Nkalata Itanshi ya kwa Petelo
5 Onkao mambo, byo nji mukwenu mukulumpe mu kipwilo, wamweneko kumanama kwa Kilishitu kabiji ukatambulako lukumo lukasololwa,+ mbena kusashijila* bakulumpe mu kipwilo bo muji nabo kuba’mba: 2 Fungainga jitanga ja Lesa+ jo bemupa kulama, byo muji bakalama,* kange mwingilenga kya kwimukanjikizha ne, mwingilenga na muchima wa kwipana kwi Lesa;+ kechi na muchima wa kukeba kumwenamo mali ne,+ bino na muchima yense; 3 kechi kwibobila bunkambo aba Lesa bo enonkela mwine ne,+ kana kwikala ba kumwenako jitanga.+ 4 Kabiji kafunga mwine mukatampe+ byo akasoloka, ne anweba mukatambula munchinya wa lukumo ubula kwaluka.+
5 Ne anweba bansongwalume nekenenainga bakulumpe.*+ Bino anweba bonse vwalai* muchima wa kwipelula mu bintu byo mwiubila anwe bene na bene, mambo Lesa ukana bantu belundumika, pakuba ubila lusa lwanji lukatampe bantu bepelula.+
6 Onkao mambo, ipelulainga munshi ya kuboko kwa Lesa kwa bulume, kuba’mba akemutumbijike mu kimye kyafwainwa,+ 7 saka mutaya bijikila* byenu byonse pe aye,+ mambo wimuta muchima.+ 8 Jimukai, saka mulaba ne kukenkenta!+ Mulwanyi wenu aye Diabola upitañana nobe bokwe ubuluma ubena kukeba wa kuja.+ 9 Bino anweba mwimenai saka mwakosa+ mu lwitabilo, byo mwayuka’mba bya kumanama bintutu bimo byo bibena kupitamo ne balongo* benu bonse baji pano pa ntanda.+ 10 Kabiji inge mwamanama pa kakimye kacheche, aye Lesa wa lusa lonse lukatampe wimwichile ku lukumo lwanji lwa myaka+ byo muji mwi Kilishitu, ye ukapwisha kwimufunjisha. Ukemulengela kushikimana,+ ukemukosesha,+ ne kwimujimba. 11 Kwi aye kwikale bulume myaka ne myaka. Amena.
12 Kwingijisha Silivanusa*+ ye mmona namba mulongo wa kishinka, nemunembela byambo bicheche bya kwimutundaika ne kwimubuujisha namba, luno lo lusa lukatampe lwa Lesa lwa kine. Koselai monka. 13 Mwanamukazhi* wasalwa uji mu Babilona, uji byonka byo muji, wimwimuna ne mwanami Mako+ naye wimwimuna. 14 Iimunai anwe bene na bene na kwifyompa mu butemwe.
Mutende ekale pe anweba bonse muji mwi Kilishitu.