Ezikyo
45 “‘Byo mukabanya kyalo kwikala ke kya buswanyi,+ mukachibeko mpunzha imo ikekale yazhila ya kupana kwi Yehoba.+ Mu bula ikekale makyubichi* 25,000, ne mu bwipi makyubichi 10,000.+ Ino mpunzha* yonse ikekala yazhila. 2 Mu yonka ino mpunzha, mukekala mpunzha yazhila iji na makyubichi* 500+ mu mbaji yonse ina, kabiji ku bushiya ne bushiya bwa ino mpunzha pangye kukekala mpunzha iji na makyubichi 50 kwa kujiila banyama.+ 3 Mukachi ka ino mpunzha, mukapime mu bula makyubichi 25,000 ne mu bwipi makyubichi 10,000, kabiji mukachi ka ino mpunzha mukekala mpunzha yazhila, ko kuba’mba yazhijisha. 4 Ino mpunzha ikekala ke mpunzha yazhila ya bañanga+ bengila mingilo mu nzubo ya Lesa, bonka beya kwi Yehoba+ na kumwingijila. Kabiji ikekala mpunzha mukekala mazubo abo ne nzubo yazhila.
5 “‘Bena Levi bengijila mu nzubo ya Lesa bakebapa mpunzha iji mu bula makyubichi 25,000 ne mu bwipi makyubichi 10,000,+ kabiji bakebapa ne bibamba* 20 bya kujiilamo.+
6 “‘Ku muzhi mukachibeko mpunzha imo iji na makyubichi 25,000 mu bula (yaesakana na mpunzha yazhila ya kupana kwi Lesa) ne mu bwipi 5,000.+ Ino mpunzha ikekala ya kisaka kyonse kya lsalela.
7 “‘Kinemanga bakamupa mpunzha iji pakachi ka mpunzha yazhila ya kupana kwi Lesa ne mpunzha ya muzhi. Ikalamankana na mpunzha yazhila ya kupana kwi Lesa ne mpunzha ya muzhi. Ikekajila ku muzhika ne ku musela. Bula bwayo kufuma ku mupaka wa ku muzhika kufika ku mupaka wa ku musela bukesakana pamo na mapunzha a mikoka ya bantu.+ 8 Ino mpunzha ikekala ke yanji mu Isalela. Babinemanga bami kechi bakakatazhapo jibiji bantu bami ne,+ kabiji bakapana mpunzha ku kisaka kya Isalela monka mwayila mikoka yabo.’+
9 “Nkambo Mfumu Yehoba waamba’mba: ‘Anweba babinemanga ba bena Isalela, mwakizhamo kuba bintu byatama!’
“Nkambo Mfumu Yehoba waamba’mba, ‘Lekai kuba bukapondo ne kuyanjisha bantu, ubainga byawama ne byaoloka.+ Kilekai kwangata bintu bya bantu bami.+ 10 Mwafwainwa kwingijisha mashikelu afwainwa, kipimo kya efa* kyafwainwa ne kipimo kya bbafi* kyafwainwa kya kupiminamo bintu bya memamema.+ 11 Efa ne bbafi wa kupiminamo bya memamema byafwainwa kwesakana. Bbafi wa kupiminamo bintu wafwainwa kutwelamo jikumi mu homela* umo, kabiji efa naye wafwainwa kutwelamo jikumi mu homela umo. Homela ye ukekala kipimo kya kupiminako. 12 Shekele*+ umo wafwainwa kwikala magela* 20. Ne mashekele 20, mashekele 25 ne akwabo 15, kwiavwanga onse pamo akekala mina* umo.’
13 “‘Bino byo bya bupe byo mwafwainwa kupana: kipimo kimo kya mu bipimo bitanu na kimo kya efa kufuma mu homela umo wa wichi ne kipimo kimo kya mu bipimo bitanu na kimo kya efa kufuma mu homela umo wa mbaale. 14 Manyi o bakapananga bakeapimanga mu bbafi wa kupiminamo. Bbafi wa kupiminamo wafwainwa kutwelamo jikumi mu kolo,* kabiji mabbafi jikumi ke homela umo, mambo mabbafi jikumi aesakana na homela umo. 15 Kabiji kufuma mu jitanga ja mikooko ya bena Isalela, pa mikooko 200 bakapanangapo mukooko umo. Ino mikooko ikekala ke mulambo wa kajo,+ mulambo wa kusoka+ ne bitapisho bya mutende,+ pa kuba’mba bakafuchilengako bantu mambo abo,’+ byo byaamba Nkambo Mfumu Yehoba.
16 “‘Bantu bonse bekala mu kyalo bakapananga buno bupe+ ku kinemanga mu Isalela. 17 Uno kinemanga ye ukatalanga pa milambo yonse ya kusoka,+ mulambo wa kajo,+ mulambo wa binyu pa kimye kya bijiilo,+ kutentama kwa bañondo, Masabado+ ne bijiilo byonse byo batongwejile kisaka kya Isalela.+ Kabiji ye ukanengezhanga mulambo wa bubi, mulambo wa kajo, mulambo yense wa kusoka ne bitapisho bya mutende, pa kuba’mba akafuchilengako mambo kisaka kya Isalela.’
18 “Nkambo Mfumu Yehoba waamba’mba: ‘Mu ñondo mutanshi, pa juba jitanshi ja ñondo, mukashikule mwana ñombe wabula bulema wa mu jitanga ne kutokesha nzubo ya Lesa kufuma ku bubi.+ 19 Ñanga akashikulepo mashi amo a mulambo wa bubi ne kwiashinga pa mashiki a pa nzubo ya Lesa,+ pa makonka ana a ku momeno wa kya kusokelapo bitapisho ne pa mashiki a ku kibelo kya kipango kya mukachi. 20 Abino byo byo mukoba pa juba ja butanu na bubiji ja ñondo na mambo a boba bakalenganga mambo kya mapuso nangwa kwa kubula kuyuka;+ kabiji mukapane mulambo wa kufuchila mambo nzubo ya Lesa.+
21 “‘Mu ñondo mutanshi pa juba ja bu 14 ja ñondo, mukekalenga na Kijiilo kya Lupitailo.+ Pa moba atanu na abiji mukajenga shinkwa wabula mbizho.+ 22 Pa jino juba, kinemanga ukenengezhezhanga mwine mwana ñombe kwikala mulambo wa bubi bwanji ne bwa bantu bonse ba mu kyalo.+ 23 Pa moba atanu na abiji a kijiilo, aye ukapananga baana ba ñombe balume babula bulema kwikala mulambo wa kusoka kwi Yehoba ne mikooko ilume itanu na ibiji yabula bulema ukeipananga pa moba onse atanu na abiji,+ ne mbuzhi mulume pa juba pa juba kwikala mulambo wa bubi. 24 Wafwainwa ne kupana kipimo kya efa umo pa mwana ñombe umo, kipimo kya efa umo pa mukooko umo, ne hini* wa manyi pa kipimo kya efa umo kwikala mulambo wa kajo.
25 “‘Mu ñondo wa butanu na bubiji pa juba ja bu 15 ja ñondo, pa moba atanu na abiji pa kimye kya kijiilo,+ aye wafwainwa kupana mulambo wa bubi muntutu umo, mulambo wa kusoka, mulambo wa kajo ne manyi antutu amo.’”