Buku wa Bubiji wa Bamfumu

10 Ahaba+ wajinga na baana ba balume 70 mu Samaliya. Onkao mambo, Yehu wanembele makalata ne kwiatuma ku Samaliya, ku babinemanga ba ku Yezelela, ne ku bakulumpe,+ ne ku boba balaminenga baana* ba kwa Ahaba amba: 2 “Ino nkalata byo isakufika kwi anweba, isakutaana saka muji na baana ba nkambo yenu, pamo na makalaki a nkondo, ne bambili, ne muzhi uji na nsakwa yakosa ne bilwilo bya nkondo. 3 Salai mwana wa nkambo yenu wawama kabiji wafikilamo* ne kumwikazha pa jitanda ja shanji. Apa bino mulwileko ba mu nzubo ya nkambo yenu.”

4 Pakuba abo baumvwine bingi moyo ne kwamba’mba: “Umvwai! Inge kya kuba bamfumu babiji bakankelwe kulwa nanji,+ nga atweba twakonsha kulwa nanji byepi?” 5 Onkao mambo, kalama wa kipango,* ne kalama wa muzhi, ne bakulumpe ne bakalama ba baana batumine ano mawi kwi Yehu amba: “Atweba twi bakalume benu, kabiji tukoobanga bintu byonse byo muketubuulanga. Bino kechi tusakutongola muntu nangwa umo kwikala mfumu ne. Ubai kyonse kyo mwamona’mba kyawama.”

6 Kepo ebanembejile nkalata ya bubiji amba: “Inge muji kwi amiwa kabiji mwaswa kunkookela, kesha pa kyonka kino kimye mukalete mitwe ya baana ba nkambo yenu ne kwiya kwi amiwa ku Yezelela.”

Kabiji baana bamfumu 70 bajinga pamo na bakulumpe ba muzhi bebakomeshe. 7 Byo batambwijiletu nkalata, basendele baana ba mfumu ba balume 70 ne kwibepaya,+ kabiji babikile mitwe yabo mu misansa ne kwiituma kwi aye ku Yezelela. 8 Muluwe waishile mo ajinga ne kumubuula’mba: “Baleta mitwe ya baana ba mfumu.” Aye waambile’mba: “Ilumbikai mu milumba ibiji ku kibelo kya muzhi ikale konka kufika ne lukelo.” 9 Byo alupukile lukelo, waimene kulutwe ya bantu bonse ne kwamba’mba: “Anweba kechi muji na mambo ne.* Amiwa yami namwalukijilemo nkambo yami ne kumwipaya,+ pano bañanyi baipaya bano bonse? 10 Bino yukai’mba, kafwako kyambo kya Yehoba nangwa kimo, Yehoba kyo aambijile ba mu nzubo ya kwa Ahaba kikabula kufika* ne,+ kabiji Yehoba wauba kyo aambile kupichila mwi kalume wanji Elaija.”+ 11 Kabiji Yehu waipayile bonse bashajilepo ba mu nzubo ya kwa Ahaba mu Yezelela, pamo na bakulumpe, ne balunda nanji, ne bañanga banji,+ kabiji kechi wapulwishepo muntu wanji nangwatu umo ne.+

12 Kepo aimene ne kuya ku Samaliya. Ku jishinda kwajinga nzubo* ya bakafunga ya kutendelamo boya bwa banyama. 13 Konkakwa Yehu wasambakene balongo ba kwa Ahaziya Mfumu+ wa Yuda, kabiji wibepwizhe’mba, “Yenu bañanyi?” Abo bamukumbwile’mba: “Twi balongo ba kwa Ahaziya, kabiji tubena kuya na kwipuzha inge baana ba mfumu ne baana ba inamfumu bajitu bulongo.” 14 Ponkapo waambile’mba: “Bakwatai bomi!” Byonkabyo, banabalume 42 bebakwachiletu bomi ne kwibepayila ku mushima* wajinga ku nzubo ya kutendelamo boya bwa banyama. Kechi wapulwishepo muntu nangwatu umo ne.+

15 Byo afumine kokwa, wasambakene Yehonadaba+ mwana wa kwa Lekaba,+ waishilenga na kumutundaila. Byo amwimwine,* wamwambijile’mba: “Nanchi muchima wobe uji* kwi amiwa, byonkatu muchima wami byo aji na muchima wobe nyi?”

Yehonadaba wamukumbwile’mba: “Ee, uji kwi anweba.”

“Inge ibyo, nkwate mu kuboko.”

Byonkabyo, wamukwachile mu kuboko, kabiji Yehu wamukokejile mu kalaki wanji. 16 Kepo amwambijile’mba: “Twaya umone byo mbula kukeba aba balwa* ne Yehoba.”+ Byonkabyo, bayile nanji mu kalaki wanji wa nkondo. 17 Kepo afikile mu Samaliya, ne kwipaya bonse bashajilepo ba mu nzubo ya kwa Ahaba mu Samaliya kufikatu ne byo ebavizhizhe,+ monkatu mwayijile byambo bya Yehoba byo aambile kwi Elaija.+

18 Kabiji Yehu wakonkenye pamo bantu bonse ne kwibambila’mba: “Ahaba wapopwejilenga Baela kya byonkabya,+ pakuba amiwa Yehu, nkakizhapo kumupopwela. 19 Pano itai bangauzhi ba kwa Baela bonse,+ ne bonse bamupopwela, ne bañanga+ banji bonse mwibalete kwi amiwa. Kange mushepo nangwa umo ne, mambo nji na kitapisho kikatampe kya kwa Baela. Yense usakubula kutanwako kechi usakwikala na bumi ne.” Bino Yehu waubilenga kino mu bujimuku amba epaye bapopweshi ba kwa Baela.

20 Yehu watwajijile kwamba’mba: “Bijikai* amba kuji kubuñana kwazhila kwa kwa Baela.” Byonkabyo babijikile. 21 Byo bapwishishe kuba bino, Yehu watumine jiwi monse mu Isalela, kabiji bapopweshi ba kwa Baela bonse baishile. Kafwako nangwa umo wabujile kwiya ne. Batwelele mu nzubo ya kwa Baela,+ kabiji nzubo yonse yayujile. 22 Waambijile walaminenga nzubo ya bivwalo amba: “Baletele bivwalo bya bapopweshi bonse ba kwa Baela.” Byonkabyo wibaletejile bivwalo. 23 Kepo Yehu ne Yehonadaba+ mwana wa kwa Lekaba batwelele mu nzubo ya kwa Baela. Kabiji waambijile bapopweshi ba kwa Baela amba: “Talatalai bulongo mumone amba kafwamo bapopweshi ba Yehoba muno, kanatu bapopweshi ba kwa Baela kwapwa.” 24 Kabiji batwelele na kutapisha ne kulambula milambo ya kusoka. Kabiji Yehu wabikile banabalume banji 80 pangye ne kwibambila’mba: “Inge muntu wa mu bano bantu bo nemupa anyeme, bumi bwenu bo busakupingakena pa bumi bwanji.”*

25 Byo apwishishetu kulambula mulambo wa kusoka, Yehu waambijile bakasopa* ne bakulumpe ba nzhita amba: “Twelai mwibatape! Kange muleke muntu nangwa umo apuluke ne!”+ Byonkabyo, bakasopa ne bakulumpe ba nzhita batapile bantu na mpoko ne kwibataya pangye, kabiji batwelele ne mu kibamba kyazhila* kya mukachi mu nzubo ya kwa Baela. 26 Kabiji balupwile mashiki azhila+ a mu nzubo ya kwa Baela ne kwiasoka onse.+ 27 Bakundwile jishiki jazhila+ ja kwa Baela, ne kukundula nzubo ya kwa Baela+ kabiji beyalwile ke byolonyi, byonkatu byo iji kufika ne lelo jino.

28 Byonkabyo, Yehu wafumishemo mpopwelo ya Baela mu Isalela. 29 Nangwa byonkabyo, Yehu kechi walekele kuba bubi Yeloboma mwana wa kwa Nebati bo alengejile bena Isalela kuba ne, bwa kupopwela baana bañombe ba ngolode bajinga mu Betele ne mu Danyi.+ 30 Onkao mambo, Yehoba waambijile Yehu amba: “Na mambo a kuba wauba bulongo ne kuba byaoloka ku meso ami kupichila mu kuba byonse byajinga mu muchima wami ku ba mu nzubo ya kwa Ahaba,+ bisemi bina bya baana bobe bikekalanga pa jitanda ja Isalela.”+ 31 Bino Yehu kechi watele muchima wanji yense pa kulondela Mizhilo ya Yehoba Lesa wa Isalela ne.+ Kechi walekele kuba bubi Yeloboma bo alengejile bena Isalela kuba ne.+

32 Mu oa moba, Yehoba watendekele kuchibako* nyaunda ya bena Isalela pachepache. Hazela watwajijile kwibalukuka mu nyaunda yonse ya Isalela,+ 33 kufuma ku musela wa Yodano, kyalo kyonse kya Gileada, mwajinga bena Gadi, ne bena Lubenyi, ne bena Manase,+ kufuma ku Aloa uji kwipi na Kimpachiko* kya Alanonyi, kukafika ku Gileada ne ku Bashana.+

34 Bintu bikwabo byapichilemo Yehu, bintu byonse byo aubile ne mingilo yanji yonse ikatampe, nanchi kechi byanembwa mu buku wa bintu byapichilengamo bamfumu ba mu Isalela nenyi? 35 Kepo Yehu bamutwajile na kulaala kwalaala bashakulu banji, kabiji bamuzhiikile mu Samaliya; kabiji mwananji aye Yehoahaza+ wamuswaine pa bufumu. 36 Yehu walamine bena Isalela pa myaka 28 mu Samaliya.