Masalamo
Lwimbo. Lwimbo wa pa juba ja Sabado.
92 Kyawama kwimusanchila anweba Yehoba+
Ne kwimba nyimbo ya kutota jizhina jenu, anweba Mwine Wakila,
2 Ne kwamba lukelo pa butemwe bwenu bubula kwaluka+
Ne kwamba bufuku pa bukishinka bwenu,
3 Ne kwimba na kijimba kya mizhinge jikumi ne jisense,
Ne na kuvuma kwawama kwa kyansa.+
4 Mambo anweba Yehoba, mwandengela kusangalala na mambo a mingilo yenu;
Na mambo a mingilo ya maboko enu, ñimba na lusekelo.
5 Anweba Yehoba, mingilo yenu byo yavulapo!+
Ne milanguluko yenu byo yazhikapo!+
6 Muntu wabula maana kechi wakonsha kwiiyuka ne;
Ne muntu wakosama kechi wakonsha kuyuka kino ne:+
7 Babi byo bamena nobe nseku*
Ne bonse boba byatama byo bavula,
Kikala bino kuba’mba bakonaike myaka ne myaka.+
8 Pakuba anweba Yehoba, mwatumbijikwa myaka ne myaka.
9 Talai balwanyi benu ne kwibashinda, anweba Yehoba,
Kine, balwanyi benu bakavila;
Bonse boba byatama bakebapalañanya.+
10 Pakuba anweba mukandengela kwikala na bulume* nobe mboo;
Nkeshinga manyi kuba’mba mubiji wami akanekene.+
11 Meso ami akatalanga balwanyi bami byo bakebashinda;+
Ne matwi ami akomvwa konaika kwa bantu batama bandukuka.
13 Bebajimba mu nzubo ya Yehoba;
Batenkuma mu bipango bya Lesa wetu.+
14 Nangwatu mu bukote* bwabo, bakapanganga bipangwa;+
Bakatwajijila kwikala na bulume* saka batalala,+
15 Saka bamba’mba Yehoba waoloka.
Ye Jibwe jami,+ mwi aye kechi muji bubi ne.