’mba, ‘Pa joja juba, nkakengulula mema abo,
Kabiji nkalengela mema a mu mikola yabo kupita nobe manyi.’
15 ‘Byo nkalula kyalo kya Ijipita ke masala ne kufumyamo bintu byonse byajingamo,+
Byo nkonauna bantu bekalamo,
Po po bakayuka’mba amiwa yami Yehoba.+
16 Nkambo Mfumu Yehoba waamba’mba: ‘Uno ye lwimbo wa bulanda kabiji bantu bakamwimba;
Banabakazhi ba mu bisaka bya bantu bakamwimba.
Bakamwimba na mambo a Ijipita ne mabumba anji onse.’
17 Kabiji mu mwaka wa bu 12, pa juba ja bu 15 ja ñondo, Yehoba wañambijile’mba: 18 “Obewa mwana muntu, jila mabingo na mambo a mabumba a Ijipita ne kumutwala ku mushiji, aye ne banabakazhi ba mu bisaka byaya nkuwa pamo na boba babena kuya mu kimbo.*
19 “‘Ñanyi ye wakila buya? Yanga ku mushiji ukalaale kuji bantu babula kuya ku mukanda!’
20 “‘Bakafwila pamo na boba bakafwa ku mpoko.+ Bamupana kufwa ku mpoko; mukulumunaimo mu muzhi ne kumutaya pangye pamo na mabumba anji onse.
21 “‘Babiyangala bakamutambwila mu Kilende* pamo na boba bonse bamukwashanga. Kabiji bakaya ku mushiji ne kulaala byonka byalaala bantu babula kuya ku mukanda bo baipayile na mpoko. 22 Asilya ne jibumba janji jonse baji monka. Bilende byabo byamuzhokoloka, ko kuba’mba bilende bya bantu bonse bo baipayile na mpoko.+ 23 Bilende byanji byonse biji mu kimbo,* ne jibumba janji jonse jazhokoloka kilende kyanji, ko kuba’mba bonse bo baipayile na mpoko, mambo balengejilenga bantu bomi kwikala na moyo.
24 “‘Elama+ ne mabumba anji onse baji monka kuzhokoloka kilende kyanji, ko kuba’mba bantu bonse bo baipayile na mpoko. Baya ku mushiji saka babula kuya ku mukanda, mambo balengejilenga bantu bomi kwikala na moyo. Kikebalenga bingi bumvu pamo na boba babena kuya mu kimbo.* 25 Bamwanshikila mwanya pakachi ka boba bo baipayile pamo na mabumba anji onse azhokoloka kilende kyanji. Bajinga bantu babujile kuya ku mukanda bo baipayile na mpoko, mambo balengejilenga bantu bomi kwikala na moyo. Kabiji kikebalenga bingi bumvu pamo na boba babena kuya mu kimbo.* Bamubika pamo na mibiji ya bantu bafwa.
26 “‘Mesheke ne Tubala+ ne mabumba abo onse baji monka. Bilende byabo byonse byazhokoloka mfumu wabo. Bano bajinga bantu babujile kuya ku mukanda bo baipayile na mpoko, mambo balengejilenga bantu bomi kwikala na moyo. 27 Nanchi abo kechi bakalaala pakachi ka babiyangala babula kuya ku mukanda bo batwajile mu Kilende* pamo na byela byabo bya nkondo nenyi? Kabiji bakatula mapoko abo ku mitwe* yabo, ne bubi bwabo bakebutula pa bikupa byabo, mambo bano babiyangala balengejilenga bantu bomi kwikala na moyo. 28 Pakuba obewa, bakakonawina pamo na bantu babula kuya ku mukanda, kabiji ukalaala konka kuji bantu bo baipayile na mpoko.
29 “‘Edomu+ uji monka, kabiji bamfumu banji ne babinemanga banji bonse bebazhiikile konka kuji boba bo baipayile na mpoko nangwa kya kuba bajinga babiyangala; kabiji abo ne boba babula kuya ku mukanda+ bakalaala konka kuji bantu babena kuya mu kimbo.*
30 “‘Babinemanga* ba ku kabeta ka ku buyeke bonse baji monka pamo na bena Shidona bonse,+ bonka bafwile lufu lwatama nangwa kya kuba bazakamishanga bantu na mambo a bulume bwabo. Bakalaala saka babula kuya ku mukanda konka kuji boba bo baipayile na mpoko, kabiji kikebalenga bingi bumvu pamo na boba babena kuya mu kimbo.*
31 “Nkambo Mfumu Yehoba waamba’mba, ‘Felo ukamona bino bintu byonse kabiji ukatemwa bingi pa bintu byonse bikamwekela mabumba anji;+ Felo ne nzhita yanji bakebepaya na mpoko.’
32 “Nkambo Mfumu Yehoba waamba’mba, ‘Na mambo a kuba walengejilenga bantu bomi kwikala na moyo, Felo ne mabumba anji onse, bakebazhiika konka kuji bantu babula kuya ku mukanda pamo na boba bo baipayile na mpoko.’”