Danyela
7 Mu mwaka mutanshi wa bukalama bwa kwa Beleshaza+ Mfumu wa Babilona, Danyela byo alaajile pa mwanya+ walotele kiloto ne kumona bimwesho. Kepo anembele kiloto;+ watongawilemo bintu byonse byo amwene. 2 Danyela waambile’mba:
“Mu bimwesho byami bufuku, namwene luvula luna lwa mwiulu saka luvundaula mema a pa kalunga ka mema kakatampe.+ 3 Kabiji mu kalunga ka mema mwafumine binyama bikatampe bina+ byapusana pusana.
4 “Lukinyama mutanshi wamwekelenga nobe bokwe+ kabiji wajinga na byapi nobe bya mpungu.+ Natajilenga kufikatu ne byo bamuyokwele byapi, bamwimikile kabiji waimene na maulu abiji nobe muntu, kabiji bamupele muchima wa muntu.
5 “Kabiji lukinyama wa bubiji, wamwekelenga nobe mbeyala.+ Wazandukile lubaji lumo kabiji wasendele mbavu isatu ku kanwa kanji; kabiji bamwambijile’mba, ‘Imana, ukaje nyama yavula.’+
6 “Byo natwajijile kutala, namwene lukinyama mukwabo wamwekelenga nobe kisumpa,+ bino wajinga na byapi bina nobe bya ñonyi mu nyuma yanji. Awa lukinyama wajinga na mitwe ina+ kabiji bamupele bulume bwa kulama.
7 “Kufuma popo, natwajijile na kumona bimwesho, kabiji namwene lukinyama wa buna washinta, ulenga moyo kabiji wajinga na bulume bulenga moyo, wajinga na meno akatampe a kyela kya kapotwe. Wajiilenga ne kuvingaula bintu kabiji wachakakenyenga bintu byonse byashajilengapo na maulu.+ Uno lukinyama wapuseneko bingi na binyama bikwabo bitanshi, kabiji wajinga na nsengo jikumi. 8 Byo nakitajilenga nsengo, namwene lusengo mukwabo wa mucheche+ wamenene pa nsengo ikwabo kabiji nsengo isatu pa yoya nsengo itanshi beiyokwelepo. Kabiji uno lusengo wa mucheche wajinga na meso nobe a muntu, kabiji wajinga ne na kanwa kaambilenga bya bwitote.*+
9 “Natwajijile kutala kufikatu ne byo babikilepo matanda a bufumu kabiji awa wa Kala Kene+ waikelepo.+ Bivwalo byanji byatokeletu too nobe mabebe+ kabiji nsuki yanji yajinga nobe boya butoka. Jitanda janji jateemenenga mujilo; bitanga byajo byateemenenga mujilo.+ 10 Kakola ka mujilo kapichilenga kufuma monka.+ Kabiji milyonyi umo bamwingijilenga, ne mamilyonyi 100 baimene ko ajinga.+ Kije+ kyaikele na kuchiba mambo, kabiji bazhikwile mabuku.
11 “Pa kyokya kimye, natwajijile kutala na mambo a byambo bya bwitote* byaambilenga yewa lusengo;+ natajilenga kufikatu ne lukinyama byo bamwipayile ne konauna mubiji wanji, kabiji bamutayile mu mujilo kuba’mba apye. 12 Pakuba binyama bikwabo byashajilepo,+ bebyangachile bukalama kabiji bebinungijileko bumi pa kakimye kacheche ne pa myaka icheche.
13 “Natwajijile kutala mu bimwesho bufuku, kabiji namwene wamwekelenga nobe mwana muntu saka eya mwiulu mu makumbi;+ waishile kwajinga yewa wa Kala Kene,+ kabiji bamuletele kwipi konka ko ajinga. 14 Kabiji bamupele bukalama,+ munema+ ne bufumu kuba’mba bantu ba mitundu yonse, bisaka bya bantu ne bantu bonse bamba milaka yapusana pusana bamwingijilenga.+ Bukalama bwanji bo bwa myaka ne myaka, kechi bukapwa ne, kabiji bufumu bwanji kechi bakebonauna ne.+
15 “Pakuba amiwa Danyela naikele na bijikila mambo bimwesho byo namwene byandetejile bingi moyo.+ 16 Nayile kwipi na umo wajinga pa boba baimene konka na kwipuzha mwatajile kino kintu. Aye wankumbwile ne kumbuula mwatajile bino bintu.
17 “‘Bino binyama bikatampe bina,+ bo bamfumu bana bakamweka pano pa ntanda.+ 18 Pano bino, aba bazhila ba yewa Mwine Wakila+ bakatambula bufumu+ kabiji bakalama mu bufumu+ kikupu, ko kuba’mba myaka ne myaka.’
19 “Kabiji nakebelenga kuyuka byavula pa lukinyama wa buna wapuseneko na binyama bikwabo; washinchile bingi kabiji wajinga na meno a kyela kya kapotwe ne ngala ya mukuba, wajiilenga ne kuvingaula, kabiji wachakakenyenga na maulu bintu byonse byashajilengapo;+ 20 kabiji nakebelenga kuyuka pa nsengo jikumi+ yajinga pa mutwe wanji, ne pa lusengo mukwabo wamenene popa payokokele isatu,+ lusengo wajinga na meso ne kanwa kaambilenga bya bwitote,* kabiji wamwekelenga kubaya kukila ikwabo.
21 “Natwajijile kutala uno lusengo byo alwilenga na bazhila kabiji wibashinjilenga,+ 22 kufikatu ne aye wa Kala Kene+ byo aishile, kabiji wachibijileko mambo aba bazhila ba yewa Mwine Wakila,+ kabiji kimye kyafikile kya kuba’mba aba bazhila balamenga mu bufumu.+
23 “Waambile’mba: ‘Pa mambo a lukinyama wa buna, kukeya bufumu bwa buna bukalama ntanda. Bukapusanako bingi na bufumu bukwabo bonse, kabiji bukonauna ntanda yonse, kwiichakakanya ne kwiivingaula.+ 24 Nsengo jikumi, bo bamfumu jikumi bakeya kufuma mu buno bufumu; kabiji pakalondela bukwabo bukapusanako na butanshi bonse, kabiji bukashinda bamfumu basatu.+ 25 Aye ukambila yewa Mwine Wakila+ bya mwenga, kabiji ukatwajijila kukatazha bazhila ba yewa Mwine Wakila. Ukakebanga kupimpula bimye ne mizhilo kabiji bakebapana mu kuboko kwanji pa kimye kimo, bimye ne kichika kya kimye.*+ 26 Pano bino, Kije kyaikele panshi kabiji bamwangachile bufumu bwanji kuba’mba bamonaune ne kumuvizha.+
27 “‘Kabiji bufumu ne bukalama ne bulume bwa bufumu bonse bwa pano pa ntanda, bebupaine ku bantu bazhila ba aye Mwine Wakila.+ Bufumu bwabo bo bwa myaka ne myaka+ kabiji bakebengijilanga ne kwibakookela ku bakalama bonse.’
28 “Bino byo byo nalotele ne kumona. Pakuba amiwa Danyela milanguluko yami yankatezhe bingi kya kuba kilungi kyami kyaalukile;* pano bino, nalamine bino bintu byonse mu muchima wami.”