Mitonyi

20 Kepo bena Isalela bonse baishile kufuma ku Danyi+ kukafika ne ku Belesheba ne ku kyalo kya Gileada,+ ne jibumba jonse jakonkene pamo* kwi Yehoba ku Mizipa+ na mulanguluko umo. 2 Kabiji babinemanga ba bantu ne mikoka ya bena Isalela yonse baimene mu kipwilo kya bantu ba Lesa—bashilikale 400,000 benda panshi bajinga na mapoko.+

3 Bena Benjamina baumvwine’mba banabalume bena Isalela baya ku Mizipa.

Kepo banabalume bena Isalela baambile’mba: “Tubuulai, kino kintu kyatama kyaubiwe byepi?”+ 4 Kepo mwanamulume mwina Levi,+ muka yewa mwanamukazhi ye baipayile, akumbwile’mba: “Nafikile mu muzhi wa Gibea+ wa bena Benjamina na ntombo wami kuba’mba ndaale monka bufuku. 5 Kabiji bangikazhi* ba mu Gibea bañimejile ne kuzhokoloka nzubo bufuku. Bakebelenga kungipaya, pano bino balaajijile ntombo wami, kabiji wafwile.+ 6 Onkao mambo, nashikwile mubiji wa ntombo wami ne kumuchibaula ne kutuma bipimvwa mu mapunzha onse a buswanyi+ bwa bena Isalela, mambo baubile kintu kya bumvu kabiji kya bunya mu Isalela. 7 Pano anweba bonse bena Isalela, ambai byo mwalanguluka ne mwa kuchibila mambo konka kuno.”+

8 Kepo bantu bonse baimene na mulanguluko umo* ne kwamba’mba: “Kafwako nangwa umo mwi atweba usakuya ku tente wanji nangwa kubwela ku nzubo yanji ne. 9 Kino kyo kintu kyo tusakuba muzhi wa Gibea: Twayai tusale banabalume basakuya na kumulukuka kupichila mu kuta bubale.+ 10 Tusakusala banabalume 10 kufuma mu bantu 100 ba mu mikoka yonse ya bena Isalela, ne bantu 100 kufuma mu bantu 1,000 ne bantu 1,000 kufuma mu bantu 10,000 ba kutambula mpao ya bashilikale, pa kuba’mba bakaye na kulukuka muzhi wa Gibea wa bena Benjamina, na mambo a kintu kya bunya kyo bauba mu Isalela.” 11 Byonkabyo, banabalume bonse bena Isalela bakonkene pamo* ne kulukuka muzhi saka bakwatankana.

12 Kepo mikoka ya bena Isalela yatumine banabalume ku banabalume ba mu mukoka wa bena Benjamina amba: “Nga kino kintu kyatama kyaubiwa byepi mwi anweba? 13 Pano tupai banabalume bancha ba mu Gibea,+ kuba’mba twibepaye ne kufumya kintu kyatama mu Isalela.”+ Bino bena Benjamina bakaine kumvwa byaambile balongo babo bena Isalela.

14 Kepo bena Benjamina bakonkene pamo kufuma mu mizhi ya Gibea kuba’mba baye na kulwa nkondo na banabalume bena Isalela. 15 Pa jo ja juba bena Benjamina baichile banabalume 26,000 kufuma mu mizhi yabo bajinga na mapoko, kununga pa banabalume 700 bo basajile ba mu Gibea. 16 Mu ino nzhita mwajinga banabalume 700 bo basajile baingijishanga maboko a kipiko. Muntu yense mu bano banabalume wayukile kwasa jibwe na kinzhipunzhipu kwa kubula nangwa kutupila lusuki.

17 Kufumyako bena Benjamina, banabalume bena Isalela baichile banabalume 400,000 bajinga na mapoko,+ ne muntu yense wayukile kulwa nkondo. 18 Baimene ne kuya ku Betele na kwipuzha Lesa.+ Kepo bena Isalela bashikishe’mba: “Ñanyi mwi atweba usakwitutangijila pa kuya na kulwa nkondo na bena Benjamina?” Yehoba wibakumbwile’mba: “Bena Yuda bo basakwimutangijila.”

19 Kepo bena Isalela baimene lukelo ne kukatebelela ku Gibea kuba’mba balwe.

20 Banabalume bena Isalela bayile na kulwa na bena Benjamina; betanchikile ne kulwa nkondo nabo konka ku Gibea. 21 Byonkabyo, bena Benjamina baishile kufuma ku Gibea ne kutapa banabalume bena Isalela 22,000 pa jo ja juba. 22 Nangwa byonkabyo, banabalume ba nzhita ya bena Isalela bachinchikile, kabiji betanchikile jikwabo ne kulwa nkondo mu mpunzha intutu imo, byonkatu byo baubile juba jitanshi. 23 Kepo bena Isalela bayile na kujila kwi Yehoba kufikatu ne mabanga ne kumwipuzha Yehoba amba: “Nanchi tuyeko jikwabo na kulwa nkondo na balongo betu bena Benjamina nyi?”+ Yehoba wibakumbwile’mba: “Yainga mukalwe nabo.”

24 Onkao mambo, bena Isalela bayile kwipi na bena Benjamina pa juba ja bubiji. 25 Ponkapo bena Benjamina balupukile kufuma mu Gibea ne kwibasambakana pa juba ja bubiji, kabiji batapijilepo ne banabalume bakwabo bena Isalela 18,000,+ bonse bano bajinga na mapoko. 26 Kepo banabalume bena Isalela bonse bayile ku Betele. Bajijile ne kwikala konkakwa ku meso a Yehoba,+ kabiji bazhikilwe na nzala+ aja juba kufikatu ne mabanga ne kulambula milambo ya kusoka+ ne milambo ya mutende+ kwi Yehoba. 27 Kepo banabalume bena Isalela bamwipwizhe Yehoba,+ mambo jikwachi ja lulayañano ja Lesa wa kine, jajinga konkakwa mu oa moba. 28 Finease+ mwana wa kwa Eleaza, Eleaza mwana wa kwa Alona, ye waingijilanga* ku jikwachi mu oa moba. Baipwizhe’mba: “Nanchi tuye jikwabo na kulwa nkondo na balongo betu, banabalume bena Benjamina, nangwa twikileketu nyi?”+ Yehoba wibakumbwile’mba: “Yainga, mambo kesha nkebapana mu maboko enu.” 29 Kepo bena Isalela babikile bakubelamina+ kuzhokoloka Gibea yense.

30 Bena Isalela bayile na kulwa na bena Benjamina pa juba ja busatu, kabiji betanchikile ne kulwa na Gibea byonkatu byo baubile pa bimye bikwabo.+ 31 Bena Benjamina byo balupukile kuya na kusambakana nzhita, betatwajile kwalepa na muzhi.+ Kabiji byonkatu byo baubile pa bimye bikwabo, batendekele kulukuka ne kwipayapo banabalume bamo mu mikwakwa ikatampe, mukwakwa umo waya ku Betele ne mukwabo waya ku Gibea, baipayilepo banabalume bena Isalela nobe 30 mungyetu.+ 32 Onkao mambo, bena Benjamina baambile’mba: “Tusakwibashinda byonkatu byo twibashinjile patanshi.”+ Bino bena Isalela baambile’mba: “Tusakunyema ne kwibatwala kwalepa na muzhi kuya mu mikwakwa ikatampe.” 33 Byonkabyo banabalume bena Isalela bonse baimene kufuma mu mapunzha mo bajinga ne kwitanchika ku Baela-tamala, kimye bena Isalela babelamijile kyo bafuminenga mu mapunzha mo bafyamine ajinga kwipi na Gibea. 34 Kepo banabalume 10,000 bo basalulwile mu bena Isalela bonse baishile kwipi na Gibea, kabiji nkondo yakosele bingi. Bino bena Benjamina kechi bayukile’mba bya malwa byajinga pepi ne.

35 Yehoba washinjile Benjamina+ bena Isalela saka batalako, kabiji pa jo ja juba bena Isalela batapile banabalume 25,100 mu Benjamina, bonse bano bajinga na mapoko.+

36 Nangwa byonkabyo, bena Benjamina balangulukilenga’mba basakushinda banabalume bena Isalela, byo bamwene’mba banyema bena Benjamina,+ bino banyemene mambo baketekejile mu boba babelamijile muzhi wa Gibea.+ 37 Aba babelamijile bapelawizhe kuya ku muzhi wa Gibea. Kepo aba babelamijile bapalañenejilemo ne kutapa na mpoko bonse bajinga mu muzhi.

38 Banabalume bena Isalela baumvwañene’mba, aba banabalume babelamijile muzhi bafwainwa kumwesha kiyukilo kya kufutumuna bwishi mu muzhi.

39 Bena Isalela byo banyemene ku nkondo, banabalume bena Benjamina batatwile kulukuka ne kwipayapo banabalume bena Isalela nobe 30,+ kabiji baambile’mba: “Kyamwekeshatu patoka’mba tusakwibashinda jikwabo, byonkatu byo twibashinjile mu nkondo itanshi.”+ 40 Bino kiyukilo kyatatwile kuya mwiulu kufuma mu muzhi nobe mulumbulumbu wa bwishi. Banabalume bena Benjamina byo baalulukile ne kutalako, bamwene lubebe lwa mujilo mu muzhi yense saka luya mwiulu. 41 Kepo banabalume bena Isalela baalulukile, ne banabalume bena Benjamina bakankamenetu, mambo bamwene’mba bya malwa bibafikila. 42 Onkao mambo, banyemene kufuma ku banabalume bena Isalela ne kuya mu kiselebwa, bino nzhita ibalondejile; kabiji banabalume bafuminenga mu muzhi baijile pamo nabo na kwibatapa. 43 Bazhokolokele bena Benjamina ne kwibapupila kwa kubula kuleka. Bebanyantawijile kwipi na Gibea ku musela. 44 Kepo baipayile banabalume bena Benjamina 18,000, bonse bano bajinga babilobo.+

45 Banabalume bena Benjamina baalulukile ne kunyemena mu kiselebwa ku jibwe jikatampe ja Limonyi,+ kabiji bena Isalela baipayile* banabalume 5,000 mu mikwakwa ikatampe, kabiji bebapupijilenga kukafika ne ku Gidoma; byonkabyo, batapijilepo ne banabalume bakwabo 2,000. 46 Bena Benjamina bonse bafwile pa jo ja juba, bafikile banabalume 25,000 bajinga na mapoko,+ bonse bano bajinga babilobo. 47 Bino banabalume 600 banyemejile mu kiselebwa ku jibwe jikatampe ja Limonyi, kabiji baikele konka ku jibwe jikatampe ja Limonyi pa bañondo bana.

48 Kabiji banabalume bena Isalela baalulukile ne kulwa na bena Benjamina ne kutapa aba bajinga mu muzhi na mpoko, kutendekela ku mwanamulume kufika ne ku bilelwa ne byonse byashajilemo. Kabiji mizhi yonse yajinga ku jishinda jo bapichilengamo beisokele na mujilo.