Ku Bena Loma
6 Nanchi twambe’mba ka? Nanchi tulengengatu mambo pa kuba’mba lusa lukatampe lwa Lesa luvule nyi? 2 Ine! Byo twakasululwa ku bundengamambo,+ mambo ka o twafwainwa kukikelanga monka?+ 3 Nangwa nanchi kechi mwayuka’mba, atweba bonse twabatizhiwe mwi Kilishitu Yesu,+ twabatizhiwe mu lufu lwanji nenyi?+ 4 Onkao mambo, betuzhiikile nanji mu lubatizhilo lwetu monka mu lufu lwanji,+ pa kuba’mba byonka Kilishitu byo asangukile mu bafu mu lukumo lwa Shanji, onkao mambo ne atweba twafwainwa kwikala bwikalo bwa katataka.+ 5 Umvwe twakwatankana nanji mu lufu lwanji,+ ko kuba’mba tukakwatankana nanji mu lusanguko lwanji.+ 6 Mambo twayuka’mba bumuntu bwetu bwa kala bwapopelwe nanji ponka pa kichi+ kuba’mba mubiji wetu wa bundengamambo abule kwikala na luusa pe atweba,+ pa kuba’mba tubule kwikala bazha ba bundengamambo.+ 7 Mambo awa wafwa, bamukasulula* ku bundengamambo bwanji.
8 Kabiji umvwe twafwila pamo na Kilishitu, twaitabila’mba tukekala nanji pamo. 9 Mambo twayuka’mba Kilishitu, byo asanguka kala mu bafu,+ kechi ukafwa jibiji ne;+ lufu kechi lukakonsha kumushinda jibiji ne. 10 Mambo lufu lo afwile, wafwile jimo jonka kuba’mba afumyepo bundengamambo kikupu,+ bino bumi bo aikala nabo, waikala nabo kuba’mba obe kyaswa muchima wa Lesa. 11 Byonkabyo, ne anweba imonainga’mba mwafwa ku bundengamambo, bino amba mwi bomi kwi Lesa kupichila mwi Kilishitu Yesu.+
12 Onkao mambo, kange muleke bundengamambo bwimulamenga nobe mfumu mu mibiji yenu ifwa+ kuba’mba mukookelenga byo isaka ne. 13 Kabiji kange mupane mibiji* yenu kwikala bilwilo bya bubi ne, bino ipanainga anwe bene kwi Lesa nobe bantu bomi basanguka mu bafu, ne kupana mibiji* yenu kwi Lesa kwikala bilwilo bya bololoke.+ 14 Mambo bundengamambo kechi bwafwainwa kwikala na bunkambo pe anweba ne, mambo kechi mukiji mu mizhilo ne,+ bino muji mu lusa lukatampe lwa Lesa.+
15 Pano tusakwamba’mba ka? Nanchi tulenge mambo, na mambo a kuba’mba kechi tukiji mu mizhilo ne, bino tuji mu lusa lukatampe lwa Lesa nyi?+ Ine! 16 Nanchi kechi mwayuka’mba umvwe saka mwipana anwe bene ku muntu kwikala bazha ne kumukookela, mwi bazha ba yewo muntu ye mukookela,+ ko kuba’mba mwi bazha ba bubi+ butwala ku lufu,+ nangwa mwi bazha ba lukookelo lutwala ku bololoke nenyi? 17 Bino musanchilenga Lesa kuba’mba nangwa kya kuba pa kimye kimo mwajinga bazha ba bundengamambo, pano mwakookela na muchima yense awa musango wa lufunjisho lo emupele Lesa. 18 Byo bemukasulwile ku bundengamambo,+ mwaikele ke bazha ba bololoke.+ 19 Mbena kwamba monka mwambila bantu na mambo a kukooka kwa mibiji yenu namba; byonkatu byo mwapananga binungwa byenu bya mubiji nobe bazha ba bubipisho ne bazha ba mizhilulwila mu kuba mingilo yatama, byonkabyo panainga binungwa byenu bya mubiji kwikala nobe bazha ba bololoke bulengela kwikala bazhila.+ 20 Mambo byo mwakijinga bazha ba bundengamambo, kechi mwalondelanga bololoke ne.
21 Mwapanganga bipangwa bya mutundu ka pa kyokya kimye? Bintu bimulengesha bumvu luno. Mambo mpelo ya bino bintu ke lufu.+ 22 Nangwa byonkabyo, byo bemukasulwile ku bundengamambo ne kwikala ke bazha ba Lesa, mubena kupanga bipangwa mu buzhile,+ kabiji ku mpelo mukekala na bumi bwa myaka ne myaka.+ 23 Mambo mfweto ya bundengamambo lo lufu,+ pa kuba bupe bo apana Lesa ke bumi bwa myaka ne myaka+ kupichila mwi Kilishitu Yesu Nkambo yetu.+