Nkalata Itanshi kwi Timoti
4 Nangwa byonkabyo, mupashi wa Lesa waamba’mba kine mu kimye kya kulutwe bamo bakafuma mu lwitabilo, bakatesha muchima ku byambo bya bubela bimweka nobe byafuma kwi Lesa+ ne ku mafunjisho a bandemona, 2 na mambo a bukamfutumfutu bwa bantu bamba bya bubela,+ baji na jiwi ja mu muchima jauma nobe kikoba kyo basoka na kyela. 3 Bakanya kusongola+ ne kukambizha bantu kuzhila kajo+ ko alengele Lesa amba bakajenga+ na kusanta aba baji na lwitabilo+ kabiji bayukisha bukine. 4 Mambo bintu byonse Lesa byo alengele byawama,+ kabiji kafwako nangwa kimo kyo bafwainwa kukana ne,+ umvwe bekitambula na kusanta, 5 mambo bekizhijika kupichila mu mambo a Lesa ne mu lulombelo.
6 Umvwe saka wibabula balongo bino bintu, ukekala wa mwingilo wawama wa kwa Kilishitu Yesu, wikomesha na byambo bya lwitabilo ne na lufunjisho lwawama lo walondela bulongo.+ 7 Bino saka ukana mashimikila a bubela,+ nabiji oa ashimikizha banabakazhi bakote. Pano bino, saka wikosesha obe mwine ne kwikala na kikonkwanyi kya kumwesha munema wa kunemeka Lesa. 8 Mambo mu kukosesha mubiji ukamwenamo bicheche, pakuba mu munema wa kunemeka Lesa ukamwenamo bintu byonse, mambo muji mulaye wa kwikala na bumi mu kino kimye ne mu kimye kya kulutwe.+ 9 Bino byambo kya kishinka kabiji byafwainwa kwitabilwa. 10 O ene mambo o tubena kwingijila na ngovu ne kwibikishakotu na mukoyo,+ mambo twaketekela mwi Lesa mumi, Mupulushi+ wa bantu bonse,+ kikatakata ba kishinka.
11 Saka wibabula ino mikambizho ne kwibafunjisha. 12 Kange uleke muntu nangwa umo akulengulule na mambo a bwanyike bobe ne. Pano bino, wikale wa kumwenako bantu ba kishinka mu ñambilo, mu byubilo, mu butemwe, mu lwitabilo ne mu kwilama* bulongo. 13 Kufikatu ne byo nkeya, uteshe muchima ku kutanga pa mvula bantu,+ kukosesha* ne kufunjisha bantu. 14 Kechi wikilekelele akya kya bupe kyo bakupele kupichila mu bungauzhi bwaawilwe kimye jibumba ja bakulumpe mu kipwilo kyo jakutentekele maboko ne.+ 15 Saka ulangulukishapo* pa bino bintu; wikale monka, pa kuba’mba kuyilako palutwe kobe kumweke ku bantu bonse. 16 Saka wita muchima obe mwine ne lufunjisho lobe.+ Kosela mu bino bintu, mambo mu kuba bino ukepulusha obe mwine ne boba bakumvwa.+