Musapwishi

6 Kuji bintu bikwabo byatama* byo namona byuba bantu bavula pano pa ntanda: 2 Lesa wa kine upa muntu bunonshi, bipe, lukumo ne bintutu bikwabo kuchina’mba wakakajilwa bintu byo akeba;* pano bino Lesa wa kine kechi umuswisha kwiyowa bino bintu ne, nangwa kya kuba muntu ungi wakonsha kwiyowa bino bintu. Akino kyo kyatu kabiji kuyandatu. 3 Umvwe muntu wasema baana bavula ne kwikala myaka yavula kabiji wakota ne kukota, bino aye* wabula kusangalela mu bintu byanji byawama saka akyangye kufwa,* nafwainwa kwamba’mba mwana ye bapulumuna wawama kukila aye.+ 4 Mambo aye usemwatu ne kupitaila. Kechi bamutumbapotu ne jizhina ne, kabiji bamulubako uba nobe kechi wasemenwe ne. 5 Nangwa kya kuba kechi wamwenepo juba nangwa kuyuka kintu ne, aye wakila* uno muntu.+ 6 Ñanyi mfweto muntu yo amwenamo mu kwikala myaka biumbi bibiji kwa kubula kusangalela mu bintu byawama? Nanchi bonse kechi baya kuntutu kumo nenyi?+

7 Mingilo yonse ingila muntu ke ya kumwenamo kajo;+ pano bino kechi utondwa ne. 8 Nanchi muntu wa maana wakila byepi muntu wakosama?+ Kabiji ñanyi kintu kyawama kyuba muntu muyanji pa kuba’mba ayuke mwa kwikela?* 9 Kyawama kusangalela mu bintu byo ubena kumona, kukila kukeba bintu byo ukabula kwikala nabyo.* Kino nakyo kyo kyatu, ke kupulwilamotu mabuula.

10 Bintu byonse bijipo, Lesa wibilumbulula kala byo biji. Kabiji muntu wayukanyikwa byo aji; kabiji kechi wakonsha kwipachika* na yewa wamukila bulume ne. 11 Byambo* byavula byo byatu, kabiji byakonsha kulengela muntu kumwenamo ka? 12 Ñanyi wayuka bikeba kuba muntu mu bwikalo bwanji? Bumi bwanji bwatu, buzhimañanatu nobe kimvule.+ Pano ñanyi wakonsha kubuula muntu bikamweka pano pa ntanda inge wafwa?