Buku Mutanshi wa Bamfumu

1 Mfumu Davida wakotele,+ wajinga na myaka* yavula, kabiji nangwa kya kuba bamuvwetanga myemba, kechi waumvwanga kyuya ne. 2 Onkao mambo, bakalume banji bamwambijile’mba: “Twimukebelepo kamwale, kisungu, anweba nkambo mfumu, akemulamenga anweba mfumu. Ukalaalanga mu kyaji kyenu pa kuba’mba anweba nkambo mfumu mukomvwenga kyuya.” 3 Bakebele mu nyaunda yonse ya bena Isalela kamwale walamba bingi, kabiji bataaine Abishagi+ mwina Shunema+ ne kumuleta kwi mfumu. 4 Uno kamwale walambile bingi, kabiji walaminenga mfumu ne kumwingijila, bino mfumu kechi wilaajilepo nanji ne.

5 Kabiji Adoniya+ mwana wa kwa Hagita witumbijikilenga ne kwamba’mba: “Yami nsakwikala mfumu!” Wikebejile kalaki ne bantu benda pa bambili ne banabalume 50 bakutangilako lubilo kulutwe yanji.+ 6 Bino shanji kechi wamwambijilepo* amba: “Mambo ka o waubila kino?” ne. Kabiji walambile bingi, ye wajinga wa bubiji kusemwa kwi inanji kulondela pe Abisalomo. 7 Waumvwañene ne Yoaba mwana wa kwa Zeluya ne Abiata+ ñanga, kabiji abo bamukwashishe Adoniya ne kukwatankana nanji.+ 8 Pakuba Zadoka+ ñanga, ne Benaya+ mwana wa kwa Yehoyada, ne ngauzhi Natana,+ ne Shimei+ ne Lei ne babilobo ba kwa Davida+ kechi bakwatankene ne Adoniya ne.

9 Kabiji Adoniya wanengezhezhe kitapisho+ kya mikooko, bañombe ne banyama banuna kwipi na jibwe ja Zoheleta, jaikela kwipi na Ene-logela, kabiji waichile balongo banji bonse baana ba balume ba mfumu, ne banabalume bena Yuda bonse bakalume ba mfumu. 10 Bino ngauzhi Natana, ne Benaya ne babilobo nangwa nkasanji Solomone, kechi wibechileko ne. 11 Kepo Natana+ aambijile Batesheba+ inanji Solomone+ amba: “Nanchi kechi mwaumvwa’mba Adoniya+ mwana wa kwa Hagita pano ke mfumu nenyi? Nanchi bankambo yetu ba Davida kechi bayuka kino nenyi? 12 Pano mwane ubai nemubuuleko maana, pa kuba’mba mupulushe bumi bwenu ne bwa* mwanenu Solomone.+ 13 Yainga kwi ba Mfumu ba Davida mwi bepuzhe’mba, ‘Anweba nkambo mfumu, nanchi kechi yenu mwachipile kwi amiwa wa mwingilo wenu amba: “Mwanobe Solomone ye ukanswana pa bufumu, kabiji ye ukekala pa jitanda jami nenyi”?+ Pano mambo ka Adoniya o aikela mfumu?’ 14 Byo musakwisambanga na ba mfumu, ne amiwa nsakwiya ne kwitabizha byo musakwambanga.”

15 Onkao mambo, Batesheba wayile kwi mfumu, mu kibamba kyanji kya mukachi. Mfumu wakotele bingi kabiji Abishagi+ mwina Shunema wamwingijilenga mfumu. 16 Kepo Batesheba afukamine ne kuponena panshi kinkuvumene kwi mfumu, kabiji mfumu wamushikishe’mba: “Ubena kukeba ka?” 17 Aye wakumbwile’mba: “Nkambo yami, yenu mwachipile kwi amiwa wa mwingilo wenu mu jizhina ja Yehoba Lesa wenu amba, ‘Mwanobe Solomone ye ukanswana pa bufumu, kabiji ye ukekala pa jitanda jami.’+ 18 Pano umvwai! Adoniya ye waikala ke mfumu, ne anweba nkambo mfumu kechi mwayuka kino ne.+ 19 Watapisha bañombe balume, banyama banuna, ne mikooko yavula bingi ne kwita baana ba balume bonse ba mfumu ne Abiata ñanga ne Yoaba mukulumpe wa nzhita;+ pakuba Solomone kalume wenu kechi waji kumwitako ne.+ 20 Pano anweba nkambo mfumu, bena Isalela bonse babena kutala kwi anweba kuba’mba mwibabuule usakukekala pa jitanda jenu anweba nkambo mfumu. 21 Mambo inge ne, anweba nkambo mfumu byo mukayatu kwalaala bashakulu benu, amiwa ne mwanami Solomone baketumonanga’mba twi bansatuki.”

22 Byo akisambilenga na mfumu, ngauzhi Natana watwelele.+ 23 Ponkapo mfumu bamubuujile’mba: “Ngauzhi Natana waiya!” Watwelele mwajinga mfumu ne kupona panshi kinkuvumene saka akunyika kilungi kyanji kwi mfumu. 24 Kepo Natana aambile’mba: “Anweba nkambo mfumu, nanchi mwaambile’mba, ‘Adoniya ye ukanswana pa bufumu, kabiji ye ukekala pa jitanda jami’ nyi?+ 25 Mambo lelo jino, waya na kutapisha+ bañombe balume, ne banyama banuna, ne mikooko yavula bingi, kabiji waita baana ba balume bonse ba mfumu ne bakulumpe ba nzhita ne Abiata ñanga.+ Babena kuja ne kutomena pamo nanji konkakwa, kabiji babena kwamba’mba, ‘Mfumu Adoniya ekale myaka!’ 26 Pakuba amiwa kalume wenu, nangwa Zadoka ñanga, nangwa Benaya+ mwana wa kwa Yehoyada, nangwa Solomone kalume wenu, kechi witwitako ne. 27 Nanchi anweba nkambo mfumu mwaswisha kino kintu kwa kubula kumbuula amiwa kalume wenu muntu ukekala pa jitanda jenu anweba nkambo mfumu nyi?”

28 Mfumu Davida waambile’mba: “Ngichilaiko Batesheba.” Ponkapo waishile ku mfumu. 29 Kepo mfumu achipile’mba: “Byonkatu Yehoba byo aji na bumi, yenka wampokolwele* mu bya malwa byami byonse,+ 30 byonkatu byo nachipile kwi obewa mu jizhina ja Yehoba Lesa wa Isalela namba, ‘Mwanobe Solomone ye ukanswana pa bufumu, kabiji ye ukekala pa jitanda jami!’ byonka bino byo byo nsakuba lelo jino.” 31 Ponkapo Batesheba wakunyikile kilungi kyanji panshi ne kuponena panshi kinkuvumene kwi mfumu ne kwamba’mba: “Anweba nkambo Mfumu Davida mwikale myaka ne myaka!”

32 Ponkapo Mfumu Davida waambile’mba: “Ngichilaiko Zadoka ñanga, ne ngauzhi Natana ne Benaya+ mwana wa kwa Yehoyada.”+ Ne abo baishile kwi mfumu. 33 Mfumu wibambijile’mba: “Sendai bakalume ba nkambo yenu, kabiji Solomone mwanami mumukanjizhe pa myule* wami+ ne kumutwala ku Gihona.+ 34 Zadoka ñanga ne ngauzhi Natana bamushinge manyi+ konkakwa kuba’mba ekale mfumu wa bena Isalela; apa bino muvumye lusengo ne kwamba’mba, ‘Mfumu Solomone ekale myaka!’+ 35 Kabiji mubwele saka mumulondela, ne aye usakwiya ne kwikala pa jitanda jami; kabiji usakunswana pa bufumu, ne amiwa nsakumutongola kwikala ntangi wa bena Isalela ne bena Yuda.” 36 Ponkapo Benaya mwana wa kwa Yehoyada waambijile mfumu amba: “Amena! Yehoba Lesa wa nkambo yami mfumu aswishe kino. 37 Byonkatu Yehoba byo ajinga na nkambo yami mfumu, ekale ne na Solomone,+ kabiji abayishe jitanda janji kukila jitanda jenu anweba nkambo Mfumu Davida.”+

38 Kepo Zadoka ñanga, ne ngauzhi Natana, ne Benaya+ mwana wa kwa Yehoyada, ne bena Keleta ne bena Peleta+ bayile kabiji Solomone bamukanjizhe pa myule wa Mfumu Davida,+ ne kumutwala ku Gihona.+ 39 Kabiji Zadoka ñanga washikwile lusengo mwajinga manyi+ wajinga mu tente+ ne kumushinga Solomone,+ kabiji batendekele kuvumya lusengo, ne bantu bonse batendekele kubijika’mba: “Mfumu Solomone ekale myaka!” 40 Byo bapwishishe kuba bino, bantu bonse bamulondejilenga ne kuya, saka bajizha mimpempe ne kusangalala bingi, kya kuba ne ntanda yaubile nobe yalajika na mambo a kyungwe kyabo.+

41 Adoniya ne bantu bonse bo aichile byo bapwishishe kuja, baumvwine kino.+ Yoaba byo aumvwinetu kuvuma kwa lusengo, waipwizhe’mba: “Mambo ka mu muzhi o mwaubila kiwowo byobyo?” 42 Byo akyambilenga, Yonafwanyi+ mwana wa kwa Abiata ñanga waishile. Kepo Adoniya amwambijile’mba: “Fika, mambo obewa wi muntu wawama,* wafwainwa waleta mbila yawama.” 43 Bino Yonafwanyi waambijile Adoniya amba: “Ine mwane! Ba Mfumu ba Davida bankambo baswanyika Solomone pa bufumu. 44 Ba mfumu baji kumutuma pamo ne Zadoka ñanga, ne ngauzhi Natana, ne Benaya mwana wa kwa Yehoyada, ne bena Keleta ne bena Peleta, kabiji baji kumukanjizha pa myule wa ba mfumu.+ 45 Kepo Zadoka ñanga, ne ngauzhi Natana baji kumushinga manyi mu Gihona amba ekale ke mfumu. Byo baji kupwisha kuba kino, baji kufumako saka basangalala, ne mu muzhi muji kyungwe. Kyo kyungye kyo mwaji kumvwa. 46 Kabiji Solomone waikala pa jitanda ja bufumu. 47 Kabiji kikwabo, bakalume ba mfumu baji kwiya na kumusanchila nkambo Mfumu Davida amba, ‘Lesa wenu alengele jizhina ja kwa Solomone kutumbalala kukila jenu, kabiji abayishe jitanda janji kukila jenu!’ Ne ba mfumu baji kufukamina pa mwanya. 48 Kabiji ba mfumu baji kwamba’mba, ‘Atotwe Yehoba Lesa wa Isalela, yenka watongola muntu wa kwikala pa jitanda jami lelo ne kuswisha meso ami kumona kino kintu!’”

49 Ponkapo bantu bonse bo aichile Adoniya baumvwine moyo, kabiji bonse pa muntu pa muntu baimene ne kuya au janji, au janji. 50 Adoniya naye waumvwine moyo na mambo a kwa Solomone, onkao mambo, waimene ne kuya na kukwata ku nsengo ya kya kusokelapo bitapisho.+ 51 Solomone bamubuujile’mba: “Adoniya waumvwa moyo na mambo a Mfumu Solomone; kabiji wakwata ku nsengo ya kya kusokelapo bitapisho ne kwamba’mba, ‘Patanshi Mfumu Solomone achipe kwi amiwa amba kechi usakungipaya na mpoko amiwa kalume wanji ne.’” 52 Kepo Solomone aambile’mba: “Inge obe bintu byawama, kafwako lusuki wanji nangwa umo usakuponena panshi ne; bino inge mwi aye mutanwe kintu kyatama,+ usakufwa.” 53 Kepo Mfumu Solomone atumine ba kuya na kumufumya ku kya kusokelapo bitapisho ne kumuleta. Kabiji waishile ne kufukama kwi Mfumu Solomone, ne Solomone wamwambijile’mba: “Yanga ku nzubo yobe.”