Yelemiya
15 Kepo Yehoba añambijile’mba: “Nangwatu inge Mosesa ne Samwela baimene kwi amiwa,+ inge kechi nebobijile lusa bano bantu ne. Bafumye ku meso ami. Baleke bayenga. 2 Kabiji inge bakwambila’mba, ‘Kwepi ko tusakuya?’ ukebabuule’mba, ‘Yehoba waamba’mba:
“Awa yense wafwainwa kufwa ku kinkunka, afwe ku kinkunka!
Kabiji wafwainwa kufwa ku mpoko, afwe ku mpoko!+
Wafwainwa kufwa ku kipowe kya nzala, afwe ku kipowe kya nzala!
Kabiji yense wafwainwa kuya mu buzha, bamutwale mu buzha!”’+
3 “Yehoba waamba’mba, ‘Amiwa nkebatongwela bya malwa bina* bikebafikila,+ ko kuba’mba kwibepaya na mpoko, kwibatabaula ku bakabwa, kwibaja ne kwibonauna ku bañonyi ne ku banyama.+ 4 Kabiji nkebalula kwikala kintu kikalengela bufumu bonse bwa pano pa ntanda kumvwa moyo+ na mambo a bintu byaubile Manase mwana wa kwa Hezekiya mfumu wa Yuda mu Yelusalema.+
5 Obewa Yelusalema, ñanyi ukakubila lusa,
Ñanyi ukakumvwina bulanda,
Kabiji ñanyi ukabula kwipuzha pa bwikalo bobe?’
6 Yehoba waamba’mba, ‘Obewa wansha amiwa.+
Onkao mambo, amiwa nkatanyika kuboko kwami ne kukonauna.+
Nakooka na kukumvwina lusa.*
7 Kabiji amiwa nkebolululamo mu mizhi ya mu kyalo na kya kululwilako.
Nkebangata baana babo.+
Nkonauna bantu bami,
Mambo bakana kuleka mashinda abo atama.+
8 Banabakazhi bafwilwa bakavula bingi ku meso ami nobe busenga bwa ku kalunga ka mema.
Nkebatumina wa kwibonauna mute wansanana, wakonauna bainabo ne bansongwalume.
Nkebaletela bya malwa ne bintu bilenga moyo kya kwibabazhimunatu.
9 Mwanamukazhi wasemene baana batanu na babiji wapungila;
Aye* ubena kukokatu mwela wa kukoka pa kupema.
Juba jamuzhikila saka kukijitu mute,
Jamulengesha bumvu ne kumulengulwisha.’*
‘Ne boba bakashalapo
Nkebapana ku balwanyi babo kuba’mba bebatape na mpoko,’+ byo byaamba Yehoba.”
10 Anweba mama, kyatama bingi mambo mwansemene,+
Muntu ye batobosha ne kukatazha ku ba mu kyalo kyonse.
Amiwa kechi nakongwesheshepo nangwa kukongolapo kintu ne;
Pano bino, bantu bonse bamfinga.
11 Yehoba waambile’mba: “Amiwa nkakubila bintu byawama;
Kine, amiwa nkakukwasha mu kimye kya bya malwa,
Mu kimye kyakatazha ne kukupokolola ku balwanyi.
12 Nanchi muntu wakonsha kuchimauna kyela kya kapotwe,
Kyela kya kapotwe kyafuma ku kabeta ka ku buyeke ne mukuba nyi?
13 Amiwa nkalengela bantu kwimwangata bintu byenu bya bunonshi ne bya buneme,+
Kechi bakebipota ne, bino bakebisendatu na mambo a bubi bwenu bonse bo mwauba mu mapunzha enu onse.
14 Nkebipana ku balwanyi benu
Kuba’mba bakebitwale ku kyalo ko mwabula kuyuka.+
Mambo mujilo waambuka na mambo a bukaji bwami,
Kabiji ubena kwimuteemena.”+
15 Anweba Yehoba, mwayuka,
Mvulukai ne kunta muchima.
Nshinkenyaiko na bantu babena kummanyika.+
Kange mundeke mfwe* na mambo a kubanda kuzhingila kwenu ne.
Yukai amba bantu babena kuñendeleka na mambo a anweba.+
16 Byambo byenu nebitaaine kabiji nebijiile;+
Kabiji byambo byenu byalengejile muchima wami kusekela ne kusangalala,
Mambo natelwa pa jizhina jenu, anweba Yehoba Lesa wa mabumba.
17 Amiwa kechi ngikala mu jibumba ja bantu batemwa bya kisangajimbwe ne kusangalala ne.+
18 Mambo ka misongo yami o ibujila kuleka ne kilonda kyami o kibujila kupwa?
Kechi kipwa ne.
Nanchi mukekala kwi amiwa nobe nsulo ya mema yongolañana
Yakonsha kubula kuketekelwa nyi?
19 Onkao mambo, Yehoba waamba’mba:
“Inge wabwela, nkakutambwila,
Kabiji ukemana kwi amiwa.
Umvwe wayuka bintu byanema ne bintu byabula kufwainwa,
Obewa ukekala wa kuñambilako.
Bakeya kwi obewa,
Bino obewa kechi ukaya kwi abo ne.”
20 Yehoba waamba’mba: “Amiwa mbena kukwalula kwikala ku bano bantu nobe nsakwa yakosa ya mukuba.+
Abo bakalwa ne obewa,
Pano bino, kechi bakakushinda ne,+
Mambo amiwa nji ne obewa, nkakupulusha ne kukupokolola.”
21 “Nkakupokolola mu kuboko kwa bantu babi
Kabiji nkakufumya mu kuboko kwa bantu bakanama.”